തുടര്‍ന്ന് ഖലീഫാ തിരുമനസ്സ് അടുത്തിടെ നിര്യാതരായ ചില പരേതരെ സ്മരിക്കുകയും, അവരുടെ ജനാസ നമസ്ക്കരിക്കുന്നതാണെന്ന് പറയുകയും ചെയ്തു.

ലഈഖ് അഹ്‌മദ്‌ ചീമ:

ഏപ്രിൽ 18 ന് കറാച്ചിയിൽ വെച്ച് ലഈഖ് അഹ്‌മദ്‌ ചീമ രക്തസാക്ഷിയായി. ഒരു ജനക്കൂട്ടം അദ്ദേഹത്തെ ആക്രമിച്ചു, നിഷ്കരുണം രക്തസാക്ഷിയാക്കി. കറാച്ചിയിലെ അഹ്‌മദിയ്യാ ഹാളിന് പുറത്ത് ഒരു ജനക്കൂട്ടം തടിച്ചുകൂടിയതായി വിവരം ലഭിച്ചു. സാഹചര്യങ്ങൾ എന്താണെന്ന് അറിയാൻ ലഈഖ് അഹ്‌മദ്‌ ചീമയെ അയച്ചു. ആൾക്കൂട്ടം അദ്ദേഹത്തെ തിരിച്ചറിഞ്ഞപ്പോൾ ആക്രമിക്കുകയുണ്ടായി. അദ്ദേഹത്തെ വലിച്ചിഴക്കുകയും, ഇഷ്ടികകളും കല്ലുകളും ഉപയോഗിച്ച് അദ്ദേഹത്തെ രക്തസാക്ഷിയാക്കി. സംഭവം നടന്ന് അര മണിക്കൂർ കഴിഞ്ഞപ്പോഴാണ് പോലീസ് വന്നത്. അതിന് ശേഷമാണ് അദ്ദേഹത്തെ ആശുപത്രിയിൽ കൊണ്ടു പോയത്. അദ്ദേഹത്തിന് കാറുകളും മോട്ടോർ സൈക്കിളുകളും നന്നാക്കുന്ന ഒരു വർക്ക്‌ഷോപ്പ് ഉണ്ടായിരുന്നു. നല്ല പ്രവൃത്തിക്കും വിശ്വസ്തതക്കും അദ്ദേഹം പേരുകേട്ടവനായിരുന്നു. ജമാഅത്തിന് വേണ്ടി സേവനം ചെയ്യാൻ അദ്ദേഹം എപ്പോഴും തയ്യാറായിരുന്നു. അദ്ദേഹം പതിവായി നമസ്കാരങ്ങൾ അനുഷ്ഠിച്ചിരുന്നു, തന്റെ കുട്ടികളോടും കുടുംബാംഗങ്ങളോടും തൊഴിലാളികളോടും ഇക്കാര്യം ഉപദേശിക്കാറുമുണ്ടായിരുന്നു. അദ്ദേഹം തന്റെ ജോലിയെക്കാൾ പ്രാർത്ഥനകൾക്കായിരുന്നു മുൻഗണന നൽകിയിരുന്നത്. അദ്ദേഹം വളരെ ദയയുള്ളവനും സ്നേഹമുള്ളവനുമായിരുന്നു. ഖിലാഫത്തുമായി അദ്ദേഹത്തിന് പ്രത്യേക അടുപ്പമുണ്ടായിരുന്നു, വെള്ളിയാഴ്ച ജുമുഅ ഖുത്ബ പതിവായി കാണാറുണ്ടായിരുന്നു. വിശുദ്ധ ഖുർആനിനോട് അദ്ദേഹത്തിന് വലിയ സ്നേഹമുണ്ടായിരുന്നു, അദ്ദേഹം അത് പതിവായി പാരായണം ചെയ്യുകയും കേൾക്കുകയും ചെയ്യുമായിരുന്നു. രക്തസാക്ഷിത്വത്തിന് മുമ്പുതന്നെ, അഹ്മദിയത്തിന്റെ ശത്രുക്കളിൽ നിന്ന് അദ്ദേഹത്തിന് ഭീഷണികൾ ലഭിച്ചുകൊണ്ടിരുന്നു. അദ്ദേഹം ഒരിക്കലും എതിർപ്പുകളെ ഭയപ്പെട്ടിരുന്നില്ല.  യാതൊരു ഭയവുമില്ലാതെ പള്ളിയിൽ പോയി നമസ്കാരം അനുഷ്ഠിക്കാറുണ്ടായിരുന്നു. അദ്ദേഹത്തിന് രണ്ട് ഭാര്യമാരും ഏഴ് കുട്ടികളും സഹോദരങ്ങളുമുണ്ട്. അദ്ദേഹത്തിന്റെ ഭാര്യമാരിൽ ഒരാൾ ഗർഭിണിയാണ്. അല്ലാഹു അദ്ദേഹത്തിന്റെ സ്ഥാനം ഉയർത്തട്ടെ. അദ്ദേഹത്തിന്റെ കുടുംബത്തെ സംരക്ഷിക്കുമാറാകട്ടെ. ശത്രുക്കളെ എത്രയും വേഗത്തിൽ ശിക്ഷിക്കുമാറാകട്ടെ.

