വാഗ്ദത്ത മസീഹ് (അ) എഴുതുന്നു,

“മുൻപൊരു പദാർത്ഥമോ വസ്തുവോ ഇല്ലാതെ തന്നെ തന്റെ കല്പനയാലും വിധിയാലും എല്ലാ ആത്മാക്കളെയും ശരീരങ്ങളെയും സൃഷ്ടിച്ചുകൊണ്ട് തന്റെ മഹത്തായ ശക്തി വെളിപ്പെടുത്തിയവനും; അധ്യാപകന്റെയോ വഴികാട്ടിയുടെയോ സഹായമില്ലാതെ തന്നെ എല്ലാ ഉന്നതരായ പ്രവാചകന്മാർക്കും ജ്ഞാനം പകർന്നുനൽകുകയും അവരുടെ ധാർമ്മികതയെ പൂർണ്ണതയിലെത്തിക്കുകയും ചെയ്തുകൊണ്ട് തന്റെ അനന്തമായ അനുഗ്രഹത്തിന്റെ അടയാളം വെളിപ്പെടുത്തിയവനുമായ സർവ്വശക്തനായ നാഥൻ അളവറ്റ സ്തുതിക്കും ആരാധനയ്ക്കും അർഹനാകുന്നു.”

പരമദയാലുവും കരുണാനിധിയുമായ അല്ലാഹു പരിശുദ്ധനാകുന്നു; നമ്മുടെ യാതൊരു യോഗ്യതയും കൂടാതെ തന്നെ ദരിദ്രരും മർത്യരുമായ നമുക്ക് ആവശ്യമായതെല്ലാം അവൻ നൽകി. നമ്മുടെ ശാരീരിക നിലനിൽപ്പിനായി അവൻ സൂര്യനെയും ചന്ദ്രനെയും മേഘങ്ങളെയും കാറ്റിനെയും നിശ്ചയിച്ചു. നമ്മുടെ ആത്മീയ ആവശ്യങ്ങൾ നിറവേറ്റുന്നതിനായി അവൻ തൗറാത്തും ഇൻജീലും ഖുർആനും മറ്റ് എല്ലാ ദൈവിക വേദഗ്രന്ഥങ്ങളും അവയുടെ ഉചിതമായ സമയങ്ങളിൽ അവതരിപ്പിച്ചു. അല്ലാഹുവേ, നിന്നിലേക്ക് നയിക്കുന്ന പാതയിലേക്ക് ഞങ്ങളെ വഴിനടത്തിയതിനും, നിന്റെ പരിശുദ്ധ ഗ്രന്ഥങ്ങൾ അവതരിപ്പിച്ചുകൊണ്ട് ചിന്തയിലെയും യുക്തിയിലെയും തെറ്റുകളിൽ നിന്ന് ഞങ്ങളെ രക്ഷിച്ചതിനും നിനക്ക് അനന്തമായ സ്തുതികൾ. പ്രവാചകന്മാരുടെ നേതാവായ ഹദ്റത്ത് മുഹമ്മദ് മുസ്തഫ (സ) അവിടുത്തെ കുടുംബത്തിന്മേലും അവിടുത്തെ അനുചരന്മാർക്ക് മേലും ഞങ്ങൾ അനുഗ്രഹാശിസ്സുകൾ വേണ്ടി ദുആ ചെയ്യുന്നു. വഴിതെറ്റിപ്പോയ ഒരു വലിയ ലോകത്തെ ദൈവം ആ പ്രവാചകനിലൂടെ നേർവഴിയിലേക്ക് നയിച്ചു. വഴിതെറ്റിയ ജനങ്ങളെ സത്യപാതയിലേക്ക് തിരികെ നയിച്ച അധ്യാപകനും ഉപകാരിയുമായിരുന്നു അവിടുന്ന്;

