വാഗ്ദത്ത മസീഹ്(അ) ജോലി ചെയ്തിരുന്ന കാലത്ത് വരുമാനത്തിൽ നിന്ന് അദ്ദേഹത്തിന് അത്യാവശ്യമായിട്ടുള്ളത് മാത്രം മാറ്റിവെച്ചുകൊണ്ട് ബാക്കി വരുന്ന തുക വിധവകൾക്കും ആവശ്യക്കാർക്കും വിതരണം ചെയ്യുമായിരുന്നു. അങ്ങനെ, വാഗ്ദത്ത മസീഹ്(അ) തന്റെ യൗവനകാലം മുതൽ തന്നെ ഉദാരത എന്ന സവിശേഷത എങ്ങനെയാണ് സ്വന്തമാക്കിയിരുന്നത് എന്ന് ഇത് കാണിച്ചുതരുന്നു. അദ്ദേഹം പലപ്പോഴും മറ്റുള്ളവരിൽ നിന്ന് മറച്ചുകൊണ്ടാണ് സൽ പ്രവർത്തികൾ ചെയ്തിരുന്നത്. രഹസ്യസ്വഭാവമുള്ള ഒരു ജീവിതം നയിച്ചിരുന്നതിനാൽ മറ്റുള്ളവരെ പരിചരിക്കാൻ അദ്ദേഹം സ്വീകരിക്കുന്ന നടപടികൾ ആരും അറിയുമായിരുന്നില്ല. എന്നിരുന്നാലും, അദ്ദേഹത്തിന്റെ ജീവിതം പരസ്യമായപ്പോൾ, അദ്ദേഹത്തിന്റെ ദൈനംദിന പ്രവർത്തനങ്ങൾ നിരീക്ഷിച്ചിരുന്ന ആളുകൾ അദ്ദേഹത്തിന്റെ ഉദാരമായ പ്രവൃത്തികൾക്ക് സാക്ഷ്യം പറയാൻ തുടങ്ങി.

ഒരിക്കൽ ജമാഅത്ത് നമസ്കാരത്തിന് ശേഷം ഒരാൾ വാഗ്ദത്ത മസീഹി(അ)നെ സമീപിച്ച്, തനിക്ക് സാമ്പത്തിക സഹായം ആവശ്യമുണ്ടെന്ന് വളരെ പതുക്കെ പറഞ്ഞു. പ്രാർത്ഥന കഴിഞ്ഞതിന് ശേഷം പള്ളിയിൽ പരസ്പരം സംസാരിക്കുന്ന മറ്റുള്ളവരുടെ ശബ്ദങ്ങളുമായി കലർന്നുപോകും വിധം അത്രയും ശാന്തമായ സ്വരത്തിലായിരുന്നു അയാൾ ചോദിച്ചത്. അതുകൊണ്ടുതന്നെ അയാളുടെ ശബ്ദം വാഗ്ദത്ത മസീഹ്(അ)ൻ്റെ ശ്രദ്ധയിൽ പെട്ടില്ല, ആ മഹാത്‌മാവ് തന്റെ വഴിയിലൂടെ നടന്നുനീങ്ങുകയും ചെയ്തു. കുറച്ച് സമയം കഴിഞ്ഞപ്പോൾ ആ വ്യക്തി ചോദിച്ചതെന്താണെന്ന് വാഗ്ദത്ത മസീഹ്(അ)ന് മനസ്സിലാക്കുകയും അത് അദ്ദേഹത്തിന്റെ ഹൃദയത്തെ ആഴത്തിൽ വേദനിപ്പിക്കുകയും ചെയ്തു. വാഗ്ദത്ത മസീഹ്(അ) ആ മനുഷ്യനെ അന്വേഷിച്ച് ആളെ അയച്ചെങ്കിലും അയാൾ അപ്പോഴേക്കും പോയിരുന്നു. പിന്നീട്, അസർ നമസ്കാരത്തിന് ശേഷം അതേ വ്യക്തി വാഗ്ദത്ത മസീഹി(അ)നെ സമീപിച്ച് വീണ്ടും സഹായം അഭ്യർത്ഥിച്ചു. അപ്പോൾത്തന്നെ വാഗ്ദത്ത മസീഹ്(അ) പോക്കറ്റിൽ കയ്യിടുകയും അയാൾക്ക് കുറച്ച് പണം നൽകുകയും ചെയ്തു. പിന്നീട് വാഗ്ദത്ത മസീഹ്(അ) വിശദീകരിച്ചു, ആ മനുഷ്യനെ കണ്ടെത്താൻ കഴിയാതെ വന്നപ്പോൾ ശ്രദ്ധിക്കാൻ കഴിയാത്തതിനാൽ താൻ എന്തോ വലിയ തെറ്റ് ചെയ്തപോലെ കനത്ത ഭാരം അനുഭവപ്പെട്ടിരുന്നു. അയാൾ തിരിച്ചുവന്നത് അദ്ദേഹത്തിന് ആശ്വാസമായി. കൂടാതെ അയാളുടെ മടങ്ങിവരവിനായി പ്രാർത്ഥിക്കുകയും ചെയ്തിരുന്നു. അങ്ങനെ സംഭവിച്ചില്ലായിരുന്നെങ്കിൽ താൻ കടുത്ത വിഷമത്തിലായേനെ എന്ന് വാഗ്ദത്ത മസീഹ്(അ) പറഞ്ഞു.

