(യുകെയിലെ) ജനസംഖ്യയിലെ വലിയൊരു വിഭാഗവും മുസ്‌ലിം കുടിയേറ്റക്കാരോട് തെറ്റായ മനോഭാവം വെച്ച് പുലർത്തുന്നവരാണെന്ന് തെളിയിക്കുന്ന യുകെയിൽ സംഘടിപ്പിക്കപ്പെട്ട ഒരു സർവേയെ പറ്റി ഖലീഫാ തിരുമനസ്സ് പരാമർശിക്കുകയുണ്ടായി. ഇസ്‌ലാമികാധ്യാപനങ്ങൾ പരുഷമാണെന്ന ചിന്തയാണ് ഇതിന് മുഖ്യകാരണം. ഇത്തരം വികലമായ വ്യാഖ്യാനങ്ങൾ പ്രചരിപ്പിക്കുന്ന ചില നാമമാത്ര (ഇസ്‌ലാമിക) പണ്ഡിതന്മാരാണ് ഈ അഭിപ്രായത്തിന് പിന്നിൽ.

ഇത്തരത്തിൽ ഇസ്‌ലാമിനെ തെറ്റായി ചിത്രീകരിക്കുന്നതിൽ വാഗ്ദത്ത മസീഹ്(അ) അഗാധമായ ഉത്കണ്ഠ രേഖപ്പെടുത്തുകയും, ഇസ്‌ലാമിന്‍റെ യഥാർഥവും മനോഹരവുമായ അധ്യാപനങ്ങൾ പ്രചരിപ്പിക്കേണ്ടതിന്‍റെ അടിയന്തരമായ ആവശ്യകതയെക്കുറിച്ച് ഊന്നിപ്പറയുകയും ചെയ്‌തിട്ടുണ്ട്. ഈയൊരു ഉദ്ദേശ്യത്തിന് വേണ്ടിയാണ് ദൈവത്താൽ നിയോഗിക്കപ്പെട്ട ഒരു പരിഷ്കർത്താവിനെ  ആവശ്യമായി വന്നത് തന്നെ. ഹദ്റത്ത് അഹ്‌മദ്‌(അ) പറയുന്നു:

“അതിനാൽ സഹോദരങ്ങളേ! അന്ധകാരം വ്യാപിക്കുന്ന വേളയിൽ ആകാശത്ത് നിന്ന് പ്രകാശം ഇറങ്ങിവരേണ്ടത് അത്യാവശ്യമാണ്. തന്‍റെ ഗ്രന്ഥവും പ്രവാചകനും ലൈലത്തുൽ ഖദ്‌റിലാണ് [വിധിനിർണ്ണയ രാവിൽ] ആകാശത്ത് നിന്ന് ഇറക്കപ്പെട്ടത് എന്ന് സൂറ അൽ ഖദ്‌റിൽ സർവശക്തനായ ദൈവം പറയുന്നതായി, അഥവാ വിശ്വാസികൾക്ക് സുവാർത്ത നല്കുന്നതായി ഞാൻ ഈ ലേഖനത്തിൽ തന്നെ പരാമർശിച്ചതാണ്. സർവശക്തനായ ദൈവത്തിൽ നിന്ന് വരുന്ന എല്ലാ മുസ്‍ലിഹീങ്ങളും മുജദ്ദിദീങ്ങളും നിശ്ചയമായും ലൈലത്തുൽ ഖദ്‌റിലാണ് അവഗമിക്കുന്നത്.