ബഹുദൈവാരാധനയിൽ നിന്നും വിഗ്രഹങ്ങളുടെ ശാപത്തിൽ നിന്നും ജനങ്ങളെ മോചിപ്പിച്ച ദയാലുവും കരുണാമയനുമായ വ്യക്തിത്വം; തൗഹീദിന്റെ (ദൈവത്തിന്റെ ഏകത്വം) വെളിച്ചത്താൽ ലോകത്തെ പ്രകാശിപ്പിച്ച പ്രകാശവും വെളിച്ചം പരത്തിയവനും; രോഗാതുരമായ ഹൃദയങ്ങളെ നീതിയുടെ പാതയിലൂടെ സഞ്ചരിക്കാൻ പ്രാപ്തരാക്കിയ സൗഖ്യദായകനും ഭിഷഗ്വരനും; ജീവാമൃതം കൊണ്ട് ആത്മീയമായി മരിച്ചവരെ പുനർജീവിപ്പിച്ച ഉദാരനായ അത്ഭുതപ്രവർത്തകൻ; തന്റെ സമുദായത്തിന് വേണ്ടി വേദനയും ദുഃഖവും സഹിച്ച കരുണാമയനും ദയാലുവും; മരണത്തിന്റെ വായയിൽ നിന്ന് നമ്മെ രക്ഷിച്ച ധീരനായ വ്യക്തി; തന്റെ നാഥന്റെ മുന്നിൽ പൂർണ്ണമായി കീഴടങ്ങി തലകുനിക്കുകയും സ്വന്തം വ്യക്തിത്വത്തെ തികച്ചും ഇല്ലാതാക്കുകയും ചെയ്ത വിനീതനും നിസ്വാർത്ഥനുമായ മനുഷ്യൻ; ദൈവത്തിന്റെ ഏകത്വത്തിൽ പൂർണ്ണമായി വിശ്വസിക്കുകയും ദൈവത്തിന്റെ മഹത്വമല്ലാതെ മറ്റൊന്നിനെയും ഭയപ്പെടാതെ അവിടുത്തെ മുന്നിൽ മറ്റെല്ലാറ്റിനെയും നിസ്സാരമായി കാണുകയും ചെയ്ത അറിവിന്റെ സമുദ്രം; എഴുത്തും വായനയും അറിയാത്തവനായിരുന്നിട്ടും ദൈവീക ജ്ഞാനത്തിൽ എല്ലാവരെയും കവച്ചുവെക്കുകയും, എല്ലാ ജനതകളും അനുഭവിച്ച തെറ്റുകളും കുറ്റങ്ങളും അവർക്ക് ബോധ്യപ്പെടുത്തിക്കൊടുക്കുകയും ചെയ്ത ദൈവീക ശക്തിയുടെ അത്ഭുതം.’ (ബറാഹീനേ അഹ്മദിയ്യ – ഭാഗം 1, ഇംഗ്ലീഷ് പരിഭാഷ, പേജ് 25-26)

ലോകരക്ഷിതാവായ നാഥാ! നിന്റെ എല്ലാ അനുഗ്രഹങ്ങൾക്കും നിനക്ക് നന്ദി അർപ്പിക്കുക എന്നത് എന്നെക്കൊണ്ട് ആവാത്ത കാര്യമാണ്. നീ ഏറ്റവും കരുണാമയനും ദയാലുവും ആകുന്നു, നീ എനിക്ക് ചൊരിഞ്ഞുതന്ന അനുഗ്രഹങ്ങൾ എണ്ണമറ്റവയാണ്. എന്റെ പാപങ്ങൾ എനിക്ക് പൊറുത്തുതരേണമേ, അല്ലാത്തപക്ഷം ഞാൻ നശിച്ചുപോയേക്കാം. എനിക്ക് ജീവൻ ലഭിക്കേണ്ടതിന് നിന്റെ നേർക്കുള്ള ആത്മാർത്ഥമായ സ്നേഹം കൊണ്ട് എന്റെ ഹൃദയത്തെ നിറയ്ക്കേണമേ. എന്റെ കുറവുകൾ മറയ്ക്കുകയും നിന്റെ പ്രീതിക്ക് കാരണമാകുന്ന പ്രവൃത്തികൾ ചെയ്യാൻ എന്നെ അനുവദിക്കുകയും ചെയ്യേണമേ. നിന്റെ ശിക്ഷ എന്നിൽ പതിക്കാതിരിക്കാൻ നിന്റെ ഉദാരമായ സന്നിധിയിൽ ഞാൻ അഭയം തേടുന്നു. കരുണ കാണിച്ചു കൊണ്ട് ഈ ലോകത്തെയും പരലോകത്തെയും ആപത്തുകളിൽ നിന്ന് എന്നെ രക്ഷിക്കേണമേ. എന്തെന്നാൽ എല്ലാ അനുഗ്രഹങ്ങളും ദയയും നിന്റെ കയ്യിലാണ്. ആമീൻ. (മൽഫൂസാത്ത്, ഇംഗ്ലീഷ് പരിഭാഷ, വോള്യം 1, പേജ് 241)

