ഹിജ്‌റ 8 ശവ്വാൽ മാസത്തിൽ ബനൂ ജസീമയിലേക്ക് ഹദ്‌റത്ത് ഖാലിദ് ബിൻ വലീദ് (റ) ന്റെ നേതൃത്വത്തിൽ സൈനിക നീക്കം നടന്നു. മക്കാ വിജയത്തിനുശേഷം, വിഗ്രഹമായ ഉസ്സയെ ധ്വംസിച്ച് 
ഹദ്‌റത്ത് ഖാലിദ് (റ) തിരിച്ചെത്തിയപ്പോൾ, നബി (സ) അദ്ദേഹത്തെ ബനൂജസീമ ഗോത്രത്തിലേക്ക് അയച്ചു, അവരെ ഇസ്ലാമിലേക്ക് ക്ഷണിക്കാനും അവരുമായി യുദ്ധം ചെയ്യരുതെന്നും നിർദ്ദേശിച്ചു. ഹദ്‌റത്ത് ഖാലിദ് ബിൻ വലീദ് (റ) 350 പുരുഷന്മാരുമായി പുറപ്പെട്ടു, അവിടെ എത്തിയപ്പോൾ, ആളുകൾ യുദ്ധത്തിന് തയ്യാറായി നിൽക്കുന്നത് അദ്ദേഹം കണ്ടു. ഹദ്‌റത്ത് ഖാലിദ് (റ) അവരോട് ആയുധം താഴെയിടാൻ ആവശ്യപ്പെട്ടു, അവർ അങ്ങനെ ചെയ്തപ്പോൾ, അവരുടെ ഉദ്ദേശ്യങ്ങൾ വ്യക്തമല്ലാത്തതിനാൽ അവരെ തടവുകാരായി പിടികൂടി. ഹദ്‌റത്ത് ഖാലിദ് (റ) അവരുടെ വിശ്വാസത്തെക്കുറിച്ച് ചോദിച്ചപ്പോൾ, അവർ മുസ്ലീങ്ങളാണെന്നും അറേബ്യയിലെ മറ്റൊരു ഗോത്രവുമായി ഭിന്നത ഉണ്ടായിരുന്നതിനാൽ ഒരു മുൻകരുതൽ എന്ന നിലയിലാണ് ആയുധം ധരിച്ചത് എന്നും മറുപടി നൽകിയതായി ഒരു നിവേദനത്തിൽ രേഖപ്പെടുത്തിയിട്ടുണ്ട്. എന്നിരുന്നാലും, ഈ മറുപടി ആദ്യം ഹദ്‌റത്ത് ഖാലിദിൽ (റ) സംശയം ജനിപ്പിച്ചു. അതിനാൽ രാത്രിയിൽ ഹദ്‌റത്ത് ഖാലിദ് (റ) തടവുകാരെ കൊല്ലാൻ നിർദ്ദേശിച്ചുവെന്ന് രേഖപ്പെടുത്തിയിട്ടുണ്ട്. ചില മുസ്ലിങ്ങൾ തങ്ങളുടെ തടവുകാരെ വധിക്കുകയുണ്ടായി. എന്നിരുന്നാലും, മുഹാജിറുകളും (പാലായനം ചെയ്ത് മക്കയിൽ എത്തിയവർ) അൻസാറുകളും (മദീന സ്വദേശികൾ) ഹദ്‌റത്ത് ഖാലിദ് (റ) യുടെ അഭിപ്രായത്തോട് യോജിച്ചില്ല, അവർ മുസ്ലീങ്ങളാണെന്ന് പറഞ്ഞ് അത് നിരസിക്കുകയും തങ്ങളുടെ തടവുകാരെ മോചിപ്പിക്കാനൊരുങ്ങുകയും ചെയ്തു. ഇതിനെ കുറിച്ച് അറിഞ്ഞ പ്രവാചകൻ (സ) ദുഃഖിതനായി, ഹദ്‌റത്ത് ഖാലിദ് (റ) വിനെ അവരെ വധിക്കാനായി അയച്ചിട്ടില്ലെന്നും, മറിച്ച് അവരെ ഇസ്ലാമിലേക്ക് ക്ഷണിക്കാൻ വേണ്ടിയാണ് അയച്ചതെന്നും പറഞ്ഞു. ഹദ്‌റത്ത് ഖാലിദ് (റ) ചെയ്തതിൽ താൻ പങ്കാളിയല്ലെന്ന് പറഞ്ഞുകൊണ്ട് തിരുനബി (സ) ദൈവത്തോട് പ്രാർത്ഥിച്ചു. തുടർന്ന് അദ്ദേഹം ഹദ്‌റത്ത് ഖാലിദിനോട് (റ) അദ്ദേഹത്തിന്റെ പ്രവൃത്തികളിലും തിടുക്കത്തിലും അതൃപ്തി പ്രകടിപ്പിച്ചു. പിന്നീട് കൊല്ലപ്പെട്ട തടവുകാരുടെ ബന്ധുക്കൾക്ക് നഷ്ടപരിഹാരം നൽകാൻ തിരുനബി (സ) ഹദ്‌റത്ത് അലി (റ) യെ അയച്ചു. ഹദ്‌റത്ത് അലി (റ) തിരുനബി (സ)യുടെ അടുക്കലേക്ക് മടങ്ങിവന്ന്, ഏറ്റവും ചെറിയ വസ്തുക്കൾ പോലും ബനൂ ജസീമ ഗോത്രത്തിന് തിരികെ നൽകിയതായും, ബാക്കിയായ സമ്പത്തും അവർക്ക് നൽകിയതായും അറിയിച്ചു. ഇതിൽ പ്രവാചകൻ (സ) സന്തുഷ്ടനാകുകയും ഹദ്‌റത്ത് അലി (റ) യെ അഭിനന്ദിക്കുകയും ചെയ്തു.

ഈ യാത്ര തിരുനബി (സ) കണ്ട ഒരു സ്വപ്നത്തിന്റെ പൂർത്തീകരണം കൂടിയായിരുന്നു. ആ സ്വപ്നത്തിൽ അദ്ദേഹം ഹൈസ് എന്നൊരു ഭക്ഷണം കഴിക്കുന്നതായി കണ്ടു, ആദ്യം അത് നല്ലതായി തോന്നി; എന്നിരുന്നാലും, പിന്നീട് അത് ശ്വാസം മുട്ടിക്കാൻ തുടങ്ങി. ആ സമയത്താണ് ഹദ്‌റത്ത് അലി (റ) വന്ന് സ്വപ്നത്തിൽ ശ്വാസം മുട്ടുന്നതിൽ നിന്ന് തിരുനബി (സ) യെ രക്ഷിച്ചത്. തിരുനബി (സ) നല്ല ഉദ്ദേശ്യത്തോടെ ഒരു സംഘത്തെ അയക്കുമെന്നും എന്നാൽ അത് നിരാശക്ക് കാരണമാകുമെന്നും ഹദ്‌റത്ത് അബൂബക്കർ (റ) ഈ സ്വപ്നത്തെ വ്യാഖ്യാനിച്ചു, തുടർന്ന് ഹദ്‌റത്ത് അലിയെ (റ) ഈ വിഷയം പരിഹരിക്കാൻ അയക്കുമെന്നും അദ്ദേഹം പറഞ്ഞു.
ഈ സംഭവത്തിന്റെ വിശദാംശങ്ങൾ വ്യക്തമാക്കുന്ന വിവിധ പരാമർശങ്ങൾ സമർപ്പിച്ചുകൊണ്ട് ഇത് ഹദ്‌റത്ത് ഖാലിദ് (റ) യുടെ ഉദ്ദേശ്യമായിരുന്നില്ലെന്ന് ഖലീഫാ തിരുമനസ്സ് വ്യക്തമാക്കുകയുണ്ടായി. തീരുമാനം എടുക്കുന്നതിൽ വന്ന ഒരു പിശകായിരുന്നു. തിരുനബി (സ) ഈ വിഷയത്തെ കുറിച്ച് അന്വേഷിച്ചപ്പോൾ, പ്രതികാരത്തിന് പകരം, നഷ്ടപരിഹാരം നൽകുന്നതാണ് കൂടുതൽ ഉചിതമെന്ന് അദ്ദേഹം തീരുമാനിച്ചു. ഹദ്‌റത്ത് ഖാലിദ് (റ) ക്ഷമാപണം നടത്തിയപ്പോൾ, തിരുനബി (സ) അദ്ദേഹത്തിന് മാപ്പുനൽകുകയും, കുറച്ചു കഴിഞ്ഞപ്പോൾ, ഹുനൈൻ യുദ്ധത്തിൽ ഒരു സംഘത്തിന്റെ നേതാവായി ഹദ്‌റത്ത് ഖാലിദ് (റ) നെ നിയമിക്കുകയും ചെയ്തു.