ഖൈബർ യുദ്ധത്തിനു ശേഷമുള്ള സംഭവങ്ങളിൽ, ഹദ്റത്ത് സഫിയ(റ) യുമായുള്ള നബിതിരുമേനി(സ)യുടെ വിവാഹത്തെക്കുറിച്ചും പരാമർശമുണ്ട്. ഖൈബറിലെ ബന്ധികളെ വിതരണം ചെയ്തപ്പോൾ, ഹദ്റത്ത് ദിഹ്‌യ(റ)ക്ക് ഹുയയ് ബിൻ അഖ്തബിന്‍റെ മകളായ സഫിയയെ നൽകി. ഒരു സഹാബി നബിതിരുമേനി(സ)യുടെ അടുത്തെത്തി, യഹൂദ ഗോത്രങ്ങളിൽ അവരുടെ സ്ഥാനവും പദവിയും കാരണം, അങ്ങേയ്ക്കല്ലാതെ മറ്റാർക്കെങ്കിലും അവരെ നൽകുന്നത് ഉചിതമല്ലെന്ന് അഭിപ്രായപ്പെട്ടു. അങ്ങനെ ഹദ്റത്ത് സഫിയ(റ)യെ സ്വതന്ത്രയാക്കുകയും ഹദ്റത്ത് ദിഹ്‌യ(റ)യോട് മറ്റാരെയെങ്കിലും സ്വീകരിക്കാൻ പറയുകയും ചെയ്തു.  മാത്രമല്ല ഹദ്റത്ത് സഫിയക്ക്, തന്നെ വിവാഹം കഴിക്കാനോ അല്ലെങ്കിൽ സ്വന്തം ഗോത്രത്തിലേക്ക് മടങ്ങാനോ  അനുവാദം നൽകി. ഹദ്റത്ത് സഫിയ(റ) സ്വയം നബിതിരുമേനി(സ)യെ സ്വീകരിക്കാൻ തയ്യാറാവുകയും അവിടുന്ന് വിവാഹം കഴിക്കുകയും ചെയ്തു.

ഹദ്റത്ത് സഫിയ(റ) തന്നെ വിവരിക്കുന്നു, പിതാവും ഭർത്താവും മുസ്‌ലിംകൾക്കെതിരെ യുദ്ധത്തിൽ കൊല്ലപ്പെട്ടതിനാൽ, നബിതിരുമേനി(സ)യോട് വിദ്വേഷം ഉണ്ടായിരുന്നു. എന്നാൽ, അങ്ങയുമായുള്ള ആദ്യ യാത്രയിൽ തന്നെ, ഹൃദയം മൃദുവാകാൻ തുടങ്ങി. ആ മഹാത്മാവിന്‍റെ ഉന്നത ധാർമിക ഗുണങ്ങൾ നേരിട്ട് കണ്ടറിഞ്ഞു. അറേബ്യൻ ഭൂമിയിൽ അങ്ങയെക്കാളും പ്രിയപ്പെട്ട മറ്റാരുമില്ല എന്നെനിക്ക് തോന്നി.

ഹദ്റത്ത് സഫിയ(റ)യോടൊപ്പം മദീനയിലേക്കുള്ള യാത്രയിൽ ഒരു ദിവസം രാവിലെ നബിതിരുമേനി(സ) കൂടാരത്തിൽ നിന്ന് പുറത്തുവന്നപ്പോൾ ഹദ്റത്ത് അയ്യൂബ് അൻസാരി(റ) തന്‍റെ വാളുമായി പുറത്ത് നിൽക്കുന്നത് കണ്ടു. എന്താണ് കാര്യം എന്ന് ചോദിച്ചപ്പോൾ “ഇസ്‌ലാം സ്വീകരിച്ചെങ്കിലും മുസ്‌ലിംകൾക്കെതിരെ യുദ്ധത്തിൽ  ബന്ധുക്കൾ കൊല്ലപ്പെട്ട യഹൂദ സ്ത്രീയുടെകൂടെ ആണ് അങ്ങ് ഉള്ളതെന്നും അവൾ അങ്ങേയ്ക്ക് എന്തെങ്കിലും ദോഷം വരുത്തുമോ എന്നുമുള്ള ഭയം കാരണം രാത്രി മുഴുവൻ കാവൽ ഇരിക്കുകയായിരുന്നു” എന്നു പറഞ്ഞു. ഇത് കേട്ടപ്പോൾ നബിതിരുമേനി(സ) അദ്ദേഹത്തിന് വേണ്ടി ദുആ ചെയ്തു “അല്ലാഹുവേ, ഏതു പോലെ അയ്യൂബ് എന്നെ സംരക്ഷിച്ചുവോ അതുപോലെ നീയും അദ്ദേഹത്തെ സംരക്ഷിക്കേണമേ”

സഫിയ(റ)യുടെ കണ്ണിനടുത്ത് ചില മുറിവുകൾ കണ്ടപ്പോൾ ഇതെന്താണ് സംഭവിച്ചതെന്ന് നബിതിരുമേനി(സ) ചോദിച്ചപ്പോൾ ഖൈബറിലെ സംഭവങ്ങൾക്ക് മുമ്പോ അല്ലെങ്കിൽ ആ സമയത്തോ അവർ ഒരു സ്വപ്നം കണ്ടിരുന്നു എന്നും അതിൽ മദീനയിൽ നിന്ന് വന്ന ഒരു ചന്ദ്രൻ തന്‍റെ മടിയിൽ വീണതായി കണ്ടുവെന്നും പറഞ്ഞു. ഈ സ്വപ്നം തന്‍റെ യഹൂദ ഭർത്താവിനോട് പറഞ്ഞപ്പോൾ, അദ്ദേഹം അവരെ ആഞ്ഞടിച്ചുകൊണ്ട് പറഞ്ഞു, “യസിരിബിന്‍റെ രാജാവായ മുഹമ്മദിനെ വിവാഹം കഴിക്കുന്ന സ്വപ്നമാണ് നീ കണ്ടത്.”