പള്ളിയിൽ സ്ഥിരമായി വന്ന് ജനാലയ്ക്കരികിൽ ഇരുന്ന് “ഗുലാം അഹ്‌മദ്, എനിക്കൊരു രൂപ വേണം” എന്ന് വിളിച്ചുപറയുന്ന ഒരാളുണ്ടായിരുന്നു. വാഗ്ദത്ത മസീഹ്(അ) പലപ്പോഴും പ്രധാനപ്പെട്ട വിവിധ ജോലികളിൽ വ്യാപൃതനായിരിക്കുമായിരുന്നു. ആ സമയത്തെല്ലാം ഈ വ്യക്തി ഇടയ്ക്കിടെ ഇതേ രീതിയിൽ വിളിച്ചുപറയുമായിരുന്നു. ഇത് പലർക്കും അരോചകമായി തോന്നി, അവർ അയാളെ ശാസിച്ചാൽ മറുപടി പറയുമായിരുന്നു, “ഞാൻ നിങ്ങളോടാണോ ആവശ്യപ്പെട്ടത്? ഞാൻ ഗുലാം അഹ്‌മദിനോട് ചോദിക്കാനാണ് വന്നത്.” ആരെങ്കിലും ആ യാചകനെ ശകാരിച്ചുവെന്ന് വാഗ്ദത്ത മസീഹ്(അ) അറിഞ്ഞാൽ അദ്ദേഹം അത് ഒട്ടും ഇഷ്ടപ്പെടുമായിരുന്നില്ല. പകരം പുഞ്ചിരിച്ചുകൊണ്ട് അയാൾക്ക് കുറച്ച് പണം കൊടുക്കുമായിരുന്നു. യാചകരെ ദീർഘനേരം ചോദിപ്പിച്ച് നിർത്താതിരിക്കുക എന്നത് വാഗ്ദത്ത മസീഹി(അ)ന്റെ ഉയർന്ന ധാർമ്മികനിലവാരമായിരുന്നു.