“ലൈലത്തുൽ ഖദ്ർ എന്നാൽ എന്താണെന്ന് നിങ്ങൾക്കറിയുമോ? ഏതൊരു കാലഘട്ടത്തിൽ അന്ധകാരം അതിന്‍റെ പാരമ്യത്തിൽ എത്തുന്നുവോ, അതിന്‍റെ പേരാണ് ലൈലത്തുൽ ഖദ്ർ. അതുകൊണ്ടുതന്നെ, ആ ഇരുട്ടിനെ നീക്കം ചെയ്യാന്‍ ഒരു പ്രകാശം ഇറങ്ങിവരേണ്ടത് ആ കാലഘട്ടത്തിന്‍റെ അനിവാര്യതയായി മാറുന്നു. ആ കാലഘട്ടത്തെ ആലങ്കാരികമായി ‘ലൈലത്തുല്‍ ഖദ്‌ര്‍’ എന്ന് വിളിക്കുന്നുവെങ്കിലും യഥാർഥത്തിൽ ഇതൊരു രാത്രിയല്ല. മറിച്ച്, ഇരുട്ടിന്‍റെ ആധിക്യത്താൽ രാത്രിയോട് സാമ്യം പുലർത്തുന്ന ഒരു യുഗമാണത്.

“ആയിരം വർഷം കടന്നുകഴിയുമ്പോൾ, ഒരു പ്രവാചകന്‍റെയോ അദ്ദേഹത്തിന്‍റെ ആത്മീയമായ പിൻഗാമിയുടെയോ വിയോഗശേഷം മനുഷ്യായുസ്സ് അതിന്‍റെ അന്ത്യത്തോടടുക്കുകയും മനുഷ്യേന്ദ്രിയങ്ങളുടെ ശക്തി ക്ഷയിച്ചുതുടങ്ങുകയും ചെയ്യുമ്പോൾ ആ ‘രാത്രി’ സ്വയം വെളിപ്പെടുമാറാകുന്നു. തുടർന്ന് പുതിയൊരു നൂറ്റാണ്ടിന്‍റെ പുലരിയിൽ പ്രത്യക്ഷപ്പെടുന്നതിനായി ഒന്നോ അതിലധികമോ പരിഷ്കർത്താക്കളുടെ ബീജം സ്വർഗീയ ക്രമീകരണങ്ങളാൽ രഹസ്യമായി വിതക്കപ്പെടുന്നു. ഇത് പരാമർശിച്ചു കൊണ്ട് അല്ലാഹു പറയുന്നു:

“‘വിധിനിർണ്ണയരാവ് എന്നത് ആയിരം മാസങ്ങളേക്കാൾ മികച്ചതാണ്.’ (സൂറ അൽ ഖദ്ർ, 4)

“അതായത്: ഈ ലൈലത്തുല്‍ ഖദ്‌റിന്‍റെ പ്രകാശം ദർശിക്കുകയും കാലത്തിന്‍റെ പരിഷ്കർത്താവിന്‍റെ സാമീപ്യത്തിന് ഭാഗ്യം സിദ്ധിക്കുകയും ചെയ്യുന്നവൻ, ആ മഹനീയ കാലഘട്ടം അനുഭവിക്കാന്‍ അവസരം ലഭിക്കാത്ത എൺപത് വയസ്സായ ഒരു വയോധികനെക്കാൾ ഉത്തമനാണ്. അയാൾക്ക് (വയോധികന്) ആ കാലഘട്ടത്തിലെ ഒരു നിമിഷമെങ്കിലും അനുഭവിക്കാൻ സാധിച്ചിരുന്നെങ്കിൽ, താൻ പിന്നിട്ട ആയിരം മാസങ്ങളെക്കാൾ ആ നിമിഷം അയാൾക്ക് ശ്രേഷ്ഠകരമായേനെ.

