അഹ്മദിയ്യ മുസ്‌ലിം ജമാഅത്ത്

“ഒരു ദൈവിക മുന്നറിയിപ്പ്കാരന്‍ വന്നുകഴിഞ്ഞിട്ടില്ലാത്ത ഒരു സമുദായവുമില്ല” എന്ന ഖുര്‍ആനിക പ്രഖ്യാപനത്തിന്റെ അടിസ്ഥാനത്തില്‍ ലോകത്തിലെ എല്ലാ മതങ്ങളും ദൈവത്തില്‍ നിന്ന് ഉത്ഭവിച്ചതാണെന്നും, അവയില്‍ ഇന്ന് നാം കാണുന്ന തെറ്റായ ആശയങ്ങള്‍ പിന്നീട് അതില്‍ വന്നുകൂടിയതാണ് എന്നുമാണ് അഹ്മദിയ്യ മുസ്‌ലിം ജമാഅത്തിന്റെ വിശ്വാസം. ഈ മതങ്ങളുടെയെല്ലാം സ്ഥാപകര്‍ സത്യസന്ധരും ദൈവത്തിന്റെ പ്രതിനിധികളായി ഭൂമിയില്‍ അവതരിച്ചവര്‍ ആണെന്നും അഹ്മദിയ്യ മുസ്‌ലിം ജമാഅത്ത് വിശ്വസിക്കുന്നു. വാഗ്ദത്ത മസീഹ്(അ) അരുള്‍ ചെയ്യുന്നു:

“ദൈവത്തില്‍ നിന്ന് അവതരിച്ചതാണെന്ന് വ്യക്തമായി വാദിക്കുകയും, എന്നാല്‍ യഥാര്‍ത്ഥത്തില്‍ അത് കെട്ടിച്ചമക്കപ്പെട്ടതായിരിക്കുകയും, ജനങ്ങള്‍ ഒരു നീണ്ടകാലം അതിനെ ആദരിക്കുകയും ചെയ്തതായി ഒരൊറ്റ ഗ്രന്ഥം പോലും ചൂണ്ടിക്കാണിക്കാന്‍ സാധിക്കുന്നതല്ല. എന്നാല്‍ ഒരു ദൈവിക ഗ്രന്ഥം തെറ്റിദ്ധരിപ്പെടുക എന്നത് സംഭവ്യമാണ്.”

ആയതിനാല്‍, സോറോസ്റ്റര്‍, അബ്രഹാം, മോസസ്, യേശു, കൃഷ്ണന്‍, ബുദ്ധന്‍, കണ്‍ഫ്യുഷസ്, ലാവോസി, ഗുരു നാനക്ക് എന്നിവരുള്‍പ്പെടെയുള്ള മതസ്ഥാപകര്‍ യഥാര്‍ത്ഥ ദൈവത്തിലേക്ക് ജനങ്ങളെ ക്ഷണിച്ചവരാണെന്നും അവരുടെയെല്ലാം അദ്ധ്യാപനങ്ങള്‍ ഇസ്‌ലാമില്‍ സമ്മേളിക്കുന്നു എന്നും അഹ്മദികള്‍ അടിയുറച്ച് വിശ്വസിക്കുന്നു.

