ദൈവത്തിലുള്ള അചഞ്ചലമായ തവക്കുൽ: നബി തിരുമേനി(സ)യുടെ മാതൃക

മക്കയിൽ നിന്ന് മദീനയിലേക്ക് ഹിജ്റ പോയ സമയത്തും തിരുനബി ﷺ  ദൈവത്തിലുള്ള വലിയ വിശ്വാസം പ്രകടിപ്പിച്ചതായി അവിടുന്ന് പറഞ്ഞു. ഹദ്‌റത്ത് അലി(റ) യോട് തന്‍റെ സ്ഥാനത്ത് ഉറങ്ങാൻ നിർദ്ദേശിച്ചപ്പോൾ, ശത്രുവിന് തന്‍റെ തലയിലെ ഒരു മുടിക്ക് പോലും കേടുപാടുകൾ വരുത്താൻ കഴിയില്ലെന്ന് തിരുനബി ﷺ  ഉറപ്പുനൽകി. കൊലപ്പെടുത്താൻ തയ്യാറായ ആളുകളാൽ അവിടുത്തെ വീട് ചുറ്റപ്പെട്ടപ്പോഴും തിരുനബി ﷺ  ദൈവത്തിൽ പൂർണ്ണ വിശ്വാസമർപ്പിക്കുകയും ആരുടെയും ശ്രദ്ധയിൽപ്പെടാതെ നടന്നുപോവുകയും ചെയ്തു. സൗർ ഗുഹയിൽ എത്തിയപ്പോൾ, വിദഗ്ദ്ധരായ ട്രാക്കർമാർ അവിടുത്തെ പിന്തുടർന്നു. അവരിൽ ഒരാൾ ഗുഹയുടെ മുഖത്തെത്തി, മുഹമ്മദ് (ﷺ) എവിടെയെങ്കിലും ഉണ്ടെങ്കിൽ അത് ഈ ഗുഹയിലായിരിക്കുമെന്ന് പറഞ്ഞു. ആരെങ്കിലും ആഗ്രഹിച്ചിരുന്നെങ്കിൽ തിരുനബി ﷺ  യഥാർത്ഥത്തിൽ അവിടെയുണ്ടോ എന്ന് നോക്കാൻ ഗുഹയ്ക്കുള്ളിലേക്ക് എളുപ്പത്തിൽ നോക്കാമായിരുന്നു. എന്നിരുന്നാലും ആ സന്ദർഭത്തിൽ പോലും തിരുനബി ﷺ  അല്പം പോലും വിഷമിച്ചില്ല. വിഷമം പ്രകടിപ്പിക്കുന്നതിന് പകരം, തിരുനബി ﷺ  തന്‍റെ സഹാബിയായ ഹദ്‌റത്ത് അബൂബക്കർ (റ) നോട് പറഞ്ഞു: ഗുഹയിൽ നാം രണ്ടുപേർ മാത്രമല്ല ഉള്ളത്, മറിച്ച് മൂന്നാമതൊരാൾ, അതായത് അല്ലാഹുവും കൂടെയുണ്ട്.

വാഗ്ദത്ത മസീഹ്(അ) എഴുതുന്നു.

“അബൂബക്കർ സിദ്ദീഖ് (റ) ന്‍റെ സത്യസന്ധതയും ആത്മാർത്ഥതയും വെളിച്ചത്തുവന്നത് അവിടുത്തേക്ക് ചുറ്റും തീ ആളിക്കത്തിയ സമയത്താണ്, അതായത് തിരുനബി ﷺ യെ അക്രമികൾ വളഞ്ഞ സമയത്ത്. തിരുനബി ﷺ യെ മക്കയിൽ നിന്ന് പുറത്താക്കുക മാത്രമാണ് ചെയ്യേണ്ടതെന്ന് ചിലർ അഭിപ്രായപ്പെട്ടെങ്കിലും, ഭൂരിഭാഗം പേരും അവിടുത്തെ ജീവൻ അവസാനിപ്പിക്കാനാണ് ശ്രമിച്ചത്. ആ ഘട്ടത്തിലാണ് ഹദ്‌റത്ത് അബൂബക്കർ സിദ്ദീഖ്(റ) തന്‍റെ ആത്മാർത്ഥതയും വിശ്വസ്തതയും പ്രകടിപ്പിച്ചത്, അത് അന്ത്യനാൾ വരെ ഒരു മാതൃകയായി ശോഭിക്കും. ഈ കഠിനമായ സമയത്ത് ഹദ്‌റത്ത് അബൂബക്കർ സിദ്ദീഖ് (റ) ന്‍റെ ഉന്നതവും പരമവുമായ വിശ്വസ്തതയ്ക്കുള്ള ശക്തമായ തെളിവാണ് തിരുനബി ﷺ അദ്ദേഹത്തെ തിരഞ്ഞെടുത്തത് തന്നെ.. ആ സമയത്ത് തിരുനബി ﷺ ക്ക് എഴുപതോ എൺപതോ സഹാബികൾ ഉണ്ടായിരുന്നു, ഹദ്‌റത്ത് അലി(റ) പോലും അവിടുത്തോടൊപ്പം ഉണ്ടായിരുന്നു, എന്നാൽ ഈ സഹാബികളിൽ നിന്നെല്ലാം തിരുനബി ﷺ  ഹദ്‌റത്ത് അബൂബക്കറിനെയല്ലാതെ(റ) വേറെ ആരെയും തിരഞ്ഞടുത്തില്ല. ഇതിലെ രഹസ്യം എന്താണ്? ഒരു പ്രവാചകൻ അല്ലാഹു തആലയുടെ കണ്ണിലൂടെയാണ് കാണുന്നത്, അവിടുത്തെ ഉൾക്കാഴ്ച അല്ലാഹു തആലയിൽ നിന്നാണ് വരുന്നത്. അതിനാൽ ഈ ദൗത്യത്തിന് ഏറ്റവും അനുയോജ്യനായ വ്യക്തി ഹദ്‌റത്ത് അബൂബക്കർ സിദ്ദീഖ്(റ) ആണെന്ന് ദർശനത്തിലൂടെയും വഹിയിലൂടെയും അല്ലാഹു തിരുനബി ﷺ യെ അറിയിച്ചിരുന്നു.

