ഹദ്റത്ത് മിര്‍സാ ബശീർ അഹ്‌മദ്‌(റ) എഴുതുന്നു:

“മുസ്‌ലിങ്ങൾ മുറിവേറ്റവരെ ശുശ്രൂഷിച്ച്കൊണ്ടിരിക്കുന്ന വേളയിൽ, മറുഭാഗത്ത്, യുദ്ധമൈതാനത്ത് മക്കാ ഖുറൈശികൾ ക്രൂരമായ രീതിയിൽ മുസ്‌ലിം രക്തസാക്ഷികളുടെ ശരീരത്തെ വികൃതമാക്കിക്കൊണ്ടിരിക്കുകയായിരുന്നു. മക്കയിലെ രക്തദാഹികളായ നികൃഷ്ടർ കിരാത അനാചാരമായിരുന്ന മുസ്‌ല(മൃതദേഹം വികൃതമാക്കുന്ന അനാചാരം) അതിക്രൂരമായി ചെയ്തുകൊണ്ടിരുന്നു. അവരുടെ ഇഷ്ടമനുസരിച്ച് അവർ പലതും ചെയ്തുകൊണ്ടിരുന്നു. ഖുറൈശികളുടെ സ്ത്രീകൾ മുസ്‌ലിം ശുഹദാക്കളുടെ മൂക്കുകളും കാതുകളും ചെത്തിയെടുത്ത് ഹാരമായി അണിഞ്ഞു. അബു സുഫിയാന്‍റെ ഭാര്യ ഹിന്ദ്‌ ഹദ്റത്ത് ഹംസ(റ)ന്‍റെ കരൾ മുറിച്ചെടുത്ത് ചവച്ചു. വില്ല്യം മൂർ പറയുന്നു: ‘മൃതദേഹങ്ങളെ തീര്‍ത്തും കിരാതമായ നിലയിൽ വികൃതമാക്കി’.

മക്കാ നേതാക്കന്‍മാർ നബിതിരുമേനി(സ)യുടെ മൃതദേഹത്തിനായി യുദ്ധമൈതാനത്ത് വളരെ  നേരം കഠിനമായി തിരച്ചിൽ നടത്തി. ആ കാഴ്ചക്ക് വേണ്ടി അവരുടെ കണ്ണുകൾ ആര്‍ത്തിയോടെ പരതികൊണ്ടിരുന്നു. എന്നാൽ അവര്‍ക്കത് കാണാൻ കഴിഞ്ഞില്ല, കാണുക അസാധ്യവുമായിരുന്നു. ഈ തിരച്ചലിൽ അബൂ സുഫിയാന് പ്രതീക്ഷ നഷ്ടപ്പെട്ടപ്പോൾ തന്‍റെ ചില കൂട്ടാളികളെയും കൂട്ടി മലയിടുക്കിലേക്ക് നീങ്ങി. അതിന്‍റെ അടുത്ത് തന്നെ മുസ്‌ലിങ്ങളും ഉണ്ടായിരുന്നു. അവിടെ നിന്ന് അയാൾ വിളിച്ചു ചോദിച്ചു: ‘അല്ലയോ മുസ്‌ലിങ്ങളെ, നിങ്ങള്‍ക്കിടയിൽ മുഹമ്മദ്‌ ഉണ്ടോ.?’ നബിതിരുമേനി(സ) സഹാബാക്കളെ മറുപടി പറയുന്നതിൽ നിന്നും വിലക്കി. അതിനു ശേഷം അബൂസുഫിയാൻ അബൂബക്കറിനെ കുറിച്ചും ഉമറിനെ കുറിച്ചും അന്വേഷിച്ചു. നബിതിരുമേനി(സ) പറഞ്ഞതനുസരിച്ച് ആരും തന്നെ മറുപടി പറഞ്ഞില്ല. ഇത്രയുമായപ്പോൾ അബു സുഫിയാൻ അഹങ്കാരത്തോടെ ഉറക്കെ വിളിച്ച് പറഞ്ഞു; ‘ഇവരെല്ലാം തന്നെ മരിച്ചിരിക്കുന്നു. അവർ ജീവനോടെ ഉണ്ടെങ്കിൽ തീര്‍ച്ചയായും അവർ മറുപടി പറയുമായിരുന്നു.’ ഇത് കേട്ടപ്പോൾ ഹദ്റത്ത് ഉമറിന് തന്നെ നിയന്ത്രിക്കാൻ കഴിഞ്ഞില്ല. അദ്ദേഹം മറുപടി പറഞ്ഞു; ‘ഏ….അല്ലാഹുവിന്‍റെ ശത്രു, നീ കളവാണ് പറയുന്നത്. ഞങ്ങൾ എല്ലാവരും ജീവനോടെ തന്നെ ഉണ്ട്.  ഞങ്ങളുടെ കരങ്ങളാൽ അല്ലാഹു നിന്നെ അപമാനിക്കുന്നതാണ്.’

