മുസ്‌ലിങ്ങൾ കഅബ സന്ദർശിക്കാൻ വരുന്നുണ്ടെന്നും അവരുടെ ഉദ്ദേശം യുദ്ധമല്ല എന്നറിഞ്ഞും ഖുറൈശികൾ മുസ്‌ലിങ്ങളെ തടയാൻ തീരുമാനിച്ചു. അവർ മുസ്‌ലിങ്ങളെ തടയുന്നതിനായി ചിലരെ അയക്കുകയും ചെയ്തു. രഹസ്യവിവരം നൽകുന്ന ഒരു വ്യക്തി ഖുറൈശികളുടെ നീക്കങ്ങളെ കുറിച്ച് നബിതിരുമേനി[സ]ക്ക് വിവരം നൽകി. മുസ്‌ലിങ്ങളുടