നന്ദിപ്രകടനത്തിൽ വാഗ്ദത്ത മസീഹിന്റെ (അ) ഉന്നതമായ മാതൃകകൾ

ഒരിക്കൽ, വാഗ്ദത്ത മസീഹിന് (അ) തനിക്ക് നേരിടേണ്ടിവന്ന പ്രയാസങ്ങൾ നീക്കുന്നതിനും സഹായത്തിനുമായി 21 രൂപ ലഭിക്കുമെന്ന് ദൈവത്തിൽ നിന്ന് ഒരു ദിവ്യസന്ദേശം ലഭിക്കുകയുണ്ടായി. കൃത്യമായ തുക തന്നെ പരാമർശിച്ചുകൊണ്ടുള്ളതായിരുന്നു ഈ സന്ദേശം, മാത്രവുമല്ല ഇത് ഒരിക്കലും പ്രതീക്ഷിച്ചതോ ആഗ്രഹിച്ചതോ ആയ ഒന്നായിരുന്നില്ല. ഇത്രയും കൃത്യമായ ഒരു പ്രവചനമായതിനാൽ, ഇത് ദൈവീക അടയാളമായി അദ്ദേഹം ചില ആര്യ സമാജക്കാരുമായും പങ്കുവെച്ചു. ദിവസങ്ങൾക്ക് ശേഷം വാഗ്ദത്ത മസീഹിന് (അ) ഇതേ സന്ദേശം വീണ്ടും ലഭിച്ചു. ഈ സന്ദേശം പൂർത്തിയാകാൻ പോകുന്ന ദിവസം ഇതാണെന്ന് അപ്പോൾ അദ്ദേഹത്തിന് മനസ്സിലായി. രണ്ടാമതും ഈ ഇൽഹാം ലഭിച്ച് വെറും മൂന്ന് മിനിറ്റിനുശേഷം ഒരാൾ അദ്ദേഹത്തിന്റെ അടുത്തെത്തി ഒരു രൂപ നൽകി. തൊട്ടുപിന്നാലെ അദ്ദേഹത്തിന് ഒരു കത്ത് ലഭിച്ചു. അത് തുറന്നു നോക്കിയപ്പോൾ അഞ്ച് രൂപയുടെ ഒരു മണി ഓർഡർ ആയിരുന്നു അത്. തനിക്ക് ഇപ്പോൾ ആറ് രൂപ ലഭിച്ചിട്ടുണ്ടെങ്കിലും അത് 21 രൂപയായിട്ടില്ലല്ലോ എന്നും, അമുസ്‌ലിംകൾക്ക് മുൻപിൽ ഇതൊരു അടയാളമായി താൻ പ്രസ്താവിച്ചതാണല്ലോ എന്നും, ഇനി എന്താണ് സംഭവിക്കുക എന്നും വാഗ്ദത്ത മസീഹ് (അ) ചിന്തിച്ചു. അതിനു പിന്നാലെ അദ്ദേഹത്തിന് അതേ ഇൽഹാം വീണ്ടും ലഭിച്ചു. രണ്ടുമൂന്ന് ദിവസങ്ങൾക്ക് ശേഷം, ആദ്യമായി ഈ ഇൽഹാം ലഭിച്ച അതെ ദിവസം തന്നെ അദ്ദേഹത്തിന് ഇരുപത് രൂപയുടെ ഒരു മണി ഓർഡർ അയച്ചിട്ടുണ്ടായിരുന്നു എന്ന വിവരമറിഞ്ഞു. അങ്ങനെ ആ പ്രവചനം കൃത്യമായി പൂർത്തിയായി. ദൈവത്തോടുള്ള നന്ദിസൂചകമായും ഈ പ്രവചന നിവർത്തിയിലുള്ള സന്തോഷത്താലും അദ്ദേഹം ആ പണം ഉപയോഗിച്ച് മധുരം വാങ്ങുകയും, ഈ പ്രവചനത്തെക്കുറിച്ച് മുൻപ് പറഞ്ഞിരുന്ന ആര്യ സമാജക്കാർക്ക് അത് വിതരണം ചെയ്യുകയും ചെയ്തു.
വാഗ്ദത്ത മസീഹ് (അ) എഴുതുന്നു:

