“അതിൽ മലക്കുകളും ആ പരിപൂര്‍ണാത്മാവും തങ്ങളുടെ നാഥന്‍റെ അനുമതിയോടെ സകല കല്പനകളും കൊണ്ട് ഇറങ്ങുന്നതാണ്.അത് തികച്ചും സമാധാനമാകുന്നു. പ്രഭാതോദയം വരെ.”^[3]

മലക്കുകളുടെ ഇറക്കം അധികമായി സംഭവിക്കുക എന്നത് ലൈലത്തുൽ ഖദ്റിന്‍റെ ഒരു സവിശേഷതയാണെന്ന് മേൽ ഖുര്‍ആൻ വചനം സൂചിപ്പിക്കുന്നു. ഒരു ദൈവദൂതന്‍റെ അവതരണ കാലഘട്ടമാണ് ലൈലത്തുൽ ഖദ്ർ കൊണ്ടുള്ള പ്രഥമ വിവക്ഷ എന്ന് വ്യക്തമാക്കിക്കഴിഞ്ഞു. ആ ദൈവദൂതന്‍റെ സഹായികളായി അദ്ദേഹത്തോടൊപ്പം ധാരാളം മലക്കുകൾ ഇറങ്ങുന്നു എന്ന വസ്തുതയിലേക്കാണ് പ്രസ്തുത വചനം വിരൽ ചൂണ്ടുന്നത്.

യഥാര്‍ഥത്തിൽ പ്രവാചകന്മാർ ലോകത്ത് കൊണ്ടുവരുന്ന ആത്മീയവിപ്ലവത്തില്‍ മലക്കുകളുടെ ഈ ഇറക്കം വലിയ പങ്ക് വഹിക്കുന്നുണ്ട്.

ദൈവദൂതരുടെ കൂടെ ഇറങ്ങുന്ന മലക്കുകൾ യോഗ്യരായ ജനങ്ങളുടെ ഹൃദയത്തിലേക്ക് പ്രവേശിക്കുകയും, സാധാരണ കാലഘട്ടത്തിൽ നിന്ന് വ്യത്യസ്തമായി ആ ഹൃദയങ്ങള്‍ക്ക് പരിവര്‍ത്തനം സംഭവിക്കുകയും, അവർ ദൈവദൂതനാൽ ആകര്‍ഷിക്കപ്പെടുകയും ചെയ്യുന്നു.

പ്രവാചകന്മാര്‍ക്ക് പുറമെ, ആത്മീയ പരിഷ്കര്‍ത്താക്കളും, വലിയ്യുമാരും, മലക്കുകളുടെ സാന്നിധ്യത്താൽ സജ്ജനങ്ങളെ ആകര്‍ഷിക്കുന്നു. ഇത്തരത്തിൽ, മലക്കുകളുടെ ഇറക്കവും പ്രഭാവവും മൂലം ദൈവീക മതത്തിന്‍റെ സത്യതയും സ്വീകാര്യതയും വര്‍ധിക്കുകയും, അപ്രകാരം ധാരാളം മനുഷ്യാത്മാക്കൾ സത്യമതത്തിന്‍റെ സ്വാധീനവലയത്തിലാകുകയും ചെയ്യുന്നു. എങ്കിലും, ആത്മീയ വ്യക്തികളുടെ പദവികള്‍ക്കനുസരിച്ച് മലക്കുകളുടെ സാന്നിധ്യത്തിലും പ്രഭാവത്തിലും വ്യത്യാസമുണ്ടാകുന്നു. അതുകൊണ്ടുതന്നെ, ഏറ്റവുമധികം ഹൃദയ പരിവര്‍ത്തനം നടത്തപ്പെടുകയും ആത്മീയവിപ്ലവം സംഭവ്യമാകുകയും ചെയ്യുന്നത് പ്രവാചകന്മാരിലൂടെയാണ്.

പ്രവാചകരുടെയും മറ്റു ആത്മീയ പുരുഷന്മാരുടെയും നിയോഗകാലത്ത് മലക്കുകൾ മുഖാന്തിരം സംഭവിക്കുന്ന ഇത്തരം പരിവര്‍ത്തനങ്ങളെക്കുറിച്ച് വാഗ്ദത്ത മസീഹ്(അ) പറയുന്നു:

