ഹുസൂർ തിരുമനസ്സ് താഴെ പറയുന്നവരുടെ ജനാസ ഗാഇബ് നിർവ്വഹിക്കുമെന്ന് അറിയിച്ചു:

1.ഫഹീമുദ്ദീൻ നാസർ റൊമാനിയയിലെ ഒരു മുബല്ലിഗ് ആയിരുന്നു. അദ്ദേഹം ആദ്യം പാക്കിസ്ഥാനിലെ വിവിധ സ്ഥലങ്ങളിൽ സേവനമനുഷ്ഠിച്ചു. വിശുദ്ധ ഖുർആൻറെ വ്യാഖ്യാനത്തിൽ അദ്ദേഹം വൈദഗ്ദ്ധ്യം നേടിയിരുന്നു. 2006-ൽ അദ്ദേഹം റൊമാനിയയിൽ സേവനത്തിനായി നിയോഗിക്കപ്പെട്ടു, മരണം വരെ അവിടെ തുടർന്നു.
അദ്ദേഹത്തിൻ്റെ ഭാര്യ പറയുന്നത്, അദ്ദേഹം മാതൃകാപരമായ ഭർത്താവും മികച്ച പിതാവുമായിരുന്നു എന്നാണ്. ദൈവവുമായി ഉറച്ച ബന്ധം പുലർത്തിയിരുന്ന അദ്ദേഹം, പ്രാർത്ഥനാനിരതനും ക്ഷമയുള്ളവനും തൻ്റെ സേവനവും ജീവിത സമർപ്പണവും പൂർണമായി നിർവഹിക്കാൻ അഭിനിവേശമുള്ളയാളുമായിരുന്നു. എല്ലാ കാര്യങ്ങളിലും അദ്ദേഹം ഖലീഫയുടെ ഉപദേശം തേടിയിരുന്നു. കുട്ടികളെ പഠിപ്പിക്കുന്നതിൽ അദ്ദേഹത്തിന് മികച്ച ശൈലിയുണ്ടായിരുന്നു. രോഗാവസ്ഥയിലും അദ്ദേഹം പ്രാർഥനകളിൽ ശ്രദ്ധാലുവായിരുന്നു, ദൈവത്തിൻ്റെ പടിവാതിൽ ഒരിക്കലും ഉപേക്ഷിക്കരുതെന്ന് അദ്ദേഹം കുടുംബത്തെ ഉപദേശിച്ചു. ഇസ്‌ലാം അഹ്മദിയ്യയുടെ സന്ദേശം പ്രചരിപ്പിക്കാൻ കിട്ടുന്ന ഒരവസരവും അദ്ദേഹം പാഴാക്കിയില്ല. എപ്പോഴും പുഞ്ചിരിക്കുന്ന മുഖഭാവമുള്ള, സൗഹൃദപരമായ വ്യക്തിയായിരുന്നു അദ്ദേഹം. രോഗാവസ്ഥയിലും, മരിക്കുന്നതിന് രണ്ട് ദിവസം മുമ്പ് വരെ, അദ്ദേഹം തൻ്റെ പതിവ് ജോലികൾ തുടർന്നു.

