ബഹുമാനത്തിന്‍റെ അഭാവം ബന്ധങ്ങളെയും സമൂഹങ്ങളെയും ദുർബലമാക്കുന്നു. പലപ്പോഴും ബഹുമാനം എന്നത് സ്വന്തം ആളുകളോട് മാത്രം കാണിക്കേണ്ട ഒരു മൂല്യമായി ഒതുങ്ങിപ്പോകാറുണ്ട്. അന്യരെ ആദരിക്കേണ്ടത് പൊതുവില്‍ അനിവാര്യമായി കണക്കാക്കപ്പെടുന്നില്ല. എന്നാല്‍, പ്രവാചകൻ മുഹമ്മദ്‌(സ) ബഹുമാനത്തെ സാര്‍വത്രികമായൊരു മൂല്യമായാണ് പരിചയപ്പെടുത്തുന്നത്. അദ്ദേഹം പറയുന്നു:

“ഏതെങ്കിലും ജനതയിലെ ബഹുമാന്യനായ വ്യക്തി നിങ്ങളുടെ അടുക്കൽ വരുമ്പോൾ, അദ്ദേഹത്തെ ആദരിക്കുക.”^[5]

ഈ ആദരവ് മറ്റ് മതസ്ഥരോടും കാണിക്കണമെന്ന പാഠമാണ് നബി തിരുമേനി(സ) നല്കുന്നത്. എത്രത്തോളമെന്നാല്‍, ബഹുദൈവാരാധകര്‍ അല്ലാഹുവിനെ കൂടാതെ വിളിക്കുന്നവരെപ്പോലും അപമാനിക്കരുതെന്ന പാഠമാണ് വിശുദ്ധ ഖുര്‍ആന്‍ നല്കുന്നത്. സ്രഷ്ടാവായ ഒരു ദൈവത്തിന് പുറമെ മറ്റു ദൈവങ്ങള്‍ ഉണ്ടെന്ന ആശയത്തെ യുക്തിപരമായി ചോദ്യം ചെയ്യുമ്പോഴും, മറ്റുള്ളവരുടെ ആരാധനാപാത്രങ്ങളെ നിന്ദിക്കരുതെന്ന സന്ദേശം ഇസ്‌ലാം നല്കുന്നു.

ഈ സാര്‍വത്രിക ബഹുമാനം നബി തിരുമേനി(സ)യുടെ ജീവിതത്തിലുടനീളം പ്രതിഫലിക്കുന്നതായി നമുക്ക് കാണാവുന്നതാണ്. ഒരിക്കല്‍ ഒരു ജൂതന്‍റെ മൃതദേഹവുമായി ആളുകള്‍ കടന്ന് പോയപ്പോള്‍ അതിനോടുള്ള ബഹുമാനസൂചകമായി പ്രവാചകന്‍(സ) എഴുന്നേറ്റുനില്ക്കുകയുണ്ടായി. സഹാബികൾ അത് ഒരു ജൂതന്‍റെ മൃതദേഹമാണെന്ന് പറഞ്ഞപ്പോൾ, നബി തിരുമേനി(സ) ചോദിച്ചു: “അതും ഒരു മനുഷ്യാത്മാവായിരുന്നില്ലേ?”^[7]

തന്നെ എതിര്‍ത്തവരോട് പോലും ഇത്തരം ബഹുമാനം കാണിക്കുന്നതിലൂടെ, ആദരവ് സര്‍വമനുഷ്യരുടേയും അവകാശമാണെന്ന കാലാതീതമായ അധ്യാപനമാണ് പ്രവാചകന്‍(സ) പ്രദാനം ചെയ്തത്. ഇന്നത്തെ ശിഥിലമായ സമൂഹങ്ങളിൽ, ഭിന്നതകൾക്കതീതമായ ബഹുമാനം സമാധാനത്തിനും സഹവർത്തിത്വത്തിനും അത്യന്താപേക്ഷിതമാണ്.