ഹദ്രത്ത് മിർസാ മസ്റൂർ അഹ്‌മദ്‌(അയ്യദഹു) പറഞ്ഞു:

“സർവ്വശക്തനായ അല്ലാഹു സൃഷ്ടിച്ച പ്രകൃതിയുടെ നിയമം ഈ ലോകത്ത് പ്രാബല്യത്തിൽ ഉണ്ട്. പ്രകൃതി നിയമങ്ങൾക്ക് വിരുദ്ധമായി പ്രവർത്തിക്കുമ്പോൾ പ്രതികൂല പ്രതികരണം ഉണ്ടാകില്ലെന്ന് സർവ്വശക്തനായ അല്ലാഹു ഒരിടത്തും പറഞ്ഞിട്ടില്ല. യുദ്ധങ്ങൾ നടക്കുകയും ബോംബുകൾ പൊട്ടിത്തെറിക്കുകയും ചെയ്യുമ്പോൾ, അതിന്റെ ഫലമായി നിരപരാധികളായ കുട്ടികളും മരിക്കുന്നു. മനുഷ്യരുടെ പ്രവൃത്തികളാണ് യുദ്ധത്തിനും, നിരപരാധികളുടെ മരണത്തിനും കാരണമാകുന്നത്.”

മുസ്‌ലിങ്ങൾക്കും പ്രവാചകൻ മുഹമ്മദ്‌(സ)ക്കുമെതിരെ നടന്ന യുദ്ധങ്ങളിൽ പോലും വിജയം വാഗ്‌ദാനം ചെയ്‌തിട്ടും നിരപരാധികളായ മുസ്‌ലിങ്ങൾ ദുരിതമനുഭവിച്ചുണ്ട് എന്നും അദ്ദേഹം കൂട്ടിച്ചേര്‍ത്തു.

ഈ വിഷയം കൂടുതൽ വിശദീകരിച്ചുകൊണ്ട് ഹദ്രത്ത് മിർസാ മസ്‌റൂർ അഹ്‌മദ്‌(അയ്യദഹു) പറഞ്ഞു:

“സാധാരണയായി, പ്രകൃതിയുടെ നിയമം അനുസരിച്ച് എല്ലാ പ്രവൃത്തികൾക്കും അനന്തരഫലങ്ങൾ ഉള്ളതാണ്. നിങ്ങൾ (ഹാനികരമായ) പ്രവൃത്തികൾ ചെയ്യുകയും അവയുടെ അനന്തരഫലങ്ങളിൽ നിന്ന് നിങ്ങൾ രക്ഷപ്പെടുമെന്ന് പ്രതീക്ഷിക്കുകയും ചെയ്യരുത്. കാരണം പ്രകൃതിയുടെ നിയമം പ്രാബല്യത്തിൽ ഉണ്ടെന്ന് സർവശക്തനായ അല്ലാഹു നമ്മളോട് പറഞ്ഞിട്ടുണ്ട്.”

കുട്ടികൾ രോഗങ്ങളോടും വൈകല്യങ്ങളോടും കൂടി ജനിക്കുന്നതിനെ കുറിച്ച് സംസാരിച്ചുകൊണ്ട് ഖലീഫ തിരുമനസ്സ് പറഞ്ഞു, ചില സമയങ്ങളിൽ മാതാപിതാക്കളുടെ ചില പ്രവൃത്തികളുടെ ഫലമായാണ് കുട്ടികൾ രോഗങ്ങളോട് കൂടി ജനിക്കുന്നത്. അതിനാൽ അത് പോലും ലോകത്തെ നിയന്ത്രിക്കുന്ന പ്രകൃതി നിയമത്തിന്റെ ഫലമാണ്.

എന്നിരുന്നാലും, മുസ്‌ലിങ്ങൾ എന്ന നിലയിൽ നമ്മുടെ വിശ്വാസം ഇഹലോക  ജീവിതത്തിലെ സംഭവങ്ങളിൽ മാത്രം ഒതുങ്ങുന്നില്ലെന്നും പകരം ഈ ലോകത്ത് കഷ്ടപ്പെടുന്നവർക്ക് പരലോകത്ത് പ്രതിഫലം ലഭിക്കുമെന്നും അദ്ദേഹം പറഞ്ഞു.