“എനിക്ക് അനുകൂലമായ അടയാളങ്ങൾ പ്രത്യക്ഷപ്പെടാത്ത ഒരു ജനതയും ഇല്ല, എന്റെ അടയാളങ്ങൾക്ക് സാക്ഷ്യം വഹിക്കാത്ത ഒരു വിഭാഗവുമില്ല. ഈ അടയാളങ്ങൾക്ക് സാക്ഷ്യം വഹിച്ചവരുടെ എണ്ണം പത്ത് കോടിയോളം വരുമെന്ന് പറയുന്നതിൽ ഒട്ടും അതിശയോക്തിയില്ല. എന്നാൽ എതിരാളികളുടെ അവസ്ഥ തീർച്ചയായും ദയനീയമാണ്; കാരണം ഈ അടയാളങ്ങളിൽ നിന്ന് അവർ ഒരു പ്രയോജനവും നേടിയില്ല. അവർക്ക് കാണിച്ചു കൊടുത്ത ഈ അടയാളങ്ങൾ ഹദ്റത്ത് ഈസാ ഇബ്നു മർയമിന്റെ (യേശു ക്രിസ്തുവിന്റെ) കാലത്ത് യഹൂദന്മാർക്ക് കാണിച്ചു കൊടുത്തിരുന്നുവെങ്കിൽ, അവർ ‘നിന്ദ്യത ബാധിച്ചവർ’ എന്ന് മുദ്രകുത്തപ്പെടുമായിരുന്നില്ല. ലൂത്ത് നബിയുടെ ജനം ഈ അടയാളങ്ങൾക്ക് സാക്ഷ്യം വഹിച്ചിരുന്നുവെങ്കിൽ, ശക്തമായ ആ ഭൂകമ്പത്താൽ അവർ മണ്ണിനടിയിൽ പോകുമായിരുന്നില്ല. എന്നാൽ പാറയേക്കാൾ കഠിനമാണെന്ന് തെളിഞ്ഞ ഈ ഹൃദയങ്ങൾക്ക് നാശം! അവരുടെ ഹൃദയങ്ങളെ ഗ്രസിച്ചിരിക്കുന്ന അന്ധകാരം വളരെ കടുത്തതായിരിക്കുന്നു. എല്ലാത്തരം ഭൗതിക മാർഗ്ഗങ്ങളിലും ലോകം പുരോഗമിച്ചതുപോലെ തന്നെ, അവിശ്വാസത്തിലും മുന്നേറിയിരിക്കുന്നു എന്നതാണ് യാഥാർത്ഥ്യം. അതിനാൽ, ഈ ‘പുരോഗമന’ അവിശ്വാസത്തിന് സാധാരണ ശിക്ഷയല്ല ഉണ്ടാകേണ്ടത്, മറിച്ച് ലോകാരംഭം മുതൽ ഇതുവരെ ഇറങ്ങിയിട്ടില്ലാത്ത തരത്തിലുള്ള ഒരു ശിക്ഷ അതിനെ പിടികൂടേണ്ടതുണ്ട്. ഏതായാലും ദൈവത്തിന് ആയിരം നന്ദി; നമ്മുടെ എതിരാളികൾ സ്വീകരിക്കാൻ മടിക്കുകയും വിമുഖത കാണിക്കുകയും ചെയ്ത അതേ പ്രകാശം, നമ്മുടെ സ്വന്തം കാഴ്ചയുടെയും ആത്മീയ ഉൾക്കാഴ്ചയുടെയും പുരോഗതിക്ക് കാരണമായിത്തീർന്നു.”
(ഹഖീഖത്തുൽ വഹ്യ് പേജ് :378)

അല്ലാഹു നമ്മെയെല്ലാം നന്ദിയുടെ തത്ത്വം ശരിയായി ഗ്രഹിക്കാൻ പ്രാപ്തരാക്കട്ടെ. കൂടാതെ, വാഗ്ദത്ത മസീഹുമായി (അ) ബൈഅത്ത് ചെയ്ത് പ്രതിജ്ഞാബദ്ധരായ നമുക്ക് സത്യപ്രകാശവും ഉൾക്കാഴ്ചയും ദൈവീക തിരിച്ചറിവും പ്രദാനം ചെയ്യുമാറാകട്ടെ.