വിശുദ്ധ ഖുര്‍ആന്റെയും നബിവചനങ്ങളുടെയും അടിസ്ഥാനത്തില്‍ മൂന്ന് തരം ജിഹാദുകളെ സംബന്ധിച്ച് നമുക്ക് വിവരം ലഭിക്കുന്നു. അതില്‍ ജിഹാദെ അക്ബര്‍ അഥവാ ഏറ്റവും വലിയ ജിഹാദ് എന്നത് ഒരു വ്യക്തി തന്റെ ദേഹേച്ഛകള്‍ക്കും സ്വാര്‍ത്ഥമായ ആഗ്രഹങ്ങള്‍ക്കും എതിരെ നടത്തുന്ന പോരാട്ടമാണ്. ജിഹാദെ കബീര്‍ അഥവാ വലിയ ജിഹാദ് എന്നത് ഇസ്‌ലാമിന്റെ സമാധാനപരമായ സന്ദേശം പ്രചരിപ്പിക്കുക എന്നതാകുന്നു. ഇതിന്റെയടിസ്ഥാനത്തില്‍ പേന കൊണ്ടുള്ള ജിഹാദ് വളരെ പ്രാധാന്യമര്‍ഹിക്കുന്നതാണെന്ന് അഹ്മദികള്‍ വിശ്വസിക്കുന്നു. മതത്തിന്റെയും വിശ്വാസത്തിന്റെയും പേരില്‍ അതികഠിനമായ പീഡനങ്ങള്‍ നേരിടേണ്ടി വരുന്ന സാഹചര്യങ്ങളില്‍ പ്രതിരോധത്തിനായി മാത്രം ഒരു ആത്മീയ നേതൃത്വത്തിന്റെ പിന്നില്‍ അണിനിരന്ന് കൊണ്ട് നടത്തുന്ന സായുധ പോരാട്ടം ഇസ്‌ലാമികമായി അറിയപ്പെടുന്നത് ജിഹാദെ അസ്ഗര്‍ അഥവാ ഏറ്റവും ചെറിയ ജിഹാദ് എന്നാണ്. ഇക്കാലഘട്ടത്തില്‍ ഇസ്‌ലാം സൈനികപരമായി ആക്രമിക്കപ്പെടാതിരിക്കുകയും എന്നാല്‍ മീഡിയയിലൂടെയും എഴുത്തുകളിലൂടെയും ആക്രമിക്കപ്പെടുകയും ചെയ്യുന്നതിനാല്‍ സായുധപരമായ ജിഹാദ് ഇന്നത്തെ കാലത്ത് പ്രസക്തമല്ല. വാഗ്ദത്ത മസീഹ്(അ) അരുള്‍ ചെയ്യുന്നു:

“ഇസ്‌ലാമിന്റെ വചനം ഉയര്‍ത്തിപ്പിടിക്കുന്നതിനും, എതിരാളികളുടെ ആക്ഷേപങ്ങള്‍ക്ക് മറുപടി നല്‍കുന്നതിനും, ഇസ്‌ലാമികാദ്ധ്യാപനങ്ങളുടെ മഹത്വം പ്രചരിപ്പിക്കുന്നതിനും, പ്രവാചകന്‍(സ)യുടെ സത്യത ലോകമെമ്പാടും എത്തിക്കുന്നതിനും വേണ്ടി പ്രയത്നിക്കുക എന്നതാണ് ഇക്കാലഘട്ടത്തിലെ ജിഹാദ്. അല്ലാഹു ലോകത്ത് മറ്റൊരു സാഹചര്യം കൊണ്ട് വരുന്നത് വരെ ഇതു തന്നെയാണ് ജിഹാദ്.”

വിശുദ്ധ ഖുര്‍ആന്റെ ചില വചനങ്ങള്‍ മറ്റു ചിലതിനെ ദുര്‍ബലപ്പെടുത്തുന്നു എന്നത് ഇസ്‌ലാമിന്റെ അടിസ്ഥാന തത്വങ്ങള്‍ക്ക് ഘടകവിരുദ്ധമായിട്ടുള്ള ആശയമാണ്. ഇത്തരത്തിലുള്ള നസ്ഖ് അഥവാ ദുര്‍ബലപ്പെടല്‍ വിശുദ്ധ ഖുര്‍ആനിന്മേല്‍ ആരോപിക്കുന്നത് അതിന്റെ വിശ്വാസ്യതയെ ഇല്ലായ്മ ചെയ്യുന്നതിനും അല്ലാഹുവിന്റെ വിജ്ഞാനത്തെ ചോദ്യം ചെയ്യുന്നതിനും തുല്യമാണ്. വിശുദ്ധ ഖുര്‍ആനില്‍ യാതൊരു വൈരുധ്യവുമില്ല എന്ന ആ ഗ്രന്ഥത്തിന്റെ തന്നെ പ്രഖ്യാപനത്തിനും എതിരാണ് ഈയൊരു ആശയം. വിശുദ്ധ ഖുര്‍ആന്‍ പറയുന്നു:

“അപ്പോള്‍ അവര്‍ ഖുര്‍ആനെ സംബന്ധിച്ച് ചിന്തിക്കുന്നില്ലേ? അത് അല്ലാഹുവല്ലാത്ത [മറ്റുവല്ല]വരില്‍ നിന്നും ഉള്ളതായിരിന്നുവെങ്കില്‍ തീര്‍ച്ചയായും അവര്‍ അതില്‍ വളരെയധികം വൈരുധ്യങ്ങള്‍ കണ്ടെത്തുമായിരുന്നു.”