“ഈ വിഷമകരമായ സമയത്ത് ഹദ്‌റത്ത് അബൂബക്കർ(റ) തിരുനബി ﷺ യെ അനുഗമിച്ചു. ഇത് കഠിനമായ പരീക്ഷണത്തിന്‍റെ സമയമായിരുന്നു. ഈസാ നബി(അ) ന് സമാനമായ ഒരു സന്ദർഭം വന്നപ്പോൾ, അദ്ദേഹത്തിന്‍റെ ശിഷ്യന്മാർ അദ്ദേഹത്തെ ഉപേക്ഷിച്ച് ഓടിപ്പോയി, അവരിൽ ഒരാൾ അദ്ദേഹത്തെ  ശപിക്കുകയും ചെയ്തു. എന്നാൽ തിരുനബി ﷺ യുടെ വിശിഷ്ടരായ ഓരോ സഹാബികളും പൂർണ്ണ വിശ്വസ്തത പ്രകടിപ്പിച്ചു. അതിനാൽ ഹദ്‌റത്ത് അബൂബക്കർ സിദ്ദീഖ്(റ) തിരുനബി ﷺ യോടൊപ്പം ഉറച്ചുനിൽക്കുകയും അവിടുത്തേക്ക് പൂർണ്ണ പിന്തുണ നൽകുകയും ചെയ്തു, അവർ സൗർ എന്ന് അറിയപ്പെടുന്ന ഗുഹയിൽ എത്തിയപ്പോൾ ഇരുവരും ഗുഹയിൽ അഭയം പ്രാപിച്ചു. തിരുനബി ﷺ യെ ഉപദ്രവിക്കാൻ ഗൂഢാലോചന നടത്തിയ ദുഷ്ടരായ സത്യനിഷേധികൾ തിരച്ചിലിനിടയിൽ ഈ ഗുഹയിലേക്ക് നയിക്കപ്പെട്ടു. ഹദ്‌റത്ത് അബൂബക്കർ സിദ്ദീഖ്(റ) തിരുനബി ﷺ യോട് അപേക്ഷിച്ചു: ‘ഇപ്പോൾ ഈ ആളുകൾ നമ്മുടെ മേലിലുണ്ട്, അവരിൽ ആരെങ്കിലും താഴേക്ക് അല്പം നോക്കിയാൽ അവർക്ക് നമ്മളെ കാണാൻ കഴിയും, നമ്മൾ പിടിക്കപ്പെടും.’ ആ സമയത്ത് തിരുനബി ﷺ  പറഞ്ഞു: ‘അല്പം പോലും ഭയപ്പെടേണ്ട, അല്ലാഹു നമ്മോടൊപ്പമുണ്ട്.’ ഈ വാക്കുകളെക്കുറിച്ച് ചിന്തിക്കുക. തിരുനബി ﷺ  ഹദ്‌റത്ത് അബൂബക്കർ സിദ്ദീഖ് (റ) നെ തന്നോട് ചേർത്തുനിർത്തുകയും പ്രസ്താവിക്കുകയും ചെയ്യുന്നു: തീർച്ചയായും അല്ലാഹു നമ്മോടൊപ്പമുണ്ട്.