اللّٰھُمَّ مَزِّقْھُمْ کُلَّ مُمَزَّقٍ وَ سَحِّقْھُمْ تَسْحِیْقًا

അല്ലാഹുവേ, (ശത്രുക്കളെ) നശിപ്പിക്കുകയും അവരെ തകർത്തുകളയുകയും ചെയ്യേണമേ.

അമത്തുൽ മുസവ്വർ നൂരി:

ഡോ. മസൂദുൽ ഹസ്സൻ നൂരിയുടെ ഭാര്യ അമതുൽ മുസവ്വർ നൂരി. ഹദ്‌റത്ത് മിർസ ശരീഫ് അഹ്മദ് (റ) യുടെ ചെറുമകളും ഖലീഫ തിരുമനസ്സിന്റെ കസിനും ആയിരുന്നു അവർ. ഡോ. നൂരിയുമായുള്ള അവരുടെ വിവാഹം മൂന്നാം ഖലീഫയുടെ (റഹ്) നേരിട്ടുള്ള സാന്നിധ്യത്തിലാണ് നടന്നത്.  അവർ പതിവായി നമസ്കാരങ്ങൾ നിർവഹിക്കുകയും, അതിഥികളെ സൽകരിക്കുകയും, ദരിദ്രരെ  പരിപാലിക്കുകയും ചെയ്യുമായിരുന്നു, അല്ലാഹുവിൽ വളരെയധികം വിശ്വാസമർപ്പിക്കുകയും ചെയ്തിരുന്നു. അവർ വിശുദ്ധ ഖുർആൻ വളരെ വിശദമായി പഠിച്ചുകൊണ്ടിരുന്നു. മറ്റ് മതങ്ങളെക്കുറിച്ചും പഠിക്കുന്നതിൽ അവർക്ക് താൽപ്പര്യമുണ്ടായിരുന്നു. അവർ ഭർത്താവിന് വളരെയധികം പിന്തുണ നൽകി, നിരവധി ത്യാഗങ്ങളും ചെയ്തു. അവർ വളരെ ക്ഷമയോടെ തന്റെ രോഗത്തെ സഹിച്ചു. അവർക്ക് ഖിലാഫത്തിനോട് വലിയ സ്നേഹമായിരുന്നു. അവർ പരദൂഷണത്തിൽ നിന്നും മറ്റ് ദുഷ്പ്രവൃത്തികളിൽ നിന്നും വിട്ടുനിന്നു. ചരിത്രപരമായ പുരാവസ്തുക്കൾ ശേഖരിക്കുന്നതിൽ അവർക്ക് താൽപ്പര്യമുണ്ടായിരുന്നു. അവർ മറ്റുള്ളവരോട് കരുതലുള്ളവരായിരുന്നു, മറ്റ് പെൺകുട്ടികളുടെ ആവശ്യങ്ങൾ നിറവേറ്റുകയും അവരെ വിശുദ്ധ ഖുർആൻ പാരായണം പഠിപ്പിക്കുകയും ചെയ്യുമായിരുന്നു. അവർക്ക് ദൈവമാർഗത്തിൽ ജീവിതം അർപ്പണം ചെയ്തവരോട് വലിയ ബഹുമാനമുണ്ടായിരുന്നു. അല്ലാഹു അവരുടെ പാപങ്ങൾ പൊറുക്കുകയും കരുണയും ചൊരിയുമാറാകട്ടെ.