വിശുദ്ധ ഖുർആൻ്റെ റൊമാനിയൻ പരിഭാഷയിലും മസീഹ് മൗഊദ് (അ) ൻ്റെ ചില പുസ്തകങ്ങളുടെ പരിഭാഷയിലും അദ്ദേഹം പ്രവർത്തിക്കാൻ തുടങ്ങിയിരുന്നു. റൊമാനിയൻ ഭാഷയിലുള്ള അദ്ദേഹത്തിൻ്റെ വൈദഗ്ധ്യം അവിടുത്തെ ആളുകളെ വളരെയധികം ആകർഷിച്ചു. അദ്ദേഹത്തിൻ്റെ മാതാവ് പറയുന്നത്, അദ്ദേഹം വളരെ അനുസരണയുള്ള മകനും മികച്ച സ്വഭാവഗുണങ്ങളുള്ളവനുമായിരുന്നു എന്നാണ്. അദ്ദേഹം ജനിക്കുന്നതിനുമുമ്പ് അദ്ദേഹത്തിൻ്റെ പിതാവ് ഒരു സ്വപ്നം കണ്ടിരുന്നു: നെറ്റിയിൽ ഒരു ചന്ദ്രനും നക്ഷത്രവുമുള്ള ഒരു കുട്ടിയെ പിടിച്ചിരിക്കുന്നു എന്നതായിരുന്നു സ്വപ്നം. അദ്ദേഹം ഒരു മുബല്ലിഗ് ആയപ്പോൾ തന്നെ, അവൻ തീർച്ചയായും ഒരു ദിവസം ശോഭിക്കുമെന്ന് തങ്ങൾക്ക് അറിയാമായിരുന്നു എന്ന് ഉമ്മ പറഞ്ഞു. റൊമാനിയയിലെ ആദ്യത്തെ മുബല്ലിഗ് ആയിരുന്നു അദ്ദേഹം, അവിടെ ജമാഅത്ത് സ്ഥാപിക്കുന്നതിൽ മഹത്തായ സേവനങ്ങൾ ചെയ്തു. തൻ്റെ ഇളയ സഹോദരി മരിച്ചപ്പോൾ ഒഴികെ അദ്ദേഹം ഒരിക്കലും അവധി എടുത്തില്ല. പ്രാദേശിക സമുദായ അംഗങ്ങൾ തങ്ങളുടെ ജീവിതത്തിൽ അദ്ദേഹത്തിൻ്റെ ആഴത്തിലുള്ള സ്വാധീനം വിവിധ രീതികളിൽ പ്രകടിപ്പിച്ചു, തനിക്ക് കഴിയുന്ന എല്ലാ വഴികളിലൂടെയും അദ്ദേഹം അവരെ സഹായിച്ചിരുന്നു. അദ്ദേഹം തങ്ങൾക്ക് ഒരു മുബല്ലിഗ് മാത്രമല്ല, ഒരു പിതൃതുല്യനും, സഹോദരനും, സുഹൃത്തും ആയിരുന്നു എന്ന് ചിലർ പറഞ്ഞു.

ഹുസൂർ തിരുമനസ്സ് പറഞ്ഞു, ഇതാണ് ഒരു മുബല്ലിഗിൽ ഉണ്ടായിരിക്കേണ്ട ഗുണങ്ങൾ. പ്രബോധനത്തിലും ധാർമിക പരിശീലനത്തിലുമുള്ള തങ്ങളുടെ പരിശ്രമത്തിൽ ഫലം കാണണമെങ്കിൽ ഒരു മുബല്ലിഗ് വയ് ക്കേണ്ട മാതൃക ഇതാണ്. ഈ മുബല്ലിഗ് ഒരു വിദേശ രാജ്യത്ത് സത്യവിശ്വാസത്തിന് വേണ്ടി പൂർണമായി സമർപ്പിച്ചു, ഇത് തീർച്ചയായും അദ്ദേഹത്തെ ഒരു രക്തസാക്ഷിയാക്കുന്നു എന്ന് ഹുസൂർ തിരുമനസ്സ് പറഞ്ഞു. തൻ്റെ അവസാന ശ്വാസം വരെ അദ്ദേഹം സേവനമനുഷ്ഠിച്ചു. അദ്ദേഹത്തെ എപ്പോഴും പുഞ്ചിരിക്കുന്ന മുഖത്തോടെയാണ് കണ്ടിട്ടുള്ളതെന്ന് ഹുസൂർ തിരുമനസ്സ് സാക്ഷ്യപ്പെടുത്തി. വിദേശത്ത് അന്തരിച്ച മറ്റൊരു മുബല്ലിഗിനെക്കുറിച്ച് രണ്ടാമത്തെ ഖലീഫ (റ) പറഞ്ഞത്, അദ്ദേഹവും ഒരു രക്തസാക്ഷിയാണെന്നും അദ്ദേഹത്തിൻ്റെ ജീവിതത്തിൽ നിന്ന് പാഠങ്ങൾ പഠിക്കണം എന്നുമാണ്. ഫഹീമുദ്ദീൻ നാസർ സാഹിബിൻ്റെ കാര്യവും അതുപോലെയാണ്; അദ്ദേഹത്തിൻ്റെ ജീവിതം ഒരു മാതൃകയാണ്, പ്രത്യേകിച്ച് വഖ്ഫെ സിന്ദഗികൾക്ക് (ജീവിതം സമർപ്പിച്ചവർക്ക്). അല്ലാഹു അദ്ദേഹത്തിൻ്റെ പദവി ഉയർത്തുകയും കുടുംബത്തിന് ക്ഷമ നൽകുകയും ചെയ്യട്ടെ എന്ന് ഹുസൂർ തിരുമനസ്സ് ദുആ ചെയ്തു.

