ജൽസയിൽ പങ്കെടുത്ത അതിഥികളിൽ നിന്ന് ലഭിച്ച നിരവധി വികാരപ്രകടനങ്ങളിൽ നിന്നും അഭിപ്രായങ്ങളിൽ നിന്നും ചിലതിനെക്കുറിച്ച് ഖലീഫാ തിരുമനസ്സ് പറഞ്ഞു.
റോഡറിക് ദ്വീപിലെ പോലീസ് സേനയുടെ അസിസ്റ്റന്റ് കമ്മീഷണർ, താൻ തൻ്റെ പദവിയിൽ പല പരിപാടികളിലും പങ്കെടുത്തിട്ടുണ്ട്, എന്നാൽ ഇതുവരെ ജൽസ പോലെ ഒന്നു കണ്ടിട്ടില്ല എന്ന് പറഞ്ഞു. സംഘാടനവും അച്ചടക്കവും മാതൃകാപരമായിരുന്നു, എല്ലാവരും മാതൃകാപരമായ ആവേശത്തോടെ ഒന്നിച്ച് പ്രവർത്തിക്കുന്നുണ്ടായിരുന്നു. കൈയിൽ പരിക്ക് കാരണം കെട്ടുണ്ടായിരുന്ന ആൾ പോലും പുഞ്ചിരിയോടെ ആളുകളെ സേവിച്ചു. ഡോക്ടർമാരെയും ബിസിനസ് പ്രൊഫഷണലുകളെയും അദ്ദേഹം കണ്ടു, അവരെല്ലാം വിനയത്തോടെയാണ് പ്രവർത്തിച്ചിരുന്നത്. ജൽസയിലേക്കും തിരിച്ചുമുള്ള അദ്ദേഹത്തിൻ്റെ ഡ്രൈവർ, താൻ ബയോകെമിസ്ട്രിയിൽ ഡോക്ടറേറ്റ് പൂർത്തിയാക്കി എന്ന് പറഞ്ഞു, അത് അദ്ദേഹത്തിൽ ഒരു വലിയ മതിപ്പ് ഉണ്ടാക്കി. അത്തരത്തിലുള്ള ഭക്തിയും വിനയവും താൻ മറ്റെവിടെയും കണ്ടിട്ടില്ലെന്ന് അദ്ദേഹം പറഞ്ഞു. സുരക്ഷാ ക്രമീകരണങ്ങളെയും മറ്റ് എല്ലാ ക്രമീകരണങ്ങളെയും അദ്ദേഹം പ്രശംസിച്ചു.

ബെൽജിയത്തിൽ നിന്നുള്ള HRWF-ൻ്റെ ഒരു പ്രതിനിധി, ജൽസയിൽ ചേർന്നത് ഒരു അവിസ്മരണീയമായ അനുഭവമാണെന്നും തനിക്ക് ലഭിച്ച സ്നേഹവും ആതിഥ്യവും മനസ്സിൽ മായാത്ത ഒരു മതിപ്പ് ഉണ്ടാക്കിയെന്നും പറഞ്ഞു. ജൽസക്കുള്ള ഒരുക്കങ്ങൾ മാസങ്ങൾക്ക് മുമ്പ് ആരംഭിച്ചതായി അദ്ദേഹം മനസ്സിലാക്കി. ജൽസയുടെ സംഘടനാപരമായ കാര്യങ്ങൾ മാത്രമല്ല, പങ്കെടുത്ത എല്ലാവരുടെയും ധാർമിക നിലവാരവും വലിയ സ്വാധീനം ചെലുത്തി. വ്യത്യസ്ത വകുപ്പുകളിലെ ഓരോ വ്യക്തിയും ഒരു പ്രശ്നവുമില്ലാതെ മികച്ച രീതിയിൽ പ്രവർത്തിച്ചു. ഇത് അഹ്മദിയ്യാ സമൂഹം സമാധാനത്തിൻ്റെയും ഐക്യത്തിൻ്റെയും മനോഭാവം പ്രാവർത്തികമാക്കുന്നവരാണ് എന്ന് കാണിക്കുന്നു. അപരിചിതരായ ആളുകൾ വന്ന് നിങ്ങളെ ഞങ്ങൾ എങ്ങനെയാണ് സേവിക്കേണ്ടത് എന്ന് ചോദിച്ചത് ഒരു വലിയ അനുഭവമായിരുന്നു. ഇന്നും ദൈവം ആളുകളോട് സംസാരിക്കുന്നു എന്നത് ജൽസയിലൂടെ വ്യക്തമായിരുന്നു എന്നതിൽ അദ്ദേഹം സന്തോഷം പ്രകടിപ്പിച്ചു.