ഒരിക്കൽ ഒരു യാചകൻ വാഗ്ദത്ത മസീഹി(അ)നെ സമീപിച്ച് “ദാതാ, ദാതാ,” (അതായത് “നൽകുന്നവൻ, നൽകുന്നവൻ”) എന്ന് തുടർച്ചയായി പറഞ്ഞുകൊണ്ടിരുന്നു. മറ്റൊരു വിധത്തിൽ പറഞ്ഞാൽ അയാൾ വാഗ്ദത്ത മസീഹി(അ)നോട് പണം ചോദിക്കുകയായിരുന്നു. “അല്ലാഹുവാണ് നൽകുന്നവൻ” എന്ന് ആ യാചകന് മറുപടി നൽകിയ ശേഷം വാഗ്ദത്ത മസീഹ്(അ) തന്റെ വീടിനുള്ളിലേക്ക് പോയി. പിന്നീട്, വാഗ്ദത്ത മസീഹ്(അ) വീട്ടിൽ നിന്ന് പുറത്തിറങ്ങിയപ്പോൾ യാചകൻ പറഞ്ഞു, “അല്ലാഹുവാണ് നൽകുന്നവൻ, എനിക്ക് എന്തെങ്കിലും നൽകണമെന്ന് അങ്ങയോട് അഭ്യർത്ഥിക്കുന്നു.” ഇതിനുത്തരമായി വാഗ്ദത്ത മസീഹ്(അ) അയാൾക്ക് കുറച്ച് പണം നൽകി. അതായത് വാഗ്ദത്ത മസീഹ്(അ) ഉദാരവാനായിരുന്നു എന്ന് മാത്രമല്ല, ഇത്തരം അധ്യാപനങ്ങൾ പകർന്നുകൊടുക്കാൻ എപ്പോഴും ശ്രമിക്കുകയും ചെയ്തിരുന്നു.

ഒരിക്കൽ വാഗ്ദത്ത മസീഹ്(അ) ഒരു കൂട്ടം ആളുകളോട് സംസാരിച്ചുകൊണ്ടിരിക്കുമ്പോൾ ഒരു യാചകൻ വന്ന് അദ്ദേഹത്തോട് ഉറക്കെ എന്തോ ആവശ്യപ്പെട്ടു. സദസ്സിൽ ഇരുന്ന ഒരാൾക്ക് യാചകൻ വാഗ്ദത്ത മസീഹി(അ)ന്റെ സംസാരം തടസ്സപ്പെടുത്തിയത് ഇഷ്ടമായില്ല. അതിനാൽ അയാൾ വാതിൽ അടച്ചു. ഇതുകണ്ട വാഗ്ദത്ത മസീഹ്(അ), വാതിലടച്ച വ്യക്തിയോട് തന്റെ വീട്ടിൽ ചെന്ന് യാചകന് നൽകാൻ എന്തെങ്കിലും കൊണ്ടുവരാൻ ആവശ്യപ്പെട്ടു. ശേഷം വാഗ്ദത്ത മസീഹ്(അ) പറഞ്ഞു, “ഒരു യാചകന് മുന്നിൽ വാതിലടയ്ക്കുന്നത് നല്ല കാര്യമല്ല.”

വാഗ്ദത്ത മസീഹ്(അ)ന്റെ അടുത്ത് ഇടയ്ക്കിടെ ചെന്ന് പല തുകകൾ ചോദിക്കുന്ന ശീലമുള്ള ഒരു യാചകൻ ഉണ്ടായിരുന്നു. ആ മഹാത്മാവ് തിരക്കിലാണെങ്കിൽപ്പോലും അയാൾ ചോദിച്ചുകൊണ്ടേയിരിക്കുകയും താൻ ആവശ്യപ്പെട്ടത് ലഭിക്കാതെ അവിടെ നിന്നു പോവുകയും ചെയ്യുമായിരുന്നില്ല. കാലക്രമേണ വാഗ്ദത്ത മസീഹ്(അ) ഈ യാചകനെ മനസ്സിലാക്കുകയും അയാൾ ചോദിക്കുന്ന തുക എന്താണെങ്കിലും അത് അയാൾക്ക് നൽകിയേക്കണമെന്ന് പറയുകയും ചെയ്തു.