മക്കാ വിജയ വേളയിൽ സ്നേഹത്തിന്‍റെയും ഭക്തിയുടെയും നിരവധി സന്ദർഭങ്ങളും പ്രകടനങ്ങളും നടന്നിരുന്നു. ഉദാഹരണത്തിന്, നബിതിരുമേനി(സ) ഹജ്റേ അസ്‌വതിൽ ചുംബിക്കുകയും കഅബയെ വലംവെക്കുകയും പിന്നീട് സഫാ പർവതത്തിന് മുകളിൽ പോയി ദൈവത്തെ സ്മരിക്കുകയും അവനോട് പ്രാർത്ഥിക്കുകയും ചെയ്തിരുന്നു. നബിതിരുമേനി(സ) മലയിലായിരുന്നപ്പോൾ മദീനയിലെ അൻസാർ സഹാബികൾ താഴെ നില്‍ക്കുന്നുണ്ടായിരുന്നു.  അല്ലാഹുവിനെ സ്മരിക്കുന്നതിൽ അവർ നബിതിരുമേനി(സ)യുടെ മാതൃക പിന്തുടർന്നു. നബിതിരുമേനി(സ) മക്കക്കാരോട് കാണിച്ച അളവറ്റ കാരുണ്യവും ദയയും കണ്ടപ്പോൾ അൻസാർ സഹാബികൾ  നബിതിരുമേനി(സ) ഇനി കുടുംബത്തിലും ബന്ധുക്കളുടെ ഇടയിലും താമസമാക്കുമോ എന്ന് ആകുലപ്പെട്ടു. നബിതിരുമേനി(സ)യിൽ നിന്നുള്ള വേർപിരിയേണ്ടി വരുമോ എന്ന് ചിന്തിച്ച അൻസാർ സഹാബികൾ വളരെ ദുഃഖിതരായി. അപ്പോള്‍  നബിതിരുമേനി(സ)ക്ക് ഒരു വെളിപാട് ലഭിച്ചു, അതിനുശേഷം മക്കയോടുള്ള എന്‍റെ സ്നേഹം എന്നെ കീഴടക്കുമെന്ന് നിങ്ങൾ ഭയപ്പെടുന്നുണ്ടോ അന്‍സാർ സഹാബികളോട് ചോദിച്ചു. ഈ ഒരു ആകുലത തന്നെയാണ് ഞങ്ങളെ ആശങ്കപ്പെടുത്തുന്നത് എന്നവര്‍ മറുപടി പറഞ്ഞു. അപ്പോള്‍ നബിതിരുമേനി(സ) പറഞ്ഞു. അപ്പോൾ നബിതിരുമേനി(സ) പറഞ്ഞു: അല്ലാഹുവിനു വേണ്ടിയാണ് ഞാൻ മദീനയിലേക്ക് പലായനം ചെയ്തത്.  എന്‍റെ ജീവിതവും മരണവും ഇനി നിങ്ങളോടൊപ്പം തന്നെയായിരിക്കും. അൻസാർ സഹാബികൾ കരയാൻ തുടങ്ങി. തിരുമേനിയോടുള്ള അവരുടെ അളവറ്റ സ്നേഹവും ഭക്തിയും കൊണ്ടാണ് തങ്ങൾ ഇപ്രകാരം ചിന്തിച്ചതെന്ന് അവർ പറഞ്ഞു. അല്ലാഹുവും നബിതിരുമേനി(സ)യും ഇത് സാക്ഷ്യപ്പെടുത്തി.

നബിതിരുമേനി(സ) നടന്നു പോകുകയും സഹാബികൾ അദേഹത്തെ പിന്തുടരുകയും ചെയ്യുന്നത് കണ്ടപ്പോൾ, അബൂസുഫിയാൻ ഒരു സൈന്യത്തെ ശേഖരിച്ച് മുസ്‌ലിങ്ങളുമായ് വീണ്ടും യുദ്ധം ചെയ്യാൻ കഴിഞ്ഞിരുന്നെങ്കിൽ എന്ന് ആഗ്രഹിച്ചുരുന്നു. അദ്ദേഹം നിശബ്ദമായി ഇത് ചിന്തിച്ചുകൊണ്ടിരുന്നു. ഉച്ചത്തിൽ ഒന്നും പറഞ്ഞില്ല; എന്നിരുന്നാലും, നബിതിരുമേനി(സ) അദ്ദേഹത്തെ സമീപിച്ച്, അദ്ദേഹത്തിന്‍റെ നെഞ്ചിൽ കൈവെച്ച്, വീണ്ടും അങ്ങനെ ചെയ്താൽ അല്ലാഹു നിന്നെ അപമാനിക്കുന്നതാണ് എന്ന് പറഞ്ഞു. പിന്നീട്, ഈ ചിന്ത ഉണ്ടായതിൽ അബൂസുഫിയാൻ ഖേദിച്ചു.

നമസ്കാര സമയമായപ്പോൾ, കഅ്ബയുടെ മുകളിൽ കയറി നമസ്കാരത്തിനുള്ള ബാങ്ക് നൽകാൻ നബിതിരുമേനി(സ) ഹദ്റത്ത് ബിലാലി(റ)നോട് നിർദ്ദേശിച്ചു. ആ ദിവസം, ദിവസത്തിൽ ഒരിക്കൽ മാത്രം വുദു ചെയ്ത ശേഷം നബി(സ) തന്‍റെ എല്ലാ നമസ്കാരങ്ങളും നിർവഹിച്ചതായി രേഖപ്പെടുത്തിയിട്ടുണ്ട്.