2. അബ്ദുൽ അലീം ഫാറൂഖി (കാനഡ)
കാനഡയിലെ അബ്ദുൽ അലീം ഫാറൂഖി. അദ്ദേഹം ഉറങ്ങിക്കിടക്കുമ്പോൾ മൂന്ന് സായുധർ വീട്ടിൽ അതിക്രമിച്ചു കയറുകയും, അദ്ദേഹത്തിൻ്റെ ഭാര്യയും മൂന്ന് കുട്ടികളും താഴെയായിരിക്കെ അദ്ദേഹം അന്തരിക്കുകയും ചെയ്തു. കവർച്ചക്കാർ എല്ലാവരുടെയും ഫോണുകൾ എടുത്തു, ബഹളം കേട്ട് അബ്ദുൽ അലീം ഫാറൂഖി സാഹിബ് ഉണർന്നു. അക്രമികളിൽ ഒരാൾ അദ്ദേഹത്തിൻ്റെ മുറിയിൽ പ്രവേശിച്ചു, അയാളെ ഭയപ്പെടുത്തി ഓടിക്കാൻ ശ്രമിച്ചപ്പോൾ, അക്രമി അദ്ദേഹത്തിൻ്റെ മുഖത്തും തോളിലും വടി കൊണ്ട് അടിക്കുകയും തുടർന്ന് ഓടിപ്പോകുകയും ചെയ്തു. തുടർന്ന് അബ്ദുൽ അലീം ഫാറൂഖി സാഹിബ് മകൻ്റെ മുറിയിലേക്ക് നടക്കാൻ തുടങ്ങിയപ്പോൾ, കോണിപ്പടിക്ക് അടുത്ത് നിന്നിരുന്ന ഒരു അക്രമി അദ്ദേഹത്തിന് നേരെ രണ്ട് തവണ വെടിയുതിർത്തു. ഒരു വെടിയുണ്ട ഹൃദയത്തിനടുത്ത് തട്ടി തോളിലൂടെ പുറത്തുപോകുകയും അദ്ദേഹം തൽക്ഷണം മരണപ്പെടുകയും ചെയ്തു.

അദ്ദേഹം ജമാഅത്തിലെ സജീവ അംഗമായിരുന്നു, കൃത്യമായി നമസ്കരിക്കുന്ന വ്യക്തിയും സന്ദേശം പ്രചരിപ്പിക്കുന്നതിൽ സജീവവുമായിരുന്നു. അദ്ദേഹം തൻ്റെ പ്രാദേശിക ജമാഅത്തിലെ ലോക്കൽ പ്രസിഡൻറായി സേവനമനുഷ്ഠിച്ചിരുന്നു. ഭാര്യയും ഒരു മകനും മൂന്ന് പെൺമക്കളുമുണ്ട്. അദ്ദേഹം തഹജ്ജുദ് കൃത്യമായി നിർവഹിക്കുന്ന വ്യക്തിയായിരുന്നു. അദ്ദേഹത്തിന് നിരവധി സദ്ഗുണങ്ങളുണ്ടായിരുന്നു, കൂടാതെ സാമ്പത്തിക ത്യാഗങ്ങൾ ചെയ്യുന്നതിൽ അദ്ദേഹം മുൻപന്തിയിലായിരുന്നു.
