തങ്ങളുടെ സത്യതക്ക് തെളിവായി ദൈവത്തില്‍ നിന്ന് ആത്മീയ ചൈതന്യവും അസാമാന്യ വ്യക്തിപ്രഭാവവും നല്കപ്പെടുന്നവരാണ് പ്രവാചകന്മാര്‍. ആയതിനാല്‍ അവര്‍ തങ്ങളുടെ വാദം പുറപ്പെടുവിക്കുമ്പോള്‍ സത്യാന്വേഷികളായ ആളുകള്‍ അവരുടെ ആത്മീയ പ്രകാശം ദര്‍ശിച്ചുകൊണ്ട് അവരുടെ സത്യതയെ അംഗീകരിക്കുന്നു. എന്നാല്‍ ഈ പ്രകാശം ദര്‍ശിക്കാനുള്ള ഉള്‍ക്കാഴ്ച ഇല്ലാത്തവര്‍ക്ക് പ്രവാചകന്മാരുടെ സത്യത തിരിച്ചറിയാന്‍ അസാധാരണമായ അടയാളങ്ങള്‍ക്ക് സാക്ഷ്യം വഹിക്കേണ്ടത് ആവശ്യമായി വരുന്നു. അതിനാല്‍, പ്രപഞ്ചസൃഷ്ടാവായ ദൈവം അവരുടെ സത്യതയ്ക്കായി അടയാളങ്ങള്‍ പ്രകടിപ്പിക്കുകയും, അതുവഴി അവര്‍ ദൈവനിയോഗിതര്‍ തന്നെയാണ് എന്ന കാര്യം സംശയാതീതമായി തെളിയിക്കുകയും ചെയ്യുന്നു.

വാഗ്ദത്ത മസീഹും ഇമാം മഹ്ദിയുമായ അഹ്മദിയ്യ മുസ്‌ലിം ജമാഅത്തിന്റെ വന്ദ്യ സ്ഥാപകന്‍ ഹദ്രത്ത് മിര്‍സ ഗുലാം അഹ്മദ്(അ)നും ഈ രണ്ട് അടയാളങ്ങളും നല്‍കപ്പെട്ടിരുന്നു. അദ്ദേഹത്തിന്റെ ആത്മീയപ്രഭാവം ദര്‍ശിച്ചുകൊണ്ട് അദ്ദേഹത്തിന്റെ സത്യത തിരിച്ചറിഞ്ഞ ഒരു സമൂഹം അദ്ദേഹത്തെ സ്വീകരിച്ചു. മറ്റു ചിലര്‍ അദ്ദേഹത്തിന്റെ പരിശുദ്ധ വ്യക്തിത്വത്തിനും കളങ്കമറ്റ ജീവിതത്തിനും സാക്ഷ്യം വഹിച്ചുകൊണ്ട് അദ്ദേഹം തന്റെ വാദം മുന്നോട്ട് വയ്ക്കുന്നതിനു മുമ്പ് തന്നെ അദ്ദേഹത്തെ വാഗ്ദത്ത മസീഹായി അംഗീകരിക്കുവാനും അദ്ദേഹത്തിന്റെ കയ്യില്‍ ബൈഅത്ത് ചെയ്യുവാനും തയ്യാറായി. അതുപോലെ തന്നെ അദ്ദേഹത്തിന്റെ സത്യതയ്ക്ക് തെളിവായി ഒരുപാട് ദൈവിക ദൃഷ്ടാന്തങ്ങളും പുലര്‍ന്നു. ആ ദൃഷ്ടാന്തങ്ങളില്‍ പെട്ട ഒന്നാണ് 1400 വര്‍ഷങ്ങള്‍ക്ക് മുമ്പ് പ്രവാചകന്‍(സ) പ്രവചിച്ച നിര്‍ദിഷ്ട സാഹചര്യങ്ങളില്‍ സംഭവിക്കുമെന്ന് പറഞ്ഞ സൂര്യചന്ദ്രഗ്രഹണങ്ങള്‍.