നബി തിരുമേനി(സ) പറയുന്നു: എല്ലാ രാത്രിയിലും അല്ലാഹു ആകാശത്തിന്റെ അടിത്തട്ടിലേക്ക് ഇറങ്ങുന്നു. രാത്രിയുടെ മൂന്നിലൊന്ന് ശേഷിക്കുമ്പോൾ, അവൻ ചോദിക്കും, ‘ആരാണ് എന്നെ വിളിച്ച് പ്രാർത്ഥിക്കുന്നത്, അവരുടെ പ്രാർത്ഥനയ്ക്ക് ഞാൻ ഉത്തരം നൽകാം; ആരാണ് എന്നോട് അപേക്ഷിക്കുന്നത്, അവരുടെ അപേക്ഷയ്ക്ക് ഞാൻ മറുപടി നൽകാം; ആരാണോ പാപ പൊറുതിക്കായി തേടുന്നത്, അവരുടെ പാപങ്ങൾ ഞാൻ പൊറുത്തു തരാം. ഖലീഫാ തിരുമനസ്സ് പറയുന്നു, ഇത് റമദാനിൽ മാത്രം നടക്കുന്നതല്ല, എല്ലായ്പ്പോഴും സംഭവിക്കുന്നതാണ്. എന്നാൽ അതൊരു ശീലമാക്കുന്നതിന് വേണ്ടി റമദാനിൽ പ്രത്യേകമായ ശ്രദ്ധ ചെലുത്തിയിരിക്കുന്നു. ശീലമായി കഴിഞ്ഞാൽ എല്ലാ സമയങ്ങളിലും ഇത് തുടരുന്നതാണ്. അതിനാൽ അല്ലാഹുവിനോടുള്ള ബന്ധം നിലനിർത്തേണ്ടത് അനിവാര്യമാണ്. അങ്ങനെ അല്ലാഹു അവരുടെ സ്നേഹിതനായിത്തീരുന്നു.

നബി തിരുമേനി(സ) പറയുന്നു: അല്ലാഹു തൻ്റെ ദാസരോട് പെരുമാറുന്നത്, ദാസൻ അവനെക്കുറിച്ച് എന്താണോ ധരിച്ച് വെച്ചത് അതനുസരിച്ച് ആയിരിക്കും. ദാസൻ അവനെ ഹൃദയത്തിൽ ഓർക്കുകയാണെങ്കിൽ അവനും ഹൃദയത്തിൽ ഓർക്കുന്നതാണ്. ദാസൻ അവനെ ഒരു സദസ്സിൽ ഓർക്കുകയാണെങ്കിൽ, അതിനേക്കാൾ നല്ല സദസ്സിൽ അവൻ ദാസനെയും ഓർക്കും. ദാസൻ ഒരു ചാൺ അവനിലേക്ക് നീങ്ങിയാൽ അവൻ ഒരു മുഴം ദാസനിലേക്ക് നീങ്ങുന്നതാണ്. ദാസൻ അവനിലേക്ക് ഒരു മുഴം നീങ്ങിയാൽ അവൻ ദാസനിലേക്ക് രണ്ട് മുഴം നീങ്ങുന്നതാണ്. ദാസൻ അവനിലേക്ക് നടന്നു നീങ്ങിയാൽ അവൻ ദാസനിലേക്ക് ഓടി അടുക്കുന്നു. അതിനാൽ ഓരോ അഹ്‌മദിയും ദൈവസ്മരണയിൽ വ്യാപൃതരാകേണ്ടതാണ്. അവരുടെ ഓരോ പ്രവർത്തിയും ദൈവസാമിപ്യം കരസ്ഥമാക്കുന്നതിന് വേണ്ടിയായിരിക്കണം. അങ്ങനെയാണെങ്കിൽ അല്ലാഹു അവരിലേക്ക് ഓടി അടുക്കുകയും സ്നേഹത്തോടെ വാരിപ്പുണരുകയും ചെയ്യുന്നതാണ്. അല്ലാഹു നാമെല്ലാവരെയും സുഖത്തിലും ദുഃഖത്തിലും അവനെ സ്മരിക്കുന്നവരാക്കട്ടെ.