കൂടാതെ, ഹദ്രത്ത് മുഹമ്മദ്‌(സ) അരുള്‍ ചെയ്തതായി ഒരു നിവേദനത്തില്‍ വന്നിരിക്കുന്നു:

“ഖുര്‍ആന്‍ അവതരിച്ചിട്ടുള്ളത് അതിന്റെ ചില ഭാഗങ്ങള്‍ മറ്റു ചിലതിനെ ദുര്‍ബലപ്പെടുത്തുന്നതിന് വേണ്ടിയല്ല, മറിച്ച്, അതിന്റെ വ്യത്യസ്ത ഭാഗങ്ങള്‍ പരസ്പരം സത്യപ്പെടുത്തുന്നവയാണ്. ആയതിനാല്‍, അതില്‍ മനസ്സിലാകുന്ന ഭാഗങ്ങളെ പ്രാവര്‍ത്തികമാക്കുക. അതില്‍ മനസ്സിലാകാത്ത ഭാഗങ്ങളെ സംബന്ധിച്ച് അറിവുള്ളവരോട് ചോദിക്കുക.” (മുസ്നദ് അഹ്മദ്)

പ്രപഞ്ചത്തിന്റെ സൃഷ്ടാവും പരിപാലകനുമായ ദൈവത്തെയാണ് വിശുദ്ധ ഖുര്‍ആന്‍ പരിചയപ്പെടുത്തുന്നത്. മനുഷ്യര്‍ക്ക് മാര്‍ഗദര്‍ശനമായി മതങ്ങള്‍ അവതരിപ്പിച്ചതും ഇതേ ദൈവം തന്നെയാണ്. ആയതിനാല്‍, ശാസ്ത്രം ഈ പ്രപഞ്ചത്തിന്റെ പ്രവര്‍ത്തനത്തെയും അതിന്റെ ഗുണങ്ങളെയും സംബന്ധിച്ച പഠനമായിരിക്കെ, മതത്തിനും ശാസ്ത്രത്തിനുമിടയില്‍ വൈരുധ്യം ഉണ്ടാകുന്ന പക്ഷം രണ്ടിലൊന്നിന് എന്തോ പിഴവ് സംഭവിച്ചിട്ടുണ്ടെന്ന് മനസ്സിലാക്കേണ്ടി വരും. കുറച്ച് കൂടി വ്യക്തമായി പറഞ്ഞാല്‍, ശാസ്ത്രം ദൈവത്തിന്റെ പ്രവൃത്തിയും മതം ദൈവത്തിന്റെ വചനവുമാണ്. അത് കൊണ്ട് അവയ്ക്കിടയില്‍ വൈരുധ്യം ഉണ്ടാകാന്‍ പാടുള്ളതല്ല. വാഗ്ദത്ത മസീഹ്(അ) അരുള്‍ ചെയ്യുന്നു:

“പ്രാപഞ്ചികനിയമങ്ങളില്‍ ദൃശ്യമാകുന്ന, പ്രകൃതിയാകുന്ന പുസ്തകം നമുക്ക് മനസ്സിലാക്കിത്തരുന്ന അതേ ദൈവമാണ് ഇസ്‌ലാമിന്റെ ദൈവം. ഇസ്‌ലാം ഒരു പുതിയ ദൈവത്തെയും അവതരിപ്പിച്ചിട്ടില്ല. മറിച്ച്, മനുഷ്യന്റെ ഹൃദയത്തിന്റെ വെളിച്ചത്താല്‍ പ്രകടമാകുന്നതും, അവന്റെ മനസ്സാക്ഷി മുന്നോട്ട് വക്കുന്നതും, ആകാശഭൂമികള്‍ സമര്‍ത്ഥിക്കുന്നതുമായ ദൈവത്തിനെയാണ് ഇസ്‌ലാം നമുക്ക് പരിചയപ്പെടുത്തുന്നത്.”