ആ ഉപകാരിയായ നാഥന് ആയിരമായിരം സ്തുതികൾ അർപ്പിക്കുന്നു. ദൈവത്തെക്കുറിച്ചുള്ള ജ്ഞാനം കരസ്ഥമാക്കുന്നതിനുള്ള മാർഗ്ഗമായ ഒരു മതത്തെ അവൻ നമുക്ക് നൽകി; അതിന് സമാനമായ ഒന്ന് ഒരു യുഗത്തിലും കണ്ടെത്തിയിട്ടില്ല. ഏത് നിർമ്മലനായ പ്രവാചകൻ വഴിയാണോ നമ്മൾ ഈ പരിശുദ്ധ മതത്തിൽ പ്രവേശിച്ചത്, അവിടുത്തെ മേൽ ആയിരക്കണക്കിന് അനുഗ്രഹങ്ങൾ ഉണ്ടാകട്ടെ; തങ്ങളുടെ രക്തം കൊണ്ട് ഈ തോട്ടം നനച്ച തിരുനബിയുടെ അനുചരന്മാരുടെ മേൽ ആയിരക്കണക്കിന് കാരുണ്യം ചൊരിയപ്പെടട്ടെ. (ബറാഹീനേ അഹ്മദിയ്യ – ഭാഗം 5, ഇംഗ്ലീഷ് പരിഭാഷ, പേജ് 43)

വാഗ്ദത്ത മസീഹ് (അ) തന്റെ മക്കൾക്ക് ഒരു കഥ പറഞ്ഞു കൊടുത്തുകൊണ്ട് നന്ദിയുള്ളവരായിരിക്കേണ്ടതിന്റെ ഈ പാഠങ്ങൾ സ്വന്തം വീട്ടിലും പകർന്നു നൽകി. അവിടുന്ന് പറഞ്ഞു:

ഒരിക്കൽ ഒരു കഷണ്ടിക്കാരനും ഒരു അന്ധനും ഉണ്ടായിരുന്നു. ഒരു മാലാഖ കഷണ്ടിക്കാരന്റെ അടുക്കൽ ചെന്ന് അദ്ദേഹത്തിന്റെ ആഗ്രഹം എന്താണെന്ന് ചോദിച്ചു. തനിക്ക് മുടിയും സമ്പത്തും വേണമെന്നാണ് അയാൾ മറുപടി നൽകിയത്. മാലാഖ അദ്ദേഹത്തിന്റെ തലയിൽ കൈതലോടിയപ്പോൾ മുടി വളരുകയും, അയാൾക്ക് ധാരാളം സമ്പത്ത് ലഭിക്കുകയും ചെയ്തു.

തുടർന്ന് മാലാഖ അന്ധന്റെ അടുക്കൽ ചെന്ന് അദ്ദേഹത്തിന്റെ ആഗ്രഹം ചോദിച്ചു. തനിക്ക് കാഴ്ചശക്തി ലഭിക്കണമെന്നും സമ്പത്ത് വേണമെന്നുമായിരുന്നു അന്ധന്റെ മറുപടി. മാലാഖ അദ്ദേഹത്തിന്റെ കണ്ണുകളിൽ കൈവെച്ചപ്പോൾ കാഴ്ച തിരികെ ലഭിക്കുകയും, അയാൾക്കും സമ്പത്ത് നൽകപ്പെടുകയും ചെയ്തു.

