ഇസ്‌ലാം എനിക്ക് എന്ത് നല്കി? മുസ്‌ലിം സ്ത്രീകള്‍ പറയുന്നു

ഇസ്‌ലാമിക അധ്യാപനങ്ങൾ ഒരു സ്ത്രീ എന്ന നിലയിൽ എനിക്ക് എപ്പോഴും പൂർണ സ്വാതന്ത്ര്യമാണ് നല്കിയിട്ടുള്ളത്. വസ്ത്രധാരണത്തിലും വിദ്യാഭ്യാസത്തിലും ചിന്തകളിലും കുടുംബബന്ധങ്ങളിലുമെല്ലാം ആ സ്വാതന്ത്ര്യം അനുഭവിച്ചറിയാൻ എനിക്ക് സാധിക്കാറുണ്ട്.

പ്രത്യേകിച്ച് പര്‍ദ്ദയുടെ കാര്യം പറയുകയാണെങ്കിൽ, പുറത്ത് ആളുകളോട് ഇടപഴകുമ്പോൾ ശരീരത്തെക്കുറിച്ചുള്ള അനാവശ്യ ആശങ്കകളില്ലാതെ തികച്ചും സ്വതന്ത്രമായി പെരുമാറാൻ അത് എന്നെ സഹായിക്കുന്നു. മറ്റുള്ള പലരും വസ്ത്രധാരണത്തിന്‍റെ പേരിൽ സ്വയം സങ്കോചിക്കുന്നതും ബുദ്ധിമുട്ടുന്നതും ഞാന്‍ കണ്ടിട്ടുണ്ട്. എന്നാൽ പര്‍ദ്ദ ധരിക്കുമ്പോൾ നമുക്ക് തികഞ്ഞ ആത്മവിശ്വാസത്തോടെ ആളുകളുമായി ഇടപെടാൻ കഴിയുന്നു.

ഇക്കാര്യം മറ്റുള്ളവരുടെ സമീപനത്തിലും പ്രതിഫലിക്കുന്നതായി കാണാം. പുരുഷന്മാരായാലും സ്ത്രീകളായാലും ഒരു പരിധിക്കപ്പുറം മോശമായ തമാശകളോ വാക്കുകളോ ഉപയോഗിക്കാതെ, വലിയ ബഹുമാനത്തോടും മാന്യതയോടും കൂടിയാണ് നമ്മോട് സംസാരിക്കാറുള്ളത്. അതുപോലെ പര്‍ദ്ദയിലായിരിക്കുമ്പോൾ ആ മാന്യത കാത്തുസൂക്ഷിക്കാൻ നമ്മളും സ്വയം ശ്രദ്ധിക്കാറുണ്ട്.

ഇസ്‌ലാം മുന്നോട്ട് വയ്ക്കുന്ന കുടുംബവ്യവസ്ഥയില്‍ സ്ത്രീയും പുരുഷനും അന്യോന്യം സപ്പോര്‍ട്ട് ചെയ്യുന്ന ഒരു രീതിയാണ് കാണാന്‍ സാധിക്കുക. സ്ത്രീകള്‍ക്ക് സ്വന്തമായി സമ്പാദിക്കാനും ജോലി ചെയ്യാനുമുള്ള അവകാശം ഇസ്‌ലാം നല്കുന്നു. എന്നാല്‍ അവരുടെ പ്രഥമ ഉത്തരവാദിത്വം മക്കളുടെ പരിപാലനമാണ്. അതേസമയം, കുടുംബത്തിന്‍റെ സാമ്പത്തിക ചെലവുകളും ഉത്തരവാദിത്വങ്ങളും പൂര്‍ണമായും പുരുഷന്മാരിലാണ് നിക്ഷിപ്തമായിരിക്കുന്നത്.

അതുകൊണ്ടുതന്നെ, സ്ത്രീകള്‍ക്ക് തങ്ങളുടെ സമ്പാദ്യം തങ്ങളുടെ ഇഷ്ടാനുസരണം ഉപയോഗിക്കാം. അതില്‍ ഭര്‍ത്താവിന് നേരിട്ട് യാതൊരു അവകാശവുമില്ല.

എന്നാല്‍, സമൂഹത്തില്‍ നാം കാണുന്നതും, എന്‍റെ തന്നെ പരിചയത്തില്‍ ഞാന്‍ കണ്ടിട്ടുള്ളതുമായ ഒരു പ്രവണത, സ്ത്രീകള്‍ സ്വന്തമായി സമ്പാദിക്കുന്ന പണം ഭര്‍ത്താവിന്‍റെ അനുവാദത്തോടെ മാത്രം ചെലവഴിക്കേണ്ടി വരുന്നു എന്നതാണ്. രണ്ടു പേരുടെയും ശമ്പള അക്കൗണ്ടുകള്‍ ഭര്‍ത്താവ് കൈകാര്യം ചെയ്യുന്ന ഒരുപാട് സ്ത്രീകളെ എനിക്കറിയാം.

എന്നാല്‍, ഇസ്‌ലാമിക അധ്യാപനമനുസരിച്ച് പരിപൂര്‍ണ സാമ്പത്തിക സ്വാതന്ത്ര്യം സ്ത്രീകള്‍ക്കാണ് നല്കപ്പെട്ടിട്ടുള്ളത്.

അഹ്‍മദിയ്യാ മുസ്‌ലിം ജമാഅത്തിന്‍റെ ഭാഗമായതുകൊണ്ട് തന്നെ ഈ വിഷയങ്ങളിലെല്ലാം ശരിയായ വ്യാഖ്യാനങ്ങൾ ലഭിക്കുന്നു എന്നത് വലിയൊരു അനുഗ്രഹമാണ്. മറ്റിടങ്ങളിൽ വ്യക്തമായ മാർഗദർശനം ലഭിക്കാത്തതിനാൽ ചിലരൊക്കെ ചൂഷണം ചെയ്യപ്പെടുന്നത് കാണാറുണ്ട്. പലപ്പോഴും, മതപുരോഹിതന്മാര്‍ തങ്ങളുടെ വ്യക്തിപരമായ അഭിപ്രായങ്ങളാണ് മതനിയമങ്ങള്‍ എന്ന നിലയില്‍ പ്രചരിപ്പിക്കാറുള്ളത്.

എന്നാൽ ഇതിന്‍റെയൊക്കെ യഥാർഥ ഭംഗി അനുഭവപ്പെടുന്നത് ഇസ്‌ലാം സ്ത്രീകൾക്ക് നല്കുന്ന അവകാശങ്ങളെക്കുറിച്ച് ബോധ്യമുള്ള ഒരു കുടുംബത്തിൽ ജീവിക്കുമ്പോഴാണ്. ഈ അധ്യാപനങ്ങൾ സ്ത്രീകൾക്ക് പുറമെ പുരുഷന്മാർക്കും കൃത്യമായി ലഭിക്കുന്നതിനാൽ സ്ത്രീകളുടെ സ്വാതന്ത്ര്യത്തെ ബഹുമാനിക്കാൻ അവരും പഠിക്കുന്നു. ഇത് കുടുംബജീവിതം കൂടുതൽ സുഗമമാക്കുന്നു. കുടുംബത്തിൽ നിന്ന് ലഭിക്കുന്ന ഈ ശക്തമായ പിന്തുണ പുറത്തും സമാധാനത്തോടെയും മാനസിക സമ്മർദങ്ങളില്ലാതെയും ജീവിക്കാൻ നമുക്ക് കരുത്ത് നല്കുന്നു.