ഹദ്റത്ത് ഉമർ(റ)ന്‍റെ ശബ്ദം തിരിച്ചറിഞ്ഞ അബൂസുഫിയാൻ ചോദിച്ചു; ‘ഉമർ, സത്യം പറയുക, മുഹമ്മദ്(സ) നിങ്ങളിൽ ജീവനോടെയുണ്ടോ.?’ ‘തീര്‍ച്ചയായും തീര്‍ച്ചയായും’ ഹദ്റത്ത് ഉമർ പറഞ്ഞു; ‘അല്ലാഹുവിന്‍റെ അനുഗ്രഹത്താൽ അദ്ദേഹം ജീവനോടെയുണ്ട്, നിങ്ങൾ പറയുന്നതെല്ലാം കേള്‍ക്കുന്നുമുണ്ട്.’ അപ്പോൾ അബൂസുഫിയാൻ ശബ്ദം താഴ്ത്തികൊണ്ട് പറഞ്ഞു; ‘അങ്ങനെയെങ്കിൽ ഇബ്നു ഖമീഅ കളവാണ് പറഞ്ഞത്, എന്തെന്നാൽ ഞാൻ നിങ്ങളെ അയാളേക്കാൾ സത്യവനായി കണക്കാക്കുന്നു.’ അതിനു ശേഷം അബൂസുഫിയാൻ ഉറക്കെ വിളിച്ചു പറഞ്ഞു; അല്ലയോ ഹുബ്ല്‍ നിന്‍റെ നാമം മഹത്തായതാകുന്നു.’ നബിതിരുമേനി(സ) നേരത്തെ പറഞ്ഞതനുസരിച്ച് സഹാബാക്കൾ മറുപടി പറയാതെ നിശബ്ദരായിരുന്നു. തന്‍റെ പേര് വന്നപ്പോൾ നിശബ്ദരാകാൻ കല്‍പിച്ച നബിതിരുമേനി(സ) സര്‍വ്വശക്തനായ ദൈവത്തിന്‍റെ നാമത്തിനു പകരമായി ഒരു ബിംബത്തിന്‍റെ പേര് മഹത്വവല്‍ക്കരിച്ചത് കേട്ടപ്പോൾ അസ്വസ്ഥനായി, എന്ത്കൊണ്ട് നിങ്ങൾ മറുപടി പറയുന്നില്ല എന്ന് സഹാബാക്കളോട് ചോദിച്ചു. ഞങ്ങൾ എന്താണ് മറുപടി പറയേണ്ടത് അല്ലാഹുവിന്‍റെ ദൂതരെ എന്ന് അവർ ചോദിച്ചു. നബിതിരുമേനി പറഞ്ഞു; ‘മഹത്വവും ഗാംഭീര്യവും അല്ലാഹുവിനാകുന്നു എന്ന് പ്രഖ്യാപിക്കുക’. ഇത് കെട്ട അബൂസുഫിയാൻ മറുപടി പറഞ്ഞു; ‘ഞങ്ങള്‍ക്ക് ഉസ്സയുണ്ട്, നിങ്ങള്‍ക്ക് ഉസ്സയില്ല.’ നബിതിരുമേനി(സ) തന്‍റെ അനുചരരോട് ഇപ്രകാരം മറുപടി പറയാൻ നിര്‍ദേശിച്ചു; ഞങ്ങള്‍ക്ക് അല്ലാഹു സംരക്ഷകനായുണ്ട്. നിങ്ങള്‍ക്ക് സംരക്ഷകനായി ആരും തന്നെയില്ല.