“എന്തുകൊണ്ടാണ് അത് ശ്രേഷ്ഠമാകുന്നത്? കാരണം, ഈ ലൈലത്തുല്‍ ഖദ്‌റില്‍ സർവശക്തനായ ദൈവത്തിന്‍റെ മലക്കുകളും പരിശുദ്ധാത്മാവും പ്രതാപവാനായ റബ്ബിന്‍റെ കല്പനയാൽ ആ പരിഷ്കർത്താവിനോടൊപ്പം ആകാശത്തുനിന്ന് ഇറങ്ങുന്നു. അതൊരിക്കലും വ്യർഥമായല്ല. മറിച്ച്, യോഗ്യരും സത്യാന്വേഷികളുമായ ആളുകളുടെ ഹൃദയങ്ങളിൽ അവതരിക്കുന്നതിനും, സമാധാനത്തിന്‍റെ പാതകൾ തുറക്കപ്പെടുന്നതിനും വേണ്ടിയാണത്. അങ്ങനെ, അശ്രദ്ധയുടെ ഇരുട്ട് നീങ്ങി സന്മാർഗ്ഗത്തിന്‍റെ പൊൻപുലരി വിടരും വരെ സർവവഴികളും തുറക്കാനും സകല മറകളും നീക്കം ചെയ്യാനും അവർ അശ്രാന്തം പരിശ്രമിച്ചുകൊണ്ടിരിക്കുന്നതുമാണ്.

“അല്ലയോ മുസ്‌ലിങ്ങളെ! ഈ വചനങ്ങൾ ശ്രദ്ധാപൂർവം വായിക്കുക. അവശ്യഘട്ടത്തിൽ ലോകത്തിലേക്ക് ഒരു പരിഷ്കർത്താവിനെ അയക്കുന്ന ആ കാലഘട്ടത്തെ അല്ലാഹു എത്രമാത്രമാണ് പ്രശംസിച്ചിരിക്കുന്നതെന്ന് നോക്കുക. ഇത്തരമൊരു കാലഘട്ടത്തെ വിലമതിക്കുന്നതിൽ നിങ്ങൾ പരാജിതരാകുമോ? അല്ലാഹുവിന്‍റെ വചനങ്ങളെ നിങ്ങൾ പുച്ഛത്തോടെ നോക്കിക്കാണുമോ?”

ഇത്തരം ശത്രുതയ്ക്ക് മറുപടിയായി ഖലീഫാ തിരുമനസ്സ് (അഹ്‌മദികൾക്ക്) ഇപ്രകാരം ഉപദേശം നല്കി. അതായത്, എതിരാളികൾ അഹ്‌മദികൾക്കെതിരെ എത്ര നീചമായ ഭാഷ പ്രയോഗിച്ചാലും ഒരിക്കലും തന്നെ അതേ രീതിയിൽ പ്രതികരിക്കരുത്. മറിച്ച് അവർ ഉന്നതമായ ധാർമിക നിലവാരം കാത്തുസൂക്ഷിക്കുകയും ഇസ്‌ലാം അഹ്‌മദിയ്യത്തിന്‍റെ സന്ദേശം അന്തസ്സോടും വിവേകത്തോടും കൂടി പ്രചരിപ്പിക്കുകയുമാണ് ചെയ്യേണ്ടത്.

ഇസ്‌ലാമിനെ പുനരുജ്ജീവിപ്പിക്കുകയും മറ്റെല്ലാ മതങ്ങൾക്കും മേൽ അതിന് വിജയം നല്കുകയുമാണ് തന്‍റെ ദൈവിക ദൗത്യമെന്ന് ഹദ്റത്ത് അഹ്‍മദ്(അ) വ്യക്തമാക്കിയിരിക്കുന്നു. തന്‍റെ ആഗമനത്തെക്കുറിച്ച് പ്രവചിക്കപ്പെട്ട നിരവധി അടയാളങ്ങൾ അദ്ദേഹം വിശദീകരിക്കുകയുണ്ടായി. അതായത് ലോകം ആഗോള സംഘർഷങ്ങളും അശാന്തിയും കൊണ്ട് നിറയുമ്പോഴായിരിക്കും മസീഹും മഹ്ദിയും പ്രത്യക്ഷപ്പെടുക. അതുപോലെത്തന്നെ സൂര്യചന്ദ്രഗ്രഹണങ്ങൾ എന്ന ആകാശീയമായ അടയാളങ്ങളും സംഭവിക്കും, മതങ്ങളുടെ യഥാർഥ പണ്ഡിതന്മാർ ദുർലഭമാകും, ദൈവിക പ്രകാശം മറയ്ക്കപ്പെടും. എങ്കിലും, വാഗ്ദത്ത മസീഹിന്‍റെ(അ) ആഗമനത്തോടുകൂടി തിരുനബി(സ)യുടെ ആത്മീയ പൈതൃകം പുനഃസ്ഥാപിച്ചുകൊണ്ട് ഇസ്‌ലാമിന്‍റെ സത്യപ്രകാശം വീണ്ടും പ്രശോഭിക്കുന്നതാണ്.