യൂനുസ് (അ) മത്സ്യത്തിന്റെ വയറ്റിൽ ആയിരുന്നപ്പോൾ ചെയ്ത ദുആയിലേക്ക് നബിതിരുമേനി(സ) നമ്മുടെ ശ്രദ്ധ തിരിക്കുന്നു:
“നീയല്ലാതെ മറ്റൊരു ആരാധ്യനുമില്ല, നീ പരിശുദ്ധനാണ്. തീർച്ചയായും ഞാൻ അക്രമികളിൽ പെട്ടവനാണ്.” (ഖുർആൻ, 21:88)

നബി തിരുമേനി(സ) പറയുന്നു: ബുദ്ധിമുട്ടുകളുടെ സമയത്ത് ആരെങ്കിലും ഈ പ്രാർത്ഥന ചെയ്യുകയാണെങ്കിൽ, അല്ലാഹു ആ പ്രാർത്ഥന സ്വീകരിക്കുന്നതാണ്. മനുഷ്യർ ദുർബലരാണ്, ചിലപ്പോൾ അവനോടുള്ള കടമകൾ ശരിയായി നിറവേറ്റാൻ സാധിച്ചില്ലെന്നിരിക്കാം, എന്നിട്ടും അവൻ അനുഗ്രഹങ്ങൾ ചൊരിയുന്നു. എന്തുകൊണ്ടാണ് അല്ലാഹു നമുക്ക് ഈ ദുആകൾ പഠിപ്പിച്ചു തന്നത്? അത് സ്വീകരിക്കപ്പെടുന്നതിനു വേണ്ടി തന്നെയാണ്, നിബന്ധന ഇത്രമാത്രം, അവൻെറ കൽപ്പനകൾ കേൾക്കുകയും അത് നിറവേറ്റാൻ ശ്രമിക്കുകയും ചെയ്യണം. മാത്രമല്ല നാം എത്രത്തോളം അവൻ്റെ കല്പനകൾ പാലിക്കുന്നുവെന്ന് സ്വയം വിലയിരുത്തുകയും വേണം.

വാഗ്ദത്ത മസീഹ്(അ) ഈ ദുആ വിശദീകരിച്ചുകൊണ്ട് പറയുന്നു: അല്ലാഹുവിന് തന്റെ തീരുമാനങ്ങൾ മാറ്റാനുള്ള കഴിവുണ്ടെന്ന് ഇവിടെ വ്യക്തമാണ്. ഒരാൾ അവൻെറ മുന്നിൽ വിലപിച്ച് പ്രാർത്ഥിക്കുകയും പാപ പൊറുതിക്കുവേണ്ടി തേടുകയും അവന്റെ കൽപ്പനകൾ നിറവേറ്റാൻ പരിശ്രമിക്കുകയും ചെയ്യുകയാണെങ്കിൽ അവർക്ക് ആപത്തുകളിൽ നിന്ന് രക്ഷപ്പെടാനാകും. പാപപൊറുതി അവർക്ക് വേണ്ടി ഒരു പരിചയമായി തീരുന്നതാണ്. വിശുദ്ധ ഖുർആൻ പറയുന്നു:
“അവർ പാപമോചനം തേടുമ്പോഴും, അല്ലാഹു അവരെ ശിക്ഷിക്കുകയില്ല.” (ഖുർആൻ, 8:34)

നബി തിരുമേനി(സ) പറയുന്നു: ഒരാൾ അല്ലാഹുവിലേക്ക് കൈകൾ ഉയർത്തുമ്പോൾ, അവ ശൂന്യമായി തിരികെ അയക്കപ്പെടുകയില്ല. നിഷ്കളങ്കമായ ഹൃദയത്തോടെ ചെയ്യുന്ന പ്രാർത്ഥനകളെ അവൻ നിരാകരിക്കുകയില്ല. അതിനാൽ നാം അവനോട് നിഷ്കളങ്കമായി പ്രാർത്ഥിക്കുകയും ക്ഷമ ചോദിക്കുകയും നന്മയിൽ ഉറച്ച് നിൽക്കുന്നതാണെന്ന് പ്രതിജ്ഞ ചെയ്യുകയും വേണം. റമദാനിന് ശേഷവും നാം ഇതിൽ സ്ഥിരചിത്തരായി നിലകൊള്ളുകയാണെങ്കിൽ, അല്ലാഹു നമ്മിലേക്ക് എങ്ങനെ ഓടിയടുക്കുന്നുവെന്ന് കാണാൻ സാധിക്കും.