ഹസ്സൻ സനുഗോ അബൂബക്കർ:

ഹസ്സൻ സനുഗോ അബൂബക്കർ ബുർക്കിന ഫാസോയിലെ ഒരു പ്രാദേശിക മിഷനറിയായിരുന്നു. റമദാനിൽ അദ്ദേഹം ദിവസവും വിശുദ്ധ ഖുർആനിനെക്കുറിച്ചുള്ള ഒരു ക്ലാസ് നടത്തുമായിരുന്നു, അത് റേഡിയോയിൽ പ്രക്ഷേപണം ചെയ്യുമായിരുന്നു. അൽ-അസ്ഹർ സർവകലാശാലയിൽ അറബി പഠിച്ച് ഉന്നത വിദ്യാഭ്യാസം നേടിയ ശേഷം അദ്ദേഹം ഐവറി കോസ്റ്റിൽ സ്ഥിരതാമസമാക്കി, അവിടെ ഒരു സ്കൂൾ സ്ഥാപിച്ചു. അഹ്മദി മിഷനറിമാർ ആ പ്രദേശത്തേക്ക് പ്രചാരണത്തിനായി പോയി, ഹസ്സൻ സനുഗോ അബൂബക്കർ അഹ്മദികളെ നേരിടാനും അവർ തെറ്റാണെന്ന് തെളിയിക്കാനും പോയി. എന്നിരുന്നാലും, അവരുമായി സംസാരിച്ചപ്പോൾ, അവർ സത്യത്തിലാണെന്ന് അദ്ദേഹത്തിന് മനസ്സിലായി. പിന്നീട് അദ്ദേഹം അഹ്മദിയ്യത്ത് സ്വീകരിച്ചു. പിന്നീട് അദ്ദേഹം സ്കൂൾ വിട്ട് ഇസ്ലാം അഹ്മദിയ്യത്തിന്റെ സേവനത്തിനായി ജീവിതം സമർപ്പിച്ചു. അദ്ദേഹത്തിന്റെ പ്രസംഗപാടവം, അറിവ്, പ്രാവീണ്യം എന്നിവ കാരണം എതിരാളികൾ അദ്ദേഹവുമായി സംസാരിക്കാൻ ഭയപ്പെട്ടിരുന്നു. നിരവധി പേരെ അഹ്മദിയ്യത്ത് സ്വീകരിക്കാൻ അദ്ദേഹം സഹായിച്ചു.

അദ്ദേഹത്തിന് ഉമ്മ, ഭാര്യ, സഹോദരങ്ങൾ, മൂന്ന് കുട്ടികൾ, പേരക്കുട്ടികൾ എന്നിവർ ഉണ്ട്. അദ്ദേഹം നിർബന്ധ നമസ്കാരങ്ങളും ഐച്ഛിക നമസ്കാരങ്ങളും  പതിവായി നിർവഹിച്ചിരുന്നു. രോഗാവസ്ഥയിൽ പോലും അദ്ദേഹം ഒരു പ്രാർത്ഥനയും നഷ്ടപ്പെടുത്തിയിരുന്നില്ല. കണ്ടുമുട്ടിയ എല്ലാവരോടും അദ്ദേഹം ദയയോടെ പെരുമാറിയിരുന്നു, വിശുദ്ധ ഖുർആനിനോട് അദ്ദേഹത്തിന് വലിയ സ്നേഹമുണ്ടായിരുന്നു, പരിശുദ്ധ പ്രവാചകനെയും അദ്ദേഹം സ്നേഹിച്ചിരുന്നു. ഒരു മിഷനറി ആകുക എന്നതിന്റെ അർത്ഥം എന്താണെന്ന് അദ്ദേഹം ജീവിച്ചു കാണിച്ചു, മറ്റ് മിഷനറിമാർക്ക് അദ്ദേഹം ഒരു മാതൃകയായിരുന്നു. അല്ലാഹു ഈ രീതിയിൽ ജീവിതം അർപ്പിക്കുന്നവരെ ജമാഅത്തിന് നൽകുമാറാകട്ടെ. അല്ലാഹു അദ്ദേഹത്തിന്റെ സ്ഥാനം ഉയർത്തുമാറാകട്ടെ.