ക്രൂരതയും അനീതിയും ഒത്തുചേരുന്ന ഈ കാലഘട്ടത്തിൽ ദൈവനിയോഗിതനായ ഒരു പരിഷ്കർത്താവിന്‍റെ ആഗമനം ഉചിതമാണെന്ന് മാത്രമല്ല അനിവാര്യവുമാണെന്ന് ഖലീഫാ തിരുമനസ്സ് ആവർത്തിച്ച് പറഞ്ഞു. ഇസ്‌ലാമിനെ സംരക്ഷിക്കുന്നതിനും മനുഷ്യരാശിയെ തങ്ങളുടെ സ്രഷ്ടാവിലേക്ക് തിരികെ നയിക്കുന്നതിനും വേണ്ടിയാണ് വാഗ്ദത്ത മസീഹും മഹ്ദിയും അയക്കപ്പെട്ടത് എന്നും അദ്ദേഹം കൂട്ടിച്ചേർത്തു.

വാഗ്ദത്ത മസീഹ്(അ) ഇപ്രകാരം പറയുന്നു:

“’ഇനി, നിന്‍റെ റബ്ബിന്‍റെ അനുഗ്രഹത്തെ സംബന്ധിച്ച് നീ എടുത്തുപറയുക’ (വിശുദ്ധ ഖുർആൻ 93:12) എന്ന വചനത്തിന്‍റെ അടിസ്ഥാനത്തിൽ എന്നെക്കുറിച്ച് എനിക്ക് പറയാനുള്ളത് ഇതാണ്. അതായത്, മേൽപ്രസ്താവിച്ച മൂന്നാമത്തെ ഗണത്തിൽ എന്നെ ഉൾപ്പെടുത്തിക്കൊണ്ട് സർവശക്തനായ ദൈവം എനിക്ക് വലിയൊരു അനുഗ്രഹം നല്കിയിരിക്കുന്നു. അത് എന്‍റെ ഏതെങ്കിലും പ്രയത്നം കൊണ്ടല്ല, മറിച്ച് ഞാൻ എന്‍റെ മാതാവിന്‍റെ ഗർഭാശയത്തിലായിരിക്കുമ്പോൾ തന്നെ അവൻ എനിക്ക് കനിഞ്ഞരുളിയതാണ്.

“എനിക്ക് അനുകൂലമായി അവൻ എത്രമാത്രം ദൃഷ്ടാന്തങ്ങളാണ് കാണിച്ചിട്ടുള്ളതെന്നാൽ ഇന്നുവരെ, അതായത് 1906 ജൂലൈ 16 വരെ അവ ഓരോന്നായി കണക്കാക്കുകയാണെങ്കിൽ അവ മൂന്ന് ലക്ഷത്തിലധികമാണെന്ന് ദൈവനാമത്തിൽ സത്യം ചെയ്തുകൊണ്ട് എനിക്ക് പ്രഖ്യാപിക്കാൻ സാധിക്കും. എന്‍റെ ഈ സത്യപ്രസ്താവനയിൽ ആർക്കെങ്കിലും വിശ്വാസമില്ലെങ്കിൽ, അയാൾക്ക് അതിനുള്ള തെളിവ് നല്കാനും എനിക്ക് സാധിക്കും.