നബിതിരുമേനി(സ) രക്തസാക്ഷികളുടെ കുടുംബങ്ങൾക്ക് വേണ്ടി പ്രാർത്ഥിച്ചു. ഉഹുദ് യുദ്ധത്തിൽ ശഹീദായ ഒരു വ്യക്തിയുടെ വൃദ്ധയായ മാതാവിനെ നബിതിരുമേനി(സ) കാണുകയുണ്ടായി. അപ്പോൾ അദ്ദേഹം അവരെ സമാശ്വസിപ്പിക്കുകയും, ‘ഉഹുദ് യുദ്ധത്തിലെ രക്തസാക്ഷികളുടെ കുടുംബങ്ങൾക്ക് ശ്രേഷ്ഠരായ സംരക്ഷകരെ പ്രദാനം ചെയ്യേണമേ’ എന്ന് പ്രാർഥിക്കുകയും ചെയ്തു. നബിതിരുമേനി(സ) യുടെ അടുത്ത ബന്ധുക്കൾ വധിക്കപ്പെട്ടിരുന്നതിനാൽ അതിയായ ദുഖിതനായിരുന്നിട്ടും സ്വയം പരിക്കേറ്റിട്ടു കൂടിയും തിരുനബി രക്തസാക്ഷികളുടെ കുടുംബങ്ങളെ ആശ്വസിപ്പിക്കുന്നതിലാണ് കൂടുതൽ ശ്രദ്ധാലുവായിരുന്നത്. ഉഹുദ് യുദ്ധത്തിൽ രക്തസാക്ഷിയായ ഒരു സഹാബിയുടെ വിധവക്ക് വേണ്ടി നബിതിരുമേനിസ ഇപ്രകാരം പ്രാർത്ഥിച്ചു. ‘അല്ലാഹു നിങ്ങൾക്ക് നിങ്ങളുടെ ഭർത്താവിനേക്കാൾ നല്ല സംരക്ഷകനെ നല്കുമാറാകട്ടെ.’ നബിതിരുമേനിസ മദീനയിലേക്ക് തിരികെ വരുമ്പോഴാണ് കാരുണ്യത്തിന്റെ ഈ സംഭവങ്ങൾ നടന്നത്.

ഖലീഫാ തിരുമനസ്സ് പറയുന്നു, പിതൃസഹോദരന്‍റെയും സഹോദരൻറെയും രക്തസാക്ഷിത്വത്തെക്കുറിച്ച് തിരുനബി(സ) തൻറെ ബന്ധുവായ ഹംന ബിൻത് ജഹ്ശ്(റ)യെ അറിയിച്ചു. ഈ വാർത്ത ലഭിച്ചപ്പോൾ, അവർ വളരെ ക്ഷമയോടെ പറഞ്ഞു, ‘തീർച്ചയായും ഞങ്ങൾ അല്ലാഹുവിൻറേതാണ്, ഞങ്ങൾ അവനിലേക്ക് തന്നെ മടങ്ങുന്നതാണ്. എന്നിട്ട് പറഞ്ഞു അവർ വളരെ മാന്യമായ നിലയിലാണ് മരണം വരിച്ചത്. തിരുനബി(സ) അവരുടെ ഭർത്താവിൻറെ രക്തസാക്ഷിത്വത്തെ കുറിച്ച് അറിയിച്ചപ്പോൾ, അവർക്ക് കരയാതിരിക്കാൻ കഴിഞ്ഞില്ല. അപ്പോൾ നബി (സ) പറഞ്ഞു: ഭാര്യാഭർത്താക്കന്മാർ തമ്മിലുള്ള ഗഹനമായ ബന്ധം നോക്കുക. ഇത്തരം സമയങ്ങളിൽ, ഒരു സ്ത്രീക്ക് അവളുടെ രക്തബന്ധുക്കളുടെ നഷ്ടം സഹിക്കാൻ കഴിയും; എന്നാൽ അവളെ സംബന്ധിച്ചിടത്തോളം ഭർത്താവിനോടുള്ള അവളുടെ സ്നേഹബന്ധത്തെ കവിയുന്ന മറ്റൊന്നില്ല.

ഖലീഫാ തിരുമനസ്സ് പറയുന്നു, ഭർത്താക്കന്മാർ ഭാര്യമാരോട് ക്രൂരത കാണിക്കുന്നതിനുപകരം അവരോട് സ്നേഹത്തോടെയും കരുണയോടെയും പെരുമാറാനുള്ള ഒരു പാഠമാണിത്.

തിരുനബി(സ)യുടെ ഈ വാക്കുകൾ ഒരു വ്യക്തിക്ക് വേണ്ടി മാത്രമുള്ളതല്ല; പകരം, എല്ലാവർക്കും ഉള്ള ഒരു പാഠമാണ്. എന്തിനാണ് ഇങ്ങനെ ദുഃഖം പ്രകടിപ്പിച്ചത് എന്ന് തിരുനബി(സ) ചോദിച്ചപ്പോൾ, തന്റെ മക്കളെ ആരു സംരക്ഷിക്കും എന്ന കാര്യത്തിൽ തനിക്ക് ആശങ്കയുണ്ടെന്ന് അവർ മറുപടി പറഞ്ഞു. അപ്പോൾ ദൈവം അദ്ദേഹത്തെക്കാൾ മികച്ച രക്ഷാധികാരിയായി മാറുന്ന ഒരു വ്യക്തിയെ അവർക്ക് നല്കട്ടെ എന്ന് തിരുനബി(സ) പ്രാർഥിച്ചു: ഹംന(റ) ഹദ്‌റത്ത് ത്വൽഹ(റ)യെ വിവാഹം കഴിച്ചപ്പോൾ ഈ വാക്കുകൾ പൂർത്തീകരിക്കപ്പെട്ടു. തൻറെ കുട്ടികളേക്കാൾ നന്നായി അദ്ദേഹം അവളുടെ കുട്ടികളോട് പെരുമാറിയതായി രേഖപ്പെടുത്തിയിട്ടുണ്ട്.