ഒരിക്കൽ ഡോ. ഹെൻറി മാർട്ടിൻ ക്ലർക്ക് എന്ന വ്യക്തി വാഗ്ദത്ത മസീഹ് (അ)-നെതിരെ വധശ്രമക്കുറ്റം ചുമത്തിയതായി ഹുസൂർ അൻവർ (അയ്യദഹുല്ലാഹു) പറഞ്ഞു. തനിക്ക് വധശിക്ഷ വരെ ലഭിക്കാവുന്ന അങ്ങേയറ്റം അപകടകരമായ ഒരു കേസായിരുന്നു ഇതെന്ന് വാഗ്ദത്ത മസീഹ് (അ) പ്രസ്താവിച്ചിട്ടുണ്ട്. വാഗ്ദത്ത മസീഹ് (അ) പറഞ്ഞു:

” പരമസാത്വികനും  ദൈവനിയുക്തനുമായ ഈസാനബി (അ)നെ യഹൂദന്മാരെ ഭയന്ന് അന്ന് ജയിലിലടച്ചിരുന്നു. സമാനമായ ഒരു കേസ് എനിക്കെതിരെയും ഫയൽ ചെയ്യപ്പെട്ടു. വ്യത്യാസം ഇതാണ്: ഈസാനബി (അ)നെതിരെയുള്ള കേസ് യഹൂദന്മാരാണ് കൊണ്ടുവന്നതെങ്കിൽ, എൻറെ കാര്യത്തിൽ ഒരു ക്രിസ്ത്യൻ പുരോഹിതനും ഡോക്ടറുമായ ഡോ. മാർട്ടിൻ ക്ലർക്കാണ് എന്നെ വധശ്രമത്തിന് പ്രതിയാക്കിയത്.

അദ്ദേഹം ഹാജരാക്കിയ തെളിവുകൾ വളരെ പഴുതടച്ചതായിരുന്നു. ഈ ജമാഅത്തിൻറെ കടുത്ത ശത്രുവായിരുന്ന മൗലവി അബു സഈദ് മുഹമ്മദ് ഹുസൈൻ ബട്ടാൽവി പോലും സാക്ഷിയായി ഹാജരാകുകയും എനിക്കെതിരെ കേസ് തെളിയിക്കാൻ പരമാവധി ശ്രമിക്കുകയും ചെയ്തു. ഗുർദാസ്പൂർ ഡെപ്യൂട്ടി കമ്മീഷണർ ക്യാപ്റ്റൻ ഡഗ്ലസ് ആണ് കേസ് പരിഗണിച്ചത്. കേസ് പൂർണ്ണമായി കേൾക്കുകയും എനിക്കെതിരെയുള്ള എല്ലാ സാക്ഷികളെയും വലിയ ആരവങ്ങളോടെ ഹാജരാക്കുകയും ചെയ്തു. ആ സാഹചര്യത്തിൽ, ഏറ്റവും മികച്ച വക്കീലിന് പോലും ഞാൻ കുറ്റവിമുക്തനാക്കപ്പെടുമെന്ന് പറയാൻ കഴിയില്ലായിരുന്നു. അന്നത്തെ അവസ്ഥ അനുസരിച്ച് ഞാൻ ആജീവനാന്തം നാടുകടത്തപ്പെടുകയോ വധശിക്ഷയ്ക്കോ വിധിക്കപ്പെടുകയോ ചെയ്യുമായിരുന്നു. എന്നാൽ അല്ലാഹു കേസിനെക്കുറിച്ച് എനിക്ക് മുൻകൂട്ടി മുന്നറിയിപ്പ് നൽകിയത് പോലെ തന്നെ, ഞാൻ കുറ്റവിമുക്തനാക്കപ്പെടുമെന്നും അവൻ എനിക്ക് വെളിപ്പെടുത്തിത്തന്നു. എൻറെ ജമാഅത്തിലെ വലിയൊരു വിഭാഗം ആളുകൾക്ക് ഈ വെളിപാടിനെക്കുറിച്ച് അറിയാമായിരുന്നു.