ഇസ്‌ലാമിന്റെ യഥാർഥ അധ്യാപനങ്ങളെക്കുറിച്ച് അറിയാൻ കഴിഞ്ഞതിൽ സന്തോഷമുണ്ടെന്ന് ബ്രസീലിൽ നിന്നുള്ള ഒരു രാഷ്ട്രീയക്കാരൻ പറഞ്ഞു. ജൽസയുടെ താൽക്കാലിക ക്രമീകരണങ്ങളിൽ അദ്ദേഹം അത്ഭുതം പ്രകടിപ്പിച്ചു. സേവനത്തിന്റെയും ത്യാഗത്തിന്റെയും അത്തരത്തിലുള്ള ഒരു മനോഭാവം നല്ല പരിശീലനം ലഭിച്ചവരിൽ മാത്രമേ ഉണ്ടാകൂ എന്ന് അദ്ദേഹം പറഞ്ഞു. ഈ ജമാഅത്ത് ലോകമെമ്പാടുമുള്ള
ഹൃദയങ്ങളെ സമാധാനത്തിലും ഐക്യത്തിലും ഒരുമിപ്പിക്കാൻ പ്രേരിപ്പിക്കുന്നു. കൂടാതെ അത് പഠിപ്പിക്കുന്ന കാര്യങ്ങൾ യഥാർഥത്തിൽ പ്രാവർത്തികമാക്കുകയും ചെയ്യുന്നു. ഈ ഇസ്‌ലാം മതം ആളുകളെ ഭിന്നിപ്പിക്കുന്ന ഒന്നല്ല, മറിച്ച് ആളുകളെ ഒരുമിപ്പിക്കുന്ന ഒന്നാണ് എന്ന് അദ്ദേഹം പറഞ്ഞു.

ചിലിയിൽ നിന്നുള്ള ഒരു പ്രൊഫസറും ജൽസയിൽ പങ്കെടുത്തു എന്ന് ഖലീഫാ തിരുമനസ്സ് പറഞ്ഞു. ജൽസയുടെ എല്ലാ കാര്യങ്ങളിലുമുള്ള സംഘാടനം അസാധാരണമായിരുന്നു എന്ന് അവർ പ്രകടിപ്പിച്ചു. ഇത്രയും വലിയ ഒരു കൂട്ടം ആളുകൾ ഉള്ളതുകൊണ്ട്, ശുചിമുറി സൗകര്യങ്ങൾ അത്ര മികച്ചതായിരിക്കില്ല അല്ലെങ്കിൽ വൃത്തിയായിരിക്കില്ല എന്ന് അവർ കരുതിയിരുന്നു. എന്നാൽ, നേരിട്ട് കണ്ടപ്പോൾ, ആരും ശുചിമുറി ഉപയോഗിക്കാത്ത പോലെ തോന്നുകയും അഹ്മദികളുടെ ശുചിത്വത്തിൽ അവർ ആശ്ചര്യം പ്രകടിപ്പിക്കുകയും ചെയ്തു. ജൽസയിലെ സാഹോദര്യത്തിന്റെ അന്തരീക്ഷം അഹ്മദികളല്ലാത്ത അതിഥികളെയും ഉൾക്കൊണ്ടിരുന്നു എന്നും, അതുകൊണ്ട് എല്ലാവരും ഒരു വലിയ കുടുംബത്തിന്റെ ഭാഗമാണെന്ന് അവർക്ക് അനുഭവപ്പെട്ടു എന്നും അവർ പറഞ്ഞു.