പിന്നീട് അതേ മാലാഖ ഒരു യാചകന്റെ രൂപത്തിൽ തിരിച്ചെത്തി, പണ്ട് കഷണ്ടിക്കാരനായിരുന്നയാളോട് സഹായം അഭ്യർത്ഥിച്ചു. എന്നാൽ അയാൾ യാചകനെ വെറുപ്പോടെ തിരിച്ചയച്ചു. അതോടെ മാലാഖ വീണ്ടും അദ്ദേഹത്തിന്റെ തലയിൽ കൈതലോടുകയും, അയാളുടെ മുടിയും സമ്പത്തും പൂർണ്ണമായി നഷ്ടപ്പെടുകയും ചെയ്തു.
ശേഷം മാലാഖ യാചകന്റെ രൂപത്തിൽ കാഴ്ച തിരികെ ലഭിച്ചയാളുടെ അടുക്കൽ ചെന്ന് സഹായം ചോദിച്ചു. തനിക്കുള്ളതെല്ലാം ദൈവത്തിൽ നിന്നുള്ളതാണെന്നും, അതിനാൽ തന്റെ സമ്പത്തിൽ നിന്ന് ആവശ്യമുള്ളത്ര എടുത്തുകൊള്ളാനും അയാൾ മറുപടി നൽകി. ഇതിൽ ദൈവം പ്രീതനാവുകയും, അയാൾക്ക് കൂടുതൽ സമ്പത്ത് നൽകി അനുഗ്രഹിക്കുകയും ചെയ്തു.

ഇപ്രകാരം, ദൈവത്തോട് നന്ദിയുള്ളവരായിരിക്കുന്നത് ദൈവത്തിൽ നിന്ന് കൂടുതൽ അനുഗ്രഹങ്ങൾ ലഭിക്കുന്നതിന് കാരണമാകുമെന്ന് വാഗ്ദത്ത മസീഹ് (അ) തന്റെ മക്കളെ പഠിപ്പിച്ചു.

വാഗ്ദത്ത മസീഹ് (അ) ശൈത്യകാലത്ത് റമദാൻ വരുമ്പോൾ നോമ്പ് എടുക്കുന്നത് ശാരീരികമായി കുറഞ്ഞ പ്രയാസമുള്ളതാണെന്നും, നോമ്പോടു കൂടി തന്നെ പകൽ സമയത്ത് കൂടുതൽ കാര്യങ്ങൾ ചെയ്യാൻ സാധിക്കുമെന്നതിനാലും അത് ദൈവത്തിൽ നിന്നുള്ള ഒരു അനുഗ്രഹമാണെന്ന് പ്രസ്താവിച്ചു. വാഗ്ദത്ത മസീഹ് (അ) ഇതിനെപ്പോലും ഒരു അനുഗ്രഹമായി കാണുകയും ദൈവത്തോട് നന്ദിയുള്ളവനായിരിക്കുകയും ചെയ്തു.

മനുഷ്യകുലത്തിന് പ്രയോജനകരമായ എന്തെങ്കിലും കാര്യങ്ങൾ ആരെങ്കിലും ചെയ്യുകയാണെങ്കിൽ വാഗ്ദത്ത മസീഹ് (അ) അവരോടും നന്ദി പ്രകടിപ്പിക്കുമായിരുന്നു. ഉദാഹരണത്തിന്, വൈദ്യനായിരുന്ന ഹദ്റത്ത് മൗലാന ഹകീം നൂറുദ്ദീൻ സാഹിബ് (റ) ജനങ്ങളുടെ വേദന അകറ്റാൻ സഹായിച്ചിരുന്നതിനാൽ അദ്ദേഹം ദൈവത്തിൽ നിന്നുള്ള ഒരു അനുഗ്രഹമാണെന്ന് അവിടുന്ന് വ്യക്തമാക്കി. അതിനാൽ, അവിടുന്ന് അദ്ദേഹത്തോട് നന്ദി പ്രകടിപ്പിക്കുക മാത്രമല്ല, മനുഷ്യരാശിയെ സഹായിക്കാനുള്ള കഴിവ് അദ്ദേഹത്തിന് നൽകിയതിന് ദൈവത്തോട് നന്ദി പറയുകയും ചെയ്യുമായിരുന്നു.

ഈ വിഷയത്തെക്കുറിച്ച് തുടർന്നും സംസാരിക്കുമെന്ന് ഖലീഫാ തിരുമനസ്സ് പ്രസ്താവിച്ചു.