മക്കാ വിജയകാലത്തെ മറ്റൊരു സംഭവമാണ് അബ്ദുള്ള ബിൻ സഅദ് ബിൻ അബീ സർഹിന്റെ പശ്ചാത്താപം. അദ്ദേഹം ഇസ്‌ലാം സ്വീകരിക്കുകയും പിന്നീട് വെളിപാടുകൾ എഴുതുകയും ചെയ്ത വ്യക്തിയായിരുന്നു. എന്നിരുന്നാലും, അദ്ദേഹം മതത്തിൽ നിന്ന് വ്യതിചലിക്കുകയും ഇസ്‌ലാം ഉപേക്ഷിക്കുകയും ചെയ്തു. മക്കാ വിജയ സമയത്ത്, അദ്ദേഹം തന്റെ വളർത്ത് സഹോദരനായ ഹദ്റത്ത് ഉസ്മാൻ ബിൻ അഫ്‌വാന്റെ (റ) വീട്ടിൽ ഒളിച്ചിരുന്നു. ഹദ്റത്ത് ഉസ്മാൻ(റ) അബ്ദുല്ലായെ നബി(സ)യുടെ അടുത്തേക്ക് കൊണ്ടുവരുകയും അനുസരണ പ്രതിജ്ഞ സ്വീകരിക്കാൻ ആവശ്യപ്പെടുകയും ചെയ്തു. കുറച്ചു നേരം നിർത്തിയതിന് ശേഷം, നബി(സ) അദ്ദേഹത്തിന്റെ പ്രതിജ്ഞ സ്വീകരിച്ചു. പിന്നീട്, നബി(സ) താൻ അൽപനേരം നിർത്തിയതിന്റെ കാരണം വിശദീകരിച്ചു, ഒരു മുസ്‌ലിം അദ്ദേഹത്തിനെതിരെ മാരകമായ ആക്രമണം നടത്തുമോ എന്ന് സംശയിച്ചാണ് താൻ നിർത്തിയതെന്ന് അവിടുന്ന് പറഞ്ഞു. എന്തുകൊണ്ടാണ് നബി(സ) അത് സൂചിപ്പിക്കാതിരുന്നത് എന്ന് സ്വഹാബികൾ ചോദിച്ചപ്പോൾ, അത്തരം സൂചനകൾ നൽകുന്നത് ഒരു പ്രവാചകന് ഉചിതമല്ലെന്ന് നബി(സ) മറുപടി നൽകി. ഈ സംഭവം വിവരിക്കുന്ന നിവേദനങ്ങൾ വിശ്വസനീയമല്ല. കാരണം ഇത് നബി(സ)യുടെ പരിശുദ്ധ സ്വഭാവത്തിന് വിരുദ്ധമാണ്. അബ്ദുല്ലാഹ് ബിൻ സഅദിന് നബി(സ) സംരക്ഷണം നൽകിയെന്നും അദ്ദേഹത്തെ വധിച്ചില്ല എന്നും പരാമർശിക്കുന്ന മറ്റു നിവേദനങ്ങളുമുണ്ട്. ഈ സംഭവം പരാമർശിക്കപ്പെട്ട നിവേദനങ്ങളുടെ ആധികാരികത സംശയാസ്പദമാണെന്നും ഈ നിവേദനങ്ങൾ ദുർബലമാണെന്നും ഹുസൂർ(അയ്യദഹുല്ലാഹ്) ഊന്നിപ്പറഞ്ഞു.