ഇറ്റലിയിൽ നിന്നുള്ള ഒരു രാഷ്ട്രീയ പ്രവർത്തക പറഞ്ഞു, ഇത് പൂർണമായും മതപരമായ അനുഭവം മാത്രമായിരിക്കുമെന്ന് ഞാൻ കരുതി. എന്നാൽ ജൽസ ഒരു അസാധാരണമായ വൈകാരിക അനുഭവം കൂടിയാണെന്ന് കാണാൻ സാധിച്ചു. മനോഹരമായ സംവിധാനങ്ങളിലും, ജൽസയുടെ സുഗമമായ നടത്തിപ്പിനായി സ്ത്രീകളും പുരുഷന്മാരും ഒരുപോലെ സേവനം ചെയ്യുന്നതിലും അവർ അത്ഭുതപ്പെട്ടു. അർഥപൂർണമാണെന്ന് അവർക്ക് അനുഭവപ്പെട്ട മൗന പ്രാർഥനയും അവരെ സ്പർശിച്ചു. മറ്റുള്ളവരോട് എങ്ങനെ പെരുമാറണം എന്ന് ചിന്തിക്കാനുള്ള ഒരു അവസരമാണ് ജൽസ എന്ന് അവർക്ക് തോന്നി.
ചെക്ക് റിപ്പബ്ലിക്കിൽ നിന്നുള്ള ഒരു സീനിയർ പ്രൊഫസർ, ജൽസയിൽ ഹുസൂർ തിരുമനസ്സിന്റെ സാന്നിധ്യം തന്റെ ഹൃദയത്തെ സ്പർശിച്ചു എന്ന് പറഞ്ഞു. താൻ ലോകത്തിലെ പല കൺവെൻഷനുകളും സന്ദർശിച്ചിട്ടുണ്ട്. എന്നാൽ ഇത്തരത്തിലുള്ള ഐക്യവും സാഹോദര്യവും സമാധാനപരമായ അന്തരീക്ഷവും മറ്റെവിടെയും കണ്ടിട്ടില്ലെന്ന് അദ്ദേഹം പറഞ്ഞു. എല്ലാവരുടെയും മുഖത്ത് പുഞ്ചിരി കണ്ടു, അത് അഹ്മദിയ്യാ അധ്യാപനങ്ങളുടെ ഒരു പ്രതിഫലനമാണെന്നും അദ്ദേഹം പറഞ്ഞു. അതിഥികളോട് എങ്ങനെ പെരുമാറണം എന്നതിനെക്കുറിച്ചുള്ള ഹുസൂറിന്റെ പ്രസംഗത്തിൽ അദ്ദേഹം ആകൃഷ്ടനായി. സുരക്ഷാ ക്രമീകരണങ്ങളെ അദ്ദേഹം അഭിനന്ദിച്ചു, എല്ലാം എത്ര സുഗമമായി പ്രവർത്തിക്കുന്നു എന്നതിൽ അദ്ദേഹം അത്ഭുതപ്പെട്ടു

സാഹോദര്യത്തിന്റെ അന്തരീക്ഷം അനുഭവിക്കാൻ ആളുകൾ ജൽസയിൽ സ്വയം പങ്കെടുക്കണം എന്നും അദ്ദേഹം പറഞ്ഞു. അഹ്മദിയ്യത്തിന്റെ ഭാവി ശോഭനമാണ് എന്നും അദ്ദേഹം പറഞ്ഞു. ഒരു മുസ്‌ലിം എന്ന നിലയിൽ, അഹ്മദിയ്യത്തിനെക്കുറിച്ച് കൂടുതൽ അറിയാൻ അവസരം ലഭിച്ചതിൽ അദ്ദേഹം സന്തോഷിച്ചു. എല്ലാവരും നിസ്വാർത്ഥമായും സ്നേഹത്തോടെയും പ്രവർത്തിക്കുന്നു എന്നത് അഹ്മദിയ്യാ സമൂഹത്തിന്റെ ഭാഗമായതുകൊണ്ട് അവർക്ക് ലഭിച്ച ഉയർന്ന പരിശീലനത്തിന്റെ ഒരു പ്രതിഫലനമാണ്. അഹ്മദിയ്യാ സമൂഹം വിദ്യാഭ്യാസത്തിന് നൽകുന്ന ശ്രദ്ധയിൽ അദ്ദേഹം ആകൃഷ്ടനായി.
ഇന്തോനേഷ്യയിൽ നിന്നുള്ള ഒരു പുരോഹിതൻ, തനിക്ക് മുൻപ് അഹ്മദിയ്യത്തിനെക്കുറിച്ച് അറിയാമായിരുന്നെങ്കിലും, അഹ്മദിയ്യത്ത് യഥാർഥത്തിൽ ഒരു ആത്മീയ പ്രസ്ഥാനമാണെന്ന് ജൽസയിൽ നിന്നാണ് മനസ്സിലാക്കിയത് എന്ന് പറയുകയുണ്ടായി. ദൈവത്തോട് കൂടുതൽ അടുക്കാൻ ഐക്യത്തോടെ ആളുകൾ എങ്ങനെ ഒത്തുകൂടുന്നു എന്ന് അദ്ദേഹം കണ്ടു. ദൈവവുമായി കൂടുതൽ അടുപ്പം സ്ഥാപിക്കുന്നതിന് നൽകുന്ന ഊന്നലിൽ അദ്ദേഹം ആകൃഷ്ടനായി. ഇത് ഇന്നത്തെ ലോകത്ത് പലപ്പോഴും അവഗണിക്കപ്പെടുന്ന ഒന്നാണ്.