ഇതിനു ശേഷം അബൂസുഫിയാൻ പറഞ്ഞു: ‘യുദ്ധം ഒരു തൊട്ടി പോലെയാണ്. അത് ഉയരുകയും താഴുകയും ചെയ്യും. ഈ ദിവസം ബദ്റിനുള്ള മറുപടിയാണ്. യുദ്ധമൈതാനത്ത് ചില മൃതശരീരങ്ങൾ വികൃതമക്കപ്പെട്ടതായി നിങ്ങള്‍ക്ക് കാണാം. അപ്രകാരം ചെയ്യാൻ ഞാൻ കല്പിച്ചിട്ടില്ല എങ്കിലും ഞാൻ അതിനെ തെറ്റായി കാണുന്നുമില്ല. അടുത്ത വര്‍ഷം ഇതേ ദിവസങ്ങളിൽ നമുക്ക് ബദ്റിൽ കാണാം.’ നബിതിരുമേനി(സ) പറഞ്ഞതനുസരിച്ച് ഒരു സഹാബി ഇപ്രകാരം മറുപടി പറഞ്ഞു; ‘വളരെ നല്ലത്, നമുക്ക് വീണ്ടും സന്ധിക്കാം.’

ഇതിനു ശേഷം അബൂസുഫിയാൻ തന്‍റെ കൂട്ടാളികളോടോത്ത് മലയിറങ്ങി, ഉടനേ തന്നെ മക്കയിലേക്ക് തിരിച്ചു. ഖുറൈശികള്‍ക്ക് മുസ്‌ലിങ്ങള്‍ക്ക് മേൽ വിജയം ലഭിച്ചിരുന്നു എങ്കിലും, ഈ അവസരത്തിൽ അവർ ആഗ്രഹിക്കുകയാണെങ്കിൽ അവര്‍ക്ക് മദീനയെ ആക്രമിച്ച് കീഴടക്കാനുള്ള അവസരം ഉണ്ടായിരുന്നു എന്ന് പറയാതെ വയ്യ. പക്ഷെ അല്ലാഹുവിന്‍റെ ശക്തി എത്രത്തോളമായിരുന്നു എന്നാൽ, ഖുറൈശികളുടെ മനസ്സിൽ ഒരു ഭയം ഉണ്ടായിരുന്നു. ഉഹുദിൽ ലഭിച്ച വിജയം തന്നെ ഭാഗ്യമാണെന്ന് കരുതി, അവർ മക്കയിലേക്ക് അതിവേഗം തിരിക്കുകയാണ് ബുദ്ധി എന്ന് കരുതി. എന്നിരുനാലും ഒരു മുന്‍കരുതൽ എന്ന നിലയിൽ നബിതിരുമേനി(സ) ഹദ്റത്ത് അബൂബക്കറും ഹദ്റത്ത് സുബൈറും അടങ്ങുന്ന എഴുപത് സഹാബാക്കളുടെ ഒരു സംഘത്തെ ഖുറൈശി സൈന്യത്തെ പിന്തുടരാൻ അയച്ചു.” ^[5]

ഇന്‍ശാ അല്ലാഹ് ഈ വിവരണങ്ങൾ ഇനിയും തുടരുന്നതാണ് എന്ന് ഖലീഫാ തിരുമനസ്സ് പറഞ്ഞു. തുടര്‍ന്ന് ലോകത്തിന്‍റെ അവസ്ഥയെ പരിഗണിച്ച് പ്രാര്‍ത്ഥനക്ക് ആഹ്വാനം ചെയ്തു.