ഖലീഫാ തിരുമനസ്സ് പറഞ്ഞു,  നബിതിരുമേനി(സ)നോടുള്ള വിദ്വേഷം കാരണം ഖൈബറിലെ സംഭവങ്ങളെയും ഹദ്റത്ത് സഫിയ(റ)യുമായുള്ള വിവാഹത്തെയും കുറിച്ച് ആരോപണങ്ങൾ ഉയർത്തുന്നവരുണ്ട്. യഹൂദികളുടെ കുറ്റകൃത്യങ്ങളും അപ്പോഴത്തെ സാഹചര്യങ്ങളും വിശകലനം ചെയ്യുമ്പോൾ, നബിതിരുമേനി(സ)യുടെ പ്രവർത്തനങ്ങൾ എത്രത്തോളം ഉചിതമായിരുന്നെന്ന് മാത്രമല്ല, എത്രത്തോളം കാരുണ്യത്തോടുകൂടിയാണ് യഹൂദികൾക്ക് മാപ്പ് നൽകിയതെന്നും സ്വന്തം നാട്ടിൽതന്നെ താമസം തുടരാൻ അനുവാദം നൽകിയതെന്നും മനസ്സിലാകുന്നതാണ്. വാസ്തവത്തിൽ, നബിതിരുമേനി(സ)യുടെ ജീവിതവും സ്വഭാവവും മനസ്സിലാക്കാത്തതിനാലാണ് ചിലർ ആരോപണങ്ങൾ ഉന്നയിക്കുന്നത്. നബിതിരുമേനി(സ)യുടെ സ്വഭാവ ഗുണങ്ങൾ ആ മഹാത്മാവിന്‍റെ സത്യതക്കുള്ള തെളിവു കൂടിയാണ്. വിശുദ്ധ ഖുർആൻ പറയുന്നു:

‘ഞാൻ നിങ്ങളുടെ ഇടയിൽ ഒരായുസ്സ് മുഴുവൻ കഴിച്ചുകൂട്ടി, എന്നിട്ടും നിങ്ങൾ ചിന്തിച്ച് മനസ്സിലാകുന്നില്ലേ?’ (വിശുദ്ധ ഖുർആൻ, 10:17)

നബിതിരുമേനി(സ) ഹദറത്ത് സഫിയ(റ)യുടെ സൗന്ദര്യം കണ്ടു കൊണ്ടാണ് വിവാഹം കഴിച്ചതെന്ന് ചിലർ ആരോപിക്കുന്നു. നബിതിരുമേനി(സ)യുടെ സ്ഥാപിതമായ മാതൃക വെച്ച് നോക്കുകയാണെങ്കിൽ ഇത് തികച്ചും തെറ്റാണെന്ന് മനസ്സിലാകുന്നു. വിവാഹത്തിന് ഒരിക്കലും ആ മഹാത്മാവ് ഈ രീതി സ്വീകരിച്ചിരുന്നില്ല. വിധവകളെയും തന്നെക്കാൾ വളരെ പ്രായമേറിയവരെയും വിവാഹം കഴിച്ചിട്ടുണ്ട്. അതും വിശ്വാസത്തിന്‍റെ അടിസ്ഥാനത്തിലോ ഏതെങ്കിലും സമൂഹവുമായോ രാജ്യവുമായോ ബന്ധം സ്ഥാപിക്കുന്നതിന് വേണ്ടിയോ ആയിരുന്നു. മാത്രമല്ല ഹദ്റത്ത് സഫിയ(റ)ക്ക്, നബിതിരുമേനി(സ)യെ വിവാഹം കഴിക്കാനോ അല്ലെങ്കിൽ സ്വന്തം ഗോത്രത്തിലേക്ക് മടങ്ങാനോ  അനുവാദം നൽകിയിരുന്നു. എന്നിട്ടും അവർ അങ്ങയോടൊപ്പം കഴിയാൻ തീരുമാനിച്ചു. പിന്നെങ്ങനെയാണ് ഈ രീതിയിലുള്ള ആക്ഷേപങ്ങൾ ഉന്നയിക്കപ്പെടുന്നത്.

വാഗ്ദത്ത മസീഹ്(അ) അരുൾ ചെയ്യുന്നു നബിതിരുമേനി(സ)യുടെ ഓരോ പ്രവർത്തിയും ദൈവീകമായിരുന്നു.  വിശുദ്ധ ഖുർആൻ സാക്ഷ്യപ്പെടുത്തി പറയുന്നു:

‘പറയുക, എന്‍റെ പ്രാർത്ഥനയും എന്‍റെ ത്യാഗവും എന്‍റെ ജീവിതവും എന്‍റെ മരണവും സർവ്വലോക രക്ഷിതാവായ അല്ലാഹുവിന് മാത്രമാകുന്നു.’ (വിശുദ്ധ ഖുർആൻ, 6:163)

നബിതിരുമേനി(സ)യുടെ ജീവിതത്തിന്‍റെ വിവിധ വശങ്ങൾ വിശകലനം ചെയ്യുമ്പോൾ, അടിസ്‌ഥാനമില്ലാത്ത ആരോപണങ്ങൾ ഉന്നയിക്കുന്നതിന് പകരം വിശുദ്ധ ഖുർആനിലെ ഈ വചനം മുന്നിൽ കാണേണ്ടതുണ്ട്.