“മലക്കുകൾ ഇറങ്ങിയെന്നു പറയുന്നതിന്‍റെ പൊരുളെന്തെന്നു മനസ്സിലാക്കാതെ അജ്ഞരായ ചിലർ അമ്പരക്കുന്നുണ്ടാവാം. മനുഷ്യരുടെ സമുദ്ധാരണാര്‍ഥം ഏതെങ്കിലും റസൂലോ നബിയോ മുഹദ്ദസോ ആകാശത്തിൽ നിന്ന് ഇറങ്ങുമ്പോൾ അതോടൊപ്പം സഹയാത്രികരായി യോഗ്യതയുളള ഹൃദയങ്ങളിൽ പ്രവേശിച്ചു മാര്‍ഗനിര്‍ദേശം നല്കുകയും നന്മക്കു പ്രചോദനം ഉണ്ടാക്കുകയും ചെയ്യുന്ന അത്തരം മാലാഖമാർ ഇറങ്ങിക്കൊണ്ടിരിക്കും എന്നത് അല്ലാഹു അനുവര്‍ത്തിച്ചുവന്നിട്ടുളള പ്രവര്‍ത്തനശൈലി തന്നെയാണെന്നു വ്യക്തമാക്കിക്കൊളളട്ടെ. അവിശ്വാസവും അധര്‍മവും അകന്നു സത്യവിശ്വാസത്തിന്‍റെയും സന്മാര്‍ഗത്തിന്‍റെയും പ്രഭാതം പൊട്ടിവിരിയുന്നതുവരെ ഈ മലക്കുകളുടെ ഇറക്കം തുടര്‍ന്നുകൊണ്ടിരിക്കുന്നതാണ്.”^[4]

അഥവാ, ആ കാലഘട്ടത്തിൽ മലക്കുകൾ ഇറങ്ങുന്ന കാരണം ജനങ്ങളുടെ ഹൃദയങ്ങളിൽ പ്രകാശപ്പൊലിമ ഉണ്ടാകുകയും സദ്‌വിചാരങ്ങൾ ഉടലെടുക്കുകയും ചെയ്യുന്നു. നാനാഭാഗത്തും നന്മയുടെ കാറ്റ് ശക്തമായി വീശുകയും, ലോകർ കൂട്ടം കൂട്ടമായി സത്യമതത്തിലേക്ക് ആകര്‍ഷിക്കപ്പെടുകയും, തിന്മകള്‍ക്ക് ശോഷണവും നന്മകള്‍ക്ക് പ്രസരിപ്പും അനുഭവപ്പെടുകയും ചെയ്യുന്നു. എന്നാൽ അജ്ഞരായ ജനം ഈ പരിവര്‍ത്തനത്തിന്‍റെ കാരണം മനസ്സിലാക്കാൻ സാധിക്കാതെ അമ്പരന്ന് നില്ക്കുന്നു. യഥാര്‍ഥത്തിൽ ഈ പരിവര്‍ത്തനമെല്ലാം ആ ദൈവനിയോഗിതന്‍റെ കൂടെ ആകാശത്തു നിന്നിറങ്ങിയ മലക്കുകളുടെ പ്രവൃത്തിഫലമാണ്.

ഈ അസാമാന്യമായ ആത്മീയ പരിവര്‍ത്തനത്തിന് പുറമെ പ്രവാചകന്മാര്‍ക്ക് മലക്കുകൾ മുഖേന അത്ഭുതകരമായ ഭൗതിക സഹായങ്ങളും ലഭിക്കുന്നു.

ഇതിന്‍റെ ഒരു പ്രത്യക്ഷ ഉദാഹരണമായിരുന്നു ബദ്ർ യുദ്ധത്തിലെ സംഭവങ്ങൾ. കേവലം 313 പേരടങ്ങുന്ന, ഭൗതികമായ കാഴ്ചപ്പാടിൽ ബലഹീനരായി ഗണിക്കപ്പെട്ട, കാര്യമായ ആയുധബലമില്ലാത്ത വിശ്വാസിസംഘം സര്‍വസജ്ജരായ 1000 പേരടങ്ങുന്ന ശത്രുസംഘത്തെ ജയിച്ചടക്കുകയുണ്ടായി. ഇവിടെയും വിശ്വാസികള്‍ക്ക് സഹായകമായ ഘടകം മലക്കുകളുടെ സാന്നിധ്യമായിരുന്നു. ബദ്ർ യുദ്ധം കൂടാതെ, നബി തിരുമേനി(സ)യുടെ മുഴു വിജയങ്ങളിലും അല്ലാഹു തന്‍റെ മലക്കുകളെ സഹായത്തിനായി അയക്കുകയായിരുന്നു. കേവലം 23 വര്‍ഷങ്ങൾ കൊണ്ട് സംഭവിച്ച ഇസ്‌ലാമിന്‍റെ മഹാവിജയ ചരിത്രത്തെ അതുകൊണ്ടുതന്നെ അതുല്യമെന്നേ വിശേഷിപ്പിക്കാൻ സാധിക്കുകയുളളൂ.