ഈ വിഷയവുമായി ബന്ധപ്പെട്ട് അഹ്‌മദിയ്യ മുസ്‌ലിം ജമാഅത്തിന്റെ രണ്ടാം ഖലീഫ ഹദ്രത്ത് മിർസാ ബശീറുദ്ദീൻ മഹ്‌മൂദ്‌ അഹ്‌മദ്‌(റ) രചിച്ച ദൈവാസ്തിക്യത്തിനുള്ള പത്ത് തെളിവുകൾ, ഹസ്തി ബാരി തആലാ (ഉര്‍ദു) എന്നീ ഗ്രന്ഥങ്ങൾ വായിക്കാൻ അദ്ദേഹം ആ സഹോദരിയെ ഉപദേശിച്ചു.

ഒരു അഹ്‌മദി മുസ്‌ലിം തന്റെ ദീനിനും രാജ്യത്തെ നിയമങ്ങൾക്കും ഇടയിൽ ഏതെങ്കിലും ഒന്ന് തിരഞ്ഞെടുക്കാന്‍ നിർബന്ധിതയായാല്‍ എന്തുചെയ്യണമെന്ന് ഒരു ലജ്‌ന അംഗം ഖലീഫ തിരുമനസ്സിനോട് ചോദിച്ചു.

ഹദ്രത്ത് മിർസാ മസ്റൂർ അഹ്‌മദ്‌(അയ്യദഹു) പറഞ്ഞു:

“ശരീഅത്തിന്റെ വ്യക്തമായ നിയമങ്ങള്‍ക്ക് വിരുദ്ധമല്ലാത്ത രാജ്യത്തിന്റെ നിയമങ്ങൾ നാം പാലിക്കണം. എന്നിരുന്നാലും ഒരു രാജ്യത്തെ നിയമങ്ങൾ ശരീഅത്തിന്റെ കൽപ്പനകൾ പാലിക്കുന്നതിൽ നിന്ന് നമ്മെ തടയുന്നുവെങ്കിൽ – പാക്കിസ്ഥാനില്‍ അഹ്‌മദി മുസ്‌ലിങ്ങളെ ഇസ്‌ലാമിന്റെ അടിസ്ഥാന വിശ്വാസ പ്രഖ്യാപനമായ ശഹാദത്ത് ചൊല്ലുന്നതില്‍ നിന്ന് തടയുന്നത് പോലെ – അത്തരം സാഹചര്യങ്ങളിൽ നമ്മുടെ വിശ്വാസത്തിൽ നിന്ന് നമ്മെ നേരിട്ട് തടയുന്ന നിയമങ്ങൾ ഒഴികെ രാജ്യത്തെ എല്ലാ നിയമങ്ങളും നാം അനുസരിക്കുന്നതാണ്. അതിനാൽ, നിയമം എന്ത് പറഞ്ഞാലും നമുക്ക് ഒരിക്കലും നമ്മെ ശഹാദയിൽ നിന്ന് വേർപെടുത്താൻ കഴിയില്ല. അതുപോലെ, പാക്കിസ്ഥാനിൽ, അഞ്ചുനേര നമസ്ക്കാരങ്ങളില്‍ നിന്നും, സലാം പറയുന്നതില്‍ നിന്നും, അല്ലെങ്കിൽ ഏതെങ്കിലും ഇസ്‌ലാമിക പദങ്ങൾ ഉപയോഗിക്കുന്നതില്‍ നിന്നും നിയമം നമ്മെ വിലക്കുന്നു. എന്നിരുന്നാലും, ഈ സാഹചര്യത്തിൽ, അത് നമ്മുടെ മതപരമായ അവകാശമായി നാം കരുതുന്നു. അതിനാൽ നാം നമ്മുടെ വിശ്വാസത്തിനനുസരിച്ച് പ്രവർത്തിക്കുന്നു. അല്ലാത്തപക്ഷം, നാം രാജ്യത്തെ മറ്റെല്ലാ നിയമങ്ങളും പാലിക്കുകയും രാജ്യത്തോട് കൂറ് പുലർത്തുകയും ചെയ്യുന്നു. രാജ്യത്തിന്റെ സുരക്ഷയ്ക്കും സമാധാനത്തിനുമായി നാം നമ്മുടെ ജീവൻ പോലും ബലിയർപ്പിക്കുന്നു, അഹ്‌മദി  മുസ്‌ലിങ്ങൾ എന്ന നിലയിൽ നാം ജീവിക്കുന്ന എല്ലാ രാജ്യങ്ങളിലും ഇത് ചെയ്യുന്നു. അതിലൂടെ നാം രാജ്യത്തിന്റെ നിയമങ്ങൾ അനുസരിക്കുന്ന സമാധാനകാംക്ഷികളായ പൗരന്മാരാകുന്നു.”