ഇസ്‌ലാമിൽ മതപരിവർത്തനത്തിന് ശിക്ഷയില്ല, അതിനാൽ അബ്ദുല്ലാഹ് ബിൻ സഅദിനെ മതം ഉപേക്ഷിച്ചതിന്റെ പേരിൽ നബി(സ) കൊല്ലാൻ നിർദ്ദേശിച്ചു എന്ന് പറയുന്ന ഒരു നിവേദനവും ശരിയല്ല.മാത്രമല്ല, ഈ സംഭവം വിവരിക്കുന്ന രീതി നബി(സ)യുടെ അന്തസ്സിന് വിരുദ്ധമാണ്. അന്നേ ദിവസം, നബി(സ) കാരുണ്യത്തിന്റെ ഏറ്റവും ഉയർന്ന നിലവാരം പ്രകടിപ്പിക്കുകയും മാപ്പ് തേടിയവർക്ക് , അവർ വധശിക്ഷക്ക് വിധിക്കപ്പെട്ടിരുന്നെങ്കിൽ പോലും മാപ്പ് നൽകുകയും ചെയ്തു. കൂടാതെ, ബുഖാരി, മുസ്‌ലിം എന്നീ ആധികാരിക ഗ്രന്ഥങ്ങളിൽ ഇത്തരം നിവേദനങ്ങൾ കാണുന്നില്ല. മാത്രമല്ല, നബി(സ) ഒരു വിജയശ്രീലാളിതനായ നേതാവായിരുന്നു, ആർക്കെങ്കിലും വധശിക്ഷ നൽകണമെന്ന് അവിടുന്ന് ആഗ്രഹിച്ചിരുന്നെങ്കിൽ, ആംഗ്യങ്ങളിലൂടെ സൂചിപ്പിക്കേണ്ട ആവശ്യമില്ലായിരുന്നു; പകരം, വ്യക്തമായി വധശിക്ഷ നൽകണമെന്ന് പറയാമായിരുന്നു. അതുകൊണ്ട് നബി(സ)യെക്കുറിച്ച് ഇത്തരം കാര്യങ്ങൾ ആരോപിക്കുന്നത് ഉചിതമല്ല. നബി(സ) തന്റെ ഹൃദയത്തിൽ ഒരു കാര്യം ആഗ്രഹിച്ചു, പക്ഷേ ആംഗ്യം കൊണ്ടോ കണ്ണുകൊണ്ടോ അത് സൂചിപ്പിച്ചില്ല. ആ ദിവസം നബി(സ)യുടെ കാരുണ്യത്തിൻ്റെ ദിനമായി വിശേഷിപ്പിക്കപ്പെടുന്നു. അതിനാൽ, ഈ സംഭവവുമായി ബന്ധപ്പെട്ട നിവേദനങ്ങൾ സ്വീകരിക്കാൻ കഴിയില്ല, അതുകൊണ്ടാണ് പല ചരിത്രകാരന്മാരും ഈ സംഭവം അവഗണിച്ചത്. വാസ്തവത്തിൽ, അബ്ദുള്ള ബിൻ അബീ സർഹ് പിന്നീട് ഈജിപ്തിലെ ഗവർണറായി എന്നും രേഖപ്പെടുത്തിയിട്ടുണ്ട്.

ഇക്‌രിമ ബിൻ അബീ ജഹൽ ഇസ്‌ലാം സ്വീകരിച്ച സംഭവവും ഹുസൂർ(അയ്യദഹുല്ലാഹ്) പറഞ്ഞു. ഇക്‌രിമ വധശിക്ഷയ്ക്ക് ഉത്തരവിട്ടവരിൽ ഒരാളായിരുന്നു. അദ്ദേഹവും പിതാവും മുസ്‌ലിംകൾക്കെതിരെ വലിയ ക്രൂരതകൾ ചെയ്തിരുന്നു. ഈ ഉത്തരവിനെക്കുറിച്ച് കേട്ടപ്പോൾ അദ്ദേഹം യെമനിലേക്ക് പലായനം ചെയ്തു. മുസ്‌ലിംകൾക്കെതിരെ ചെയ്ത ക്രൂരതകൾ കാരണം തങ്ങൾ തീർച്ചയായും കൊല്ലപ്പെടുമെന്നും അതിനാൽ പലായനം ചെയ്യാമെന്നും മക്കയിലെ നേതാക്കൾ തന്നെ ഊഹിച്ചിരിക്കാം. നബി(സ)യുടെ വലിയ ദയയും ക്ഷമയും കാരുണ്യവും അവർ കണക്കാക്കിയിരുന്നില്ല. പിന്നീട് നബി(സ)യുടെ കാരുണ്യത്തെ ക്കുറിച്ച് മനസ്സിലാക്കിയപ്പോൾ, അവർ മക്കയിലേക്ക് മടങ്ങാൻ തുടങ്ങി. ഇക്‌രിമ ധീരരായ മക്കൻ സൈനികരുടെ ഒരു സംഘത്തെ സംഘടിപ്പിക്കുകയും ഖാലിദ് ബിൻ വലീദ്(റ) മക്കയിൽ പ്രവേശിക്കുന്നത് തടയാൻ ശ്രമിക്കുകയും ചെയ്തു. എന്നാൽ, അവരുടെ 20 ഓളം പടയാളികൾ കൊല്ലപ്പെടുന്നത് കണ്ടപ്പോൾ ഇക്‌രിമയും മറ്റുള്ളവരും പലായനം ചെയ്തു.

