മേഘങ്ങൾ മഴ വർഷിക്കുന്നത് പോലെയായിരുന്നു ഹദ്‌റത് മസീഹ് മൗഊദ് (അ) ന്റെ ഔദാര്യം, റമദാൻ മാസത്തിൽ അത് വർദ്ധിക്കുമായിരുന്നു. ആവശ്യക്കാർക്ക് രഹസ്യമായി അദ്ദേഹം സഹായം നല്കിയിരുന്നു, എത്ര വിലപിടിപ്പുള്ളതാണെങ്കിലും അത് മറ്റുള്ളവർക്ക് നല്കാൻ അദ്ദേഹം ഒട്ടും മടിച്ചിരുന്നില്ല. അദ്ദേഹം താൻ “മസീഹ് ” ആണെന്ന വാദമുന്നയിക്കുന്നതിന് മുമ്പ് തന്നെ, അതായത്, ആർക്കും അദ്ദേഹത്തെ അറിയാത്ത കാലത്ത് പോലും, അബ്ദുൽ ഗഫ്ഫാർ കശ്മീരിയുടെ വിവാഹസമയത്ത് വിലപിടിപ്പുള്ള രണ്ട് ആഭരണങ്ങൾ നല്കി അദ്ദേഹം സഹായിച്ചിട്ടുണ്ട്. ആർക്കെങ്കിലും സഹായം ആവശ്യമുണ്ടെങ്കിൽ അദ്ദേഹം അത് ഒരിക്കലും നിരസിച്ചിരുന്നില്ല; മറിച്ച്, അവർ ചോദിക്കുന്നതിന് മുമ്പ് തന്നെ അവരുടെ ആവശ്യങ്ങൾ മനസ്സിലാക്കി അദ്ദേഹം സഹായിക്കുമായിരുന്നു.

ഹദ്‌റത്ത് മിർസാ ബശീറുദ്ദീൻ മഹ്‌മൂദ് അഹ്‌മദ് (റ) ന്റെ വിവാഹസമയത്ത്, പണം സമ്പാദിക്കാൻ ഒരു പാണ സ്ത്രീ വന്ന് മൃദംഗം വായിക്കുമായിരുന്നു. ഇത് കേട്ട ഹദ്‌റത്ത് മസീഹ് മൗഊദ് (അ), അവരെ തടയരുതെന്നും പണം നല്കണമെന്നും നിർദേശിച്ചു. ശൈത്യകാലം വരുന്നുണ്ടെന്നും തണുപ്പ് അനുഭവപ്പെടുമെന്നും അവർ പറഞ്ഞപ്പോൾ, അവർക്ക് ഒരു പുതപ്പും കൂടി നല്കാൻ അദ്ദേഹം നിർദേശിച്ചു.