മജിസ്‌ട്രേറ്റ് കേസ് സെഷൻസ് കോടതിക്ക് വിടുമെന്ന് ശത്രുക്കൾ വിശ്വസിച്ചിരുന്ന ഘട്ടത്തിൽ, ക്യാപ്റ്റൻ ഡഗ്ലസ് പോലീസ് സൂപ്രണ്ടിനോട് പറഞ്ഞത് ഈ കേസ് കെട്ടിച്ചമച്ചതാണെന്ന് തനിക്ക് തോന്നുന്നു എന്നാണ്. പ്രതി ഡോ. ക്ലർക്കിനെ കൊല്ലാൻ ഒരാളെ അയച്ചു എന്ന് വിശ്വസിക്കാൻ അദ്ദേഹത്തിന് കഴിഞ്ഞില്ല. കേസ് നേരിട്ട് അന്വേഷിക്കാൻ അദ്ദേഹം സൂപ്രണ്ടിനോട് ആവശ്യപ്പെട്ടു. ഈ സമയത്ത് എൻറെ ശത്രുക്കൾ എനിക്കെതിരെ ഗൂഢാലോചന നടത്തുക മാത്രമല്ല, തങ്ങളുടെ പ്രാർത്ഥനകൾ സ്വീകരിക്കപ്പെടുന്നു എന്ന് അവകാശപ്പെടുന്നവർ എന്നെ ശിക്ഷിക്കാനായി ദൈവത്തോട് കണ്ണീരോടെ അപേക്ഷിക്കുകയുമായിരുന്നു. എന്നാൽ ദൈവത്തോട് ആർക്ക് പോരാടാനാകും? ചില ആളുകൾ ക്യാപ്റ്റൻ ഡഗ്ലസിനെ സമീപിച്ച് അദ്ദേഹത്തെ സ്വാധീനിക്കാൻ ശ്രമിച്ചതായും എനിക്കറിയാം. എന്നാൽ നീതിമാനും നിഷ്പക്ഷനുമായ അദ്ദേഹം അത്തരം അനീതിയുടെ ഭാഗമാകാൻ കഴിയില്ലെന്ന് അവരോട് പറഞ്ഞു. ചുരുക്കത്തിൽ, പുനരന്വേഷണത്തിനായി കേസ് ക്യാപ്റ്റൻ ലെ മാർച്ചന്ദിനെ ഏല്പിച്ചപ്പോൾ, അദ്ദേഹം അബ്ദുൽ ഹമീദിനെ വിളിച്ചു വരുത്തി സത്യം പറയാൻ ആവശ്യപ്പെട്ടു. അബ്ദുൽ ഹമീദ് ആദ്യം ഡെപ്യൂട്ടി കമ്മീഷണറോട് പറഞ്ഞ അതേ കഥ തന്നെ ആവർത്തിച്ചു. കാരണം, തൻറെ മൊഴിയിൽ നിന്ന് അല്പം മാറിയാൽ പോലും വിചാരണ നേരിടേണ്ടി വരുമെന്ന് അയാൾക്ക് നേരത്തെ മുന്നറിയിപ്പ് നൽകിയിരുന്നു. എന്നാൽ ക്യാപ്റ്റൻ ലെ മാർച്ചന്ദ് വീണ്ടും സത്യം പറയാൻ ആവശ്യപ്പെട്ടപ്പോൾ അയാൾ കരയാൻ തുടങ്ങുകയും ക്യാപ്റ്റൻറെ  കാൽക്കൽ വീണ് സംരക്ഷണം ചോദിക്കുകയും ചെയ്തു. ക്യാപ്റ്റൻ അദ്ദേഹത്തിന് സംരക്ഷണം ഉറപ്പുനൽകി.

അതോടെ അയാൾ സത്യം വെളിപ്പെടുത്തി. താൻ നേരത്തെ മൊഴി നൽകിയത് സമ്മർദ്ദത്തിന് വഴങ്ങിയാണെന്നും മിർസാ സാഹിബ്  തന്നെ ആരെയും കൊല്ലാൻ അയച്ചിട്ടില്ലെന്നും അയാൾ സമ്മതിച്ചു.

ഇതുകേട്ട് സന്തോഷവാനായ ക്യാപ്റ്റൻ, താൻ കേസ് തെളിയിച്ചതായി ഡെപ്പ്യൂ ട്ടി കമ്മീഷണർക്ക് ടെലിഗ്രാം അയച്ചു. കേസ് വീണ്ടും ഗുർദാസ്പൂരിൽ പരിഗണനയ്ക്ക് വന്നു. സത്യം പുറത്തുവന്നതിൽ ഡെപ്യൂട്ടി കമ്മീഷണർക്ക് വലിയ സന്തോഷമുണ്ടായിരുന്നു. എന്നാൽ എനിക്കെതിരെ കള്ളസാക്ഷി പറഞ്ഞ ക്രിസ്ത്യാനികളോട് അദ്ദേഹം കോപാകുലനായി. എനിക്ക് വേണമെങ്കിൽ അവർക്കെതിരെ കേസ് ഫയൽ ചെയ്യാമെന്ന് അദ്ദേഹം എന്നോട് പറഞ്ഞു. എന്നാൽ എനിക്ക് നിയമനടപടികളോട് താല്പര്യമില്ലാത്തതിനാൽ, എന്റെ കേസ് അല്ലാഹുവിന്റെ കോടതിയിൽ ഫയൽ ചെയ്തിട്ടുണ്ടെന്നും അതിനാൽ മറ്റൊരു കേസിന് താല്പര്യമില്ലെന്നും ഞാൻ പറഞ്ഞു. ഉടൻ തന്നെ ക്യാപ്റ്റൻ ഡഗ്ലസ് വിധിന്യായം എഴുതുകയും അവിടെ കൂടിയിരുന്ന ജനങ്ങൾക്ക് മുന്നിൽ അത് വായിച്ചു കേൾപ്പിക്കുകയും ചെയ്തു. അദ്ദേഹം എന്നെ അഭിസംബോധന ചെയ്തുകൊണ്ട് പറഞ്ഞു, ‘അഭിനന്ദനങ്ങൾ, നിങ്ങൾ കുറ്റവിമുക്തനായിരിക്കുന്നു.’

ആ സമയത്ത് ലോകം മുഴുവൻ എനിക്കെതിരെ അണിനിരന്നതായി തോന്നി. ആളുകൾ നിങ്ങളെ ഉപദ്രവിക്കാൻ തീരുമാനിക്കുമ്പോൾ ലോകം മുഴുവൻ നിങ്ങൾക്കെതിരെ തിരിയുന്നത് സാധാരണമാണ്; എന്നാൽ അല്ലാഹു മാത്രമാണ് തൻറെ യഥാർഥ ദാസന്മാരുടെ രക്ഷയ്ക്കായി എത്തുന്നത്.” (ലക്ചർ ലുധിയാന, പേജ് 28-31)