ഇക്‌രിമയുടെ ഭാര്യ തന്റെ ഭർത്താവ് മരണഭയത്താൽ പലായനം ചെയ്തു എന്ന് കേട്ടപ്പോൾ, നബി(സ)യുടെ അടുത്ത് ചെന്ന് അദ്ദേഹത്തിന് വേണ്ടി മാപ്പിനപേക്ഷിച്ചു. ഇക്‌രിമയ്ക്ക് മാപ്പ് നൽകിയിട്ടുണ്ടെന്ന് നബി(സ) പറഞ്ഞു, അങ്ങനെ അദ്ദേഹത്തിന്റെ ഭാര്യ അദ്ദേഹത്തെ പിന്തുടർന്ന് മാപ്പ് ലഭിച്ചതായും മക്കയിലേക്ക് മടങ്ങണമെന്നും അറിയിച്ചു. ഇക്‌രിമ തിരിച്ചെത്തി നബി(സ)യെ കണ്ടുമുട്ടിയപ്പോൾ, അവിശ്വാസിയായിക്കൊണ്ട് തന്നെ മക്കയിൽ സമാധാനപരമായി ജീവിക്കാൻ കഴിയുമെന്ന് തന്റെ ഭാര്യ തന്നെ അറിയിച്ചതായി പറഞ്ഞു. ഇത് സത്യമാണെന്ന് നബി(സ) പറഞ്ഞു. ഇത് കേട്ടപ്പോൾ, ഇക്‌രിമ ഏകദൈവത്തിലുള്ള തന്റെ വിശ്വാസവും മുഹമ്മദ്(സ) അവന്റെ ദൂതനാണെന്ന വിശ്വാസവും പ്രഖ്യാപിച്ചു. ആ ദിവസം ഇക്‌രിമ എന്ത് ആവശ്യപ്പെട്ടാലും നബി(സ) അത് നൽകുമെന്ന് പറഞ്ഞു. നബി(സ)യോട് താൻ ചെയ്ത എല്ലാ തെറ്റുകൾക്കും മാപ്പ് ലഭിക്കുന്നതിനായി പ്രാർത്ഥിക്കാൻ ഇക്‌രിമ ആവശ്യപ്പെട്ടു; അങ്ങനെ നബി(സ) അദ്ദേഹത്തിന് വേണ്ടി പ്രാർത്ഥിച്ചു. തുടർന്ന്, നബി(സ) തന്റെ സ്വന്തം മേലങ്കി ഇക്‌രിമയ്ക്ക് നൽകി.

ഇക്‌രിമയുടെ ഇസ്‌ലാം സ്വീകരണം ഒരു പ്രവചനത്തിന്റെ പൂർത്തീകരണമായിരുന്നു. വർഷങ്ങൾക്ക് മുമ്പ്, നബി(സ) ഒരു സ്വപ്നം കണ്ടിരുന്നു, അതിൽ അദ്ദേഹം സ്വർഗ്ഗത്തിലായിരിക്കെ ഒരു മുന്തിരിക്കുല കണ്ടു. അത് ആർക്കുവേണ്ടിയാണെന്ന് അന്വേഷിച്ചപ്പോൾ, അത് അബൂജഹലിന് വേണ്ടിയാണെന്ന് അറിയിച്ചു. സത്യവിശ്വാസികൾക്ക് മാത്രമേ സ്വർഗ്ഗത്തിൽ പ്രവേശിക്കാൻ കഴിയൂ എന്ന് പ്രവാചകൻ(സ) സ്വയം ചിന്തിച്ചു. പിന്നീട് വ്യക്തമായത്, സ്വർഗ്ഗത്തിൽ നിന്നുള്ള ഈ മുന്തിരിക്കുല പിന്നീട് സത്യവിശ്വാസിയായി മാറിയ അബൂജഹലിന്റെ മകനായ ഇക്‌രിമക്ക് വേണ്ടിയായിരുന്നു എന്നാണ്.