ഹദ്രത്ത് അഹ്മദ്(അ) 1891ല്‍ ആദ്യമായി തന്റെ അനുയായികളോട് ഡിസംബര്‍ മാസത്തില്‍ ഖാദിയാനില്‍ ഒരുമിച്ചുകൂടാന്‍ ആഹ്വാനം ചെയ്യുകയുണ്ടായി. തന്റെ ആസ്മാനി ഫൈസ്‌ല എന്ന ഗ്രന്ഥത്തില്‍ മുസ്‌ലിം നേതാക്കള്‍ക്ക് അദ്ദേഹം നല്‍കിയ വെല്ലുവിളിക്ക് ജഡ്ജിമാരെ തിരഞ്ഞെടുക്കുക എന്നതായിരുന്നു ഈ ഒത്തുകൂടലിന്റെ ഒരു ഉദ്ദേശ്യം. ഇന്ത്യയുടെ നാനാഭാഗത്ത് നിന്നും 75 അനുയായികള്‍ ഖാദിയാനില്‍ എത്തുകയും ആദ്യത്തെ വാര്‍ഷിക സമ്മേളനം അഥവാ ജല്‍സ സാലാന ഡിസംബര്‍ 27-29 തിയതികളില്‍ ഖാദിയാനിലെ മസ്ജിദ് അഖ്‌സയില്‍ വെച്ച് നടക്കുകയും ചെയ്തു.

ഈയവസരത്തില്‍ ഇനിയങ്ങോട്ട് എല്ലാ വര്‍ഷവും ഡിസംബര്‍ മാസത്തില്‍ ജല്‍സ സാലാന നടത്തപ്പെടുമെന്ന് ഹദ്രത്ത് അഹ്മദ്(അ) അരുള്‍ ചെയ്യുകയും ചെയ്തു. അവിടുന്ന് പറഞ്ഞു:

“എല്ലാ വര്‍ഷവും മൂന്ന് ദിവസം സമ്മേളനത്തിനായി നിശ്ചയിക്കപ്പെടേണ്ടതാണ്. അതില്‍ എന്റെ എല്ലാ ആത്മാര്‍ത്ഥരായ അനുയായികളും പങ്കുചേരേണ്ടതാണ് – ആരോഗ്യപരമോ അല്ലെങ്കില്‍ മറ്റെന്തെങ്ങിലും ശക്തമായ തടസ്സങ്ങളോ ഉള്ളവരൊഴിച്ച്.”

ഇത് പ്രകാരം എല്ലാ വര്‍ഷവും അഹ്മദിയ്യ മുസ്‌ലിം ജമാഅത്തിന്റെ വാര്‍ഷിക സമ്മേളനം നടത്തപ്പെടാന്‍ തുടങ്ങി. അടുത്ത വര്‍ഷം 1892ല്‍ ഖാദിയാനിലെ ഒരു തടാകത്തിനു സമീപം ജല്‍സ സംഘടിപ്പിക്കപ്പെട്ടു. തടാകത്തിന് അരികിലുള്ള ചളിമണ്ണില്‍ നിന്ന് സ്റ്റേജ് നിര്‍മ്മിക്കപ്പെടുകയും അതിന്മേല്‍ പരവതാനി വിരിച്ച് ഒരു കസേരിയില്‍ ഹദ്രത്ത് മസീഹ് മൗഊദ്(അ) ഉപവിഷ്ഠനാവുകയും ചെയ്തു. അനുയായികള്‍ അദ്ദേഹത്തിന് ചുറ്റുമായി തറയില്‍ ഇരിക്കുകയും ചെയ്തു. ഈ ജല്‍സയില്‍ 327 അംഗങ്ങള്‍ പങ്കെടുത്തു. 1907ല്‍ ഹദ്രത്ത് അഹ്മദ്(അ) പങ്കെടുത്ത അവസാന ജല്‍സയില്‍ 2000 ആളുകള്‍ പങ്കെടുത്തു.

വിരളം ചില പ്രത്യേക സാഹചര്യങ്ങളിലൊഴിച്ച് ഈ ജല്‍സ എല്ലാ വര്‍ഷവും ഇന്ത്യയിലും അതുപോലെത്തന്നെ മറ്റു രാജ്യങ്ങളിലും ആയിരക്കണക്കിന് ആളുകളുടെ സാന്നിധ്യത്തില്‍ നടത്തപ്പെടുന്നു.