ഭരണകാര്യങ്ങളില്‍ നിന്ന് മതവിശ്വാസങ്ങള്‍ മാറ്റി നിര്‍ത്തണം എന്ന ആശയത്തെ അഹ്മദിയ്യ മുസ്‌ലിം ജമാഅത്ത് പിന്തുണയ്ക്കുന്നു. ഇസ്‌ലാം ഭരണകൂടവുമായി ബന്ധപ്പെട്ടതോ അല്ലെങ്കില്‍ രാഷ്ട്രസംബന്ധിയോ ആയ വിഷയങ്ങളില്‍ മാര്‍ഗദര്‍ശനം നല്‍കുന്നില്ല എന്ന അടിസ്ഥാനത്തിലല്ല ഇത് എന്നത് പ്രത്യേകം മനസ്സിലാക്കേണ്ടതാണ്. ഇസ്‌ലാം ഭരണസംബന്ധിയും രാഷ്ട്രീയവും അന്താരാഷ്‌ട്രീയവുമായ എല്ലാ പ്രശ്നങ്ങളെയും അഭിസംബോധന ചെയ്യുകയും ഈ വിഷയങ്ങളില്‍ കൃത്യമായ മാര്‍ഗനിര്‍ദേശം നല്‍കുകയും ചെയ്യുന്നു. എന്നാല്‍, ഇസ്‌ലാം പിന്തുടരാത്തവരുടെ മേല്‍ അതിന്റെ ആശയങ്ങള്‍ അടിച്ചേല്‍പ്പിക്കുന്നത് അത് നിഷിദ്ധമാക്കിയിരിക്കുന്നു എന്നതിനാല്‍ രാഷ്ട്രകാര്യങ്ങളില്‍ മതാശയങ്ങള്‍ ഉള്‍പ്പെടുത്തുന്നത് ഇസ്‌ലാമികമായി തെറ്റാകുന്നു.

ഇക്കാര്യം വിശുദ്ധ ഖുര്‍ആന്റെ അധ്യാപനങ്ങളുടെ അടിസ്ഥാനത്തിലും പ്രവാചകന്‍(സ)യുടെ മാതൃകയുടെ വെളിച്ചത്തിലും ശരിയാണെന്ന് കാണാവുന്നതാണ്. മതകാര്യങ്ങളില്‍ ബലാല്‍ക്കാരം പാടില്ല എന്ന്‍ പ്രഖ്യാപിക്കുന്നതോടൊപ്പം തന്നെ ഒരു ഭരണകൂടത്തിന്റെ അടിസ്ഥാനം പരിപൂര്‍ണ നീതിയില്‍ അധിഷ്ഠിതമായിരിക്കണമെന്നും വിശുദ്ധ ഖുര്‍ആന്‍ അനുശാസിക്കുന്നുണ്ട്. അത് പോലെ തന്നെ, പ്രവാചകന്‍(സ) മദീനയുടെ രാഷ്ട്രത്തലവന്‍ എന്ന നിലയില്‍ മറ്റുള്ളവരുടെ മേല്‍ ഇസ്‌ലാമിക നിയമങ്ങള്‍ അടിച്ചേല്‍പ്പിക്കുന്നതിന് പകരം അവരുടെ പ്രശ്നങ്ങള്‍ അവരുടെ വിശ്വാസമനുസരിച്ച് പരിഹരിക്കുമായിരുന്നു.

ആയതിനാല്‍, പരിപൂര്‍ണ നീതിയില്‍ അധിഷ്ഠിതമായ ഒരു ഭരണവ്യവസ്ഥയാണ് ഇസ്‌ലാം മുന്നോട്ട് വയ്ക്കുന്നത്. അത് പ്രാവര്‍ത്തികമാക്കണമെങ്കില്‍ വിശ്വാസകാര്യങ്ങളെ ഭരണകാര്യങ്ങളില്‍ നിന്ന് മാറ്റി നിര്‍ത്തേണ്ടത് അനിവാര്യമാണ്.