“മഅനാ (معنا) എന്ന അറബി പദം രണ്ടുപേരെയും പരാമർശിക്കുന്നു, അതായത് ‘നിങ്ങളോടും എന്നോടും ഒപ്പം’. അല്ലാഹു തആലാ തിരുനബി ﷺ യെ ഒരു വശത്തും ഹദ്‌റത്ത് അബൂബക്കർ സിദ്ദീഖ് (റ) നെ മറു വശത്തും നിർത്തി. ആ സമയത്ത് രണ്ടുപേരും പരീക്ഷണ ഘട്ടത്തിലായിരുന്നു. കാരണം ഈ സമയത്താണ് ഇസ്‌ലാമിന്‍റെ അടിത്തറ സുരക്ഷിതമാക്കപ്പെടുകയോ അല്ലെങ്കിൽ അവസാനിപ്പിക്കപ്പെടുകയോ ചെയ്യാൻ പോകുന്നത്.

“ഗുഹയുടെ വാതിൽക്കൽ ശത്രുക്കൾ നിലയുറപ്പിച്ചു, വിവിധ അഭിപ്രായങ്ങൾ ഉയർന്നു വന്നു. ഗുഹയിൽ തിരച്ചിൽ നടത്തണമെന്ന് ചിലർ പറഞ്ഞു, കാരണം കാൽപ്പാടുകൾ ഗുഹയിൽ അവസാനിച്ചിരിക്കുന്നു, എന്നാൽ ഇവിടെക്കൂടി ഒരാൾ കടന്നുപോയി ഗുഹയിൽ പ്രവേശിക്കുക അസാധ്യമാണെന്ന് മറ്റുചിലർ ചൂണ്ടിക്കാണിച്ചു, കാരണം ഗുഹയുടെ കവാടത്തിൽ ഒരു ചിലന്തി വല നെയ്യുകയും ഒരു പ്രാവും മുട്ടയിടുകയും ചെയ്തിട്ടുണ്ട്. ഈ ചർച്ചകൾ ഗുഹയ്ക്കുള്ളിൽ നിന്ന് കേൾക്കാമായിരുന്നു, തിരുനബി ﷺ ക്കും അത് വ്യക്തമായി കേൾക്കാമായിരുന്നു. ഈ അവസ്ഥയിൽ ഇരുവരെയും കൊലപ്പെടുത്താൻ ശത്രുക്കൾ എത്തുകയും തങ്ങളുടെ ദൗത്യം പൂർത്തിയാക്കാൻ വീര്യത്തോടെ ഇറങ്ങിപ്പുറപ്പെടുകയും ചെയ്തു, എന്നാൽ തന്‍റെ യഥാർത്ഥ സുഹൃത്തിനോട് ഇപ്രകാരം പറയുന്ന തിരുനബി ﷺ യുടെ അത്ഭുതകരമായ ധൈര്യം നിരീക്ഷിക്കുക:

“‘വ്യസനിക്കേണ്ട, അല്ലാഹു നമ്മോടൊപ്പമുണ്ട്.’ ഈ വാക്കുകൾ തിരുനബി ﷺ  തന്‍റെ നാവുകൊണ്ട് പറഞ്ഞതാണെന്ന് വ്യക്തമായി തെളിയുന്നു, കാരണം ഇത്തരം വാക്കുകൾ ആംഗ്യഭാഷയിലൂടെയല്ല ശബ്ദത്തിലൂടെ മാത്രമേ പ്രകടിപ്പിക്കാൻ കഴിയൂ. ശത്രുക്കൾ പുറത്തുനിന്ന് തങ്ങൾക്കിടയിൽ കൂടിയാലോചിക്കുകയായിരുന്നു, ഗുഹയ്ക്കുള്ളിൽ സേവകനും യജമാനനും സംഭാഷണത്തിൽ ഏർപ്പെട്ടിരിക്കുകയായിരുന്നു. ശത്രു തന്‍റെ ശബ്ദം കേൾക്കുമെന്ന യാതൊരു ആശങ്കയും തിരുനബി ﷺ ക്ക് ഉണ്ടായിരുന്നില്ല, ഇത് അവിടുത്തെ അത്ഭുതകരമായ വിശ്വാസത്തിന്‍റെയും മഅരിഫത്തിന്‍റെയും തെളിവാണ്. അല്ലാഹുവിന്‍റെ വാഗ്ദാനങ്ങളിൽ അവിടുത്തേക്ക് പൂർണ്ണ വിശ്വാസമുണ്ടായിരുന്നു എന്ന് ഇത് കാണിക്കുന്നു.”

ഭാവിയിൽ ഈ സംഭവങ്ങൾ വിവരിക്കുന്നത് തുടരുമെന്ന് ഹുദൂർ തിരുമനസ്സ് പറഞ്ഞു.