മത്തായി 7:16-ൽ ഇങ്ങനെ പറയുന്നു, ‘അവരുടെ ഫലത്താൽ നിങ്ങൾ അവരെ തിരിച്ചറിയും.’ ഇത് ജൽസ സാലാന യുകെ 2025-ന് അനുകൂലമായി നിലകൊള്ളുന്നതായി താൻ കണ്ടെത്തി എന്ന് ഐസ്‌ലൻഡിൽ നിന്നുള്ള ഒരു അതിഥിയും യൂണിവേഴ്സൽ ഫെഡറേഷൻ ഫോർ പീസിൻ്റെ ചെയർമാനും പറഞ്ഞു. ജൽസ കണ്ടപ്പോൾ, ഈ സമൂഹത്തിൽ ദൈവം പ്രസാദിച്ചിരിക്കുന്നു എന്ന് ബോധ്യപ്പെട്ടുവെന്നും, ഹ്യൂമാനിറ്റി ഫസ്റ്റ് പ്രദർശനം സന്ദർശിച്ചപ്പോൾ, മാനവരാശിക്കുള്ള സേവനം ഒരു വ്യക്തിയെ ദൈവത്തോട് കൂടുതൽ അടുപ്പിക്കുന്നുവെന്ന് മനസ്സിലായെന്നും പറഞ്ഞു.
(ഖലീഫാ തിരുമനസ്സ് പങ്കുവച്ച അതിഥികളുടെ വിവിധ അഭിപ്രായങ്ങളിൽ ചില ഉദാഹരണങ്ങൾ മാത്രമാണിത്.)

ജൽസയിൽ പങ്കെടുത്ത എല്ലാവരുടെയും ഹൃദയങ്ങൾ അല്ലാഹു കൂടുതൽ തുറക്കട്ടെ എന്നും അവർക്ക് അഹ്മദിയ്യത്ത് അഥവാ യഥാർഥ ഇസ്‌ലാം മനസ്സിലാക്കാനും കാലഘട്ടത്തിന്റെ ഇമാമിനെ സ്വീകരിക്കാനും കഴിയട്ടെ എന്നും ഖലീഫാ തിരുമനസ്സ് ദുആ ചെയ്തു. അല്ലാഹു പുതിയതായി ഇസ്‌ലാം സ്വീകരിച്ചവരുടെ വിശ്വാസവും ആത്മാർത്ഥതയും വർദ്ധിപ്പിക്കട്ടെ. ഓരോ അഹ്മദിക്കും ജൽസയിൽ നിന്ന് പഠിച്ചതെല്ലാം പ്രാവർത്തികമാക്കാൻ അല്ലാഹു പ്രാപ്തനാക്കട്ടെ. കൂടാതെ അവർ ഭൗതികതയേക്കാൾ വിശ്വാസത്തിന് മുൻഗണന നൽകട്ടെ. ഓരോ അഹ്മദിക്കും ജൽസയുടെ അനുഗ്രഹങ്ങളിൽ നിന്ന് എപ്പോഴും പ്രയോജനം ലഭിക്കട്ടെ, അവർ എപ്പോഴും സ്വയം മെച്ചപ്പെടുത്താൻ ശ്രമിക്കട്ടെ.