ഭാരവാഹികളുടെ അലംഭാവം മൂലം ചില സമയങ്ങളില്‍ തീരുമാനങ്ങള്‍ പൂര്‍ണമായി നടപ്പിലാക്കാന്‍ കഴിയാറില്ല എന്ന് ഖലീഫ തിരുമനസ്സ് പറഞ്ഞു. അത്തരം സന്ദര്‍ഭങ്ങളില്‍, തീരുമാനം നടപ്പിലാക്കുന്നതിനായി ശൂറാ പ്രതിനിധികള്‍ ജമാഅത്ത് അംഗങ്ങളെ മാത്രമല്ല, ഭാരവാഹികളെ ഓര്‍മ്മിപ്പിക്കുകയും വേണം. ഇത് ചെയ്തിട്ടും അവര്‍ തീരുമാനം നടപ്പാക്കുന്നില്ലെങ്കില്‍ ശൂറ പ്രതിനിധി കേന്ദ്രത്തിലേക്ക് കത്തയക്കേണ്ടതാണ്. തങ്ങളുടെ ഉത്തരവാദിത്വങ്ങളില്‍ നിന്ന് ഒഴിഞ്ഞുമാറാന്‍ ഈ ലോകത്ത് ഒരാള്‍ക്ക് സാധിച്ചേക്കും, എന്നാല്‍ അവരെ ഏല്‍പ്പിച്ച ഉത്തരവാദിത്വങ്ങളെക്കുറിച്ച് അല്ലാഹു അവരോട് ചോദിക്കുന്നതാണ്. ഇത് വളരെ ജാഗ്രത പാലിക്കേണ്ട കാര്യമാണ്. ഒരു പ്രതിനിധിക്ക് ഏതെങ്കിലും തരത്തിലുള്ള വ്യക്തിപരമായ അഭിപ്രായവ്യത്യാസമുണ്ടായാല്‍, ഭാരവാഹിക്കെതിരെ ഒരു പ്രതിനിധി പരാതി നല്കരുത് എന്നതും ഓര്‍മിക്കേണ്ടതാണ്. അവര്‍ എപ്പോഴും നീതിയുടെ പാതയില്‍ സഞ്ചരിക്കണം. ഈ നിര്‍ദ്ദേശം ഇനിയൊരിക്കലും കാലത്തിന്റെ ഖലീഫയുടെ മുമ്പാകെ അവതരിപ്പിക്കേണ്ടി വരാത്ത തരത്തില്‍ തീരുമാനങ്ങള്‍ നടപ്പിലാക്കണം.

കാലത്തിന്റെ  ഖലീഫയുടെ തീരുമാനം പൂര്‍ണമായി നടപ്പിലാക്കുന്ന ചില സജീവ ജമാഅത്തുകള്‍ ഉണ്ട്. തീരുമാനങ്ങള്‍ വളരെ ആവേശത്തോടെ നടപ്പിലാക്കുന്നതിലേക്ക് അവരെ സഹായിച്ച കാര്യങ്ങള്‍ എന്താണെന്ന് പഠിക്കുകയും, അതേ തത്വങ്ങള്‍ സജീവമല്ലാത്ത ജമാഅത്തുകളുമായി പങ്കിടുകയും ചെയ്യേണ്ടതാണ്.

കേവലം വാക്കുകള്‍ കൊണ്ട് ലോകത്ത് ഒരു മാറ്റം കൊണ്ടുവരാന്‍ കഴിയില്ല. പകരം നാം നമ്മുടെ പ്രവൃത്തികള്‍ മുന്നോട്ട് വയ്ക്കണമെന്ന് ഹദ്രത്ത് മിര്‍സാ മസ്റൂര്‍ അഹ്‌മദ്(അയ്യദഹുല്ലാഹ്) പറഞ്ഞു. ശൂറാ പ്രതിനിധികള്‍ അവരുടെ ആരാധനയുടെ നിലവാരം മെച്ചപ്പെടുത്തുന്നതിലും പള്ളിയില്‍ ഹാജരാകുന്നതിലും ശ്രദ്ധ കേന്ദ്രീകരിക്കുകയാണെങ്കില്‍, മൊത്തത്തിലുള്ള ഹാജര്‍ പള്ളികളില്‍ മൂന്നിരട്ടിയായി വര്‍ദ്ധിക്കും. ശൂറാ പ്രതിനിധികള്‍ മറ്റുള്ളവരോട് ദയയോടെയും അനുകമ്പയോടെയും പെരുമാറുകയും അവര്‍ക്കുവേണ്ടി പ്രാര്‍ഥിക്കുകയും, കാലത്തിന്റെ ഖലീഫയോടുള്ള തങ്ങളുടെ അനുസരണത്തിന്റെ നിലവാരം വര്‍ദ്ധിപ്പിക്കുകയും ചെയ്യുകയാണെങ്കില്‍, ജമാഅത്തിനുള്ളില്‍ വിപ്ലവകരമായ മാറ്റം സംഭവിക്കുന്നതാണ്. വലിയൊരു ദൗത്യമാണ് നമ്മില്‍ അര്‍പിതമായിരിക്കുന്നത്. ഇസ്‌ലാമിന്റെ മനോഹരമായ അധ്യാപനങ്ങള്‍ ലോകത്ത് പ്രചരിപ്പിക്കാനും, ദൈവത്തിന്റെ ഏകത്വത്തിന് കീഴില്‍ മുഴുലോകത്തെയും കൊണ്ടുവരാനുമുള്ള ദൗത്യവുമായാണ് വാഗ്ദത്ത മസീഹ്(അ) അയക്കപ്പെട്ടത്. ഈ ദൗത്യത്തിന്റെ പൂര്‍ത്തീകരണത്തിന് നിരന്തരമായ പരിശ്രമം ആവശ്യമാണ്. ഈ ജോലികളുടെ പൂര്‍ത്തീകരണത്തിനും ഫണ്ട് ആവശ്യമാണ്. അതിനാല്‍, ബജറ്റ് ചര്‍ച്ച ചെയ്യുമ്പോള്‍, കുറഞ്ഞ ചിലവില്‍ കൂടുതല്‍ കാര്യങ്ങള്‍ എങ്ങനെ നടപ്പില്‍ വരുത്താം എന്ന് ചിന്തിക്കേണ്ടതാണ്.

നീതിയുടെ മാര്‍ഗങ്ങള്‍ അവലംബിച്ചുകൊണ്ട് നമ്മുടെ ഉത്തരവാദിത്വങ്ങള്‍ നിര്‍വേറ്റുന്നവരായി നാം മാറുന്നതിനും, അല്ലാഹു നമ്മുടെ പോരായ്മകള്‍ പൊറുത്തു തരികയും അവന്റെ അനുഗ്രഹങ്ങള്‍ നമ്മില്‍ നിരന്തരം വര്‍ഷിപ്പിക്കുകയും ചെയ്യുന്നതിനും ഖുത്ബയുടെ അവസാനത്തില്‍ ഖലീഫ തിരുമനസ്സ് പ്രാര്‍ഥിക്കുകയുണ്ടായി.