അദ്ദേഹത്തിൻ്റെ ഭാര്യ പറയുന്നത്, അദ്ദേഹം മാതൃകാപരമായ ഒരു ഭർത്താവായിരുന്നു എന്നും അദ്ദേഹത്തിൽ നിന്ന് താൻ ഒരുപാട് കാര്യങ്ങൾ പഠിച്ചു എന്നും ആണ്. അദ്ദേഹത്തിന് ഖിലാഫത്തുമായി വളരെ ആഴത്തിലുള്ള ബന്ധമുണ്ടായിരുന്നു. തൻ്റെ കുട്ടികളോട് ജമാഅത്തായി നമസ്കരിക്കാൻ അദ്ദേഹം എപ്പോഴും നിർദേശിക്കുമായിരുന്നു. അദ്ദേഹത്തിൻ്റെ മകൾ പറയുന്നു, തങ്ങളുടെ ആവശ്യങ്ങളെക്കുറിച്ച് അദ്ദേഹം എപ്പോഴും ആകുലനായിരുന്നു. സമുദായത്തിന് വേണ്ടിയുള്ള സേവനത്തിൽ ദിവസം മുഴുവൻ ചെലവഴിച്ച ശേഷവും, വീട്ടിലെത്തി കുട്ടികളുടെ കാര്യങ്ങൾ ശ്രദ്ധിക്കുകയും അവർക്ക് എന്തെങ്കിലും ആവശ്യമുണ്ടോ എന്ന് അന്വേഷിക്കുകയും ചെയ്യുമായിരുന്നു. അദ്ദേഹം വീട്ടിൽ സൗഹൃദപരമായ ഒരന്തരീക്ഷം നിലനിർത്തിയിരുന്നു.
അദ്ദേഹത്തിൻ്റെ മകൻ പറയുന്നത്, തൻ്റെ പിതാവ് ഒരു റോൾ മോഡലായിരുന്നു എന്നും അദ്ദേഹത്തിൻ്റെ പാത പിന്തുടരാൻ താൻ പരിശ്രമിക്കുമെന്നുമാണ്. പ്രബോധനത്തിനായി എല്ലാ ഞായറാഴ്ചയും അദ്ദേഹം പിതാവിനൊപ്പം പോകുമായിരുന്നു. വിശുദ്ധ ഖുർആൻ മുഴുവനായും മനഃപാഠമാക്കാൻ അദ്ദേഹം മകനെ സഹായിക്കുകയും ചെയ്തു. അദ്ദേഹത്തിൻ്റെ അമ്മ പറയുന്നത്, തൻ്റെ മകൻ സമുദായത്തോട് അർപ്പണബോധമുള്ളവനും എല്ലാവരെയും സ്നേഹിക്കുന്നവനുമായിരുന്നു എന്നാണ്. അദ്ദേഹത്തിന് പ്രബോധനത്തിലും ജമാഅത്തായി നമസ്കരിക്കുന്നതിലും വലിയ താൽപ്പര്യമുണ്ടായിരുന്നു. താൻ നമസ്കരിച്ചോ എന്നറിയാൻ ജോലിസ്ഥലത്ത് നിന്ന് ഉമ്മയെ വിളിക്കുകയും, നമസ്കരിച്ചിട്ടില്ലെങ്കിൽ, അദ്ദേഹത്തിനായി കാത്തിരിക്കാൻ ആവശ്യപ്പെടുകയും, തുടർന്ന് അവർ ഒരുമിച്ച് നമസ്കരിക്കുകയും ചെയ്യുമായിരുന്നു.
അല്ലാഹു മർഹൂമിന് പൊറുത്തുകൊടുക്കുകയും കരുണ കാണിക്കുകയും അദ്ദേഹത്തിൻ്റെ കുടുംബത്തിന് ക്ഷമ പ്രദാനം ചെയ്യുകയും ചെയ്യട്ടെ. അദ്ദേഹത്തിൻ്റെ കുടുംബം അദ്ദേഹത്തിൻ്റെ സദ്ഗുണങ്ങളുടെ പാത പിന്തുടരട്ടെ എന്ന് ഹുസൂർ തിരുമനസ്സ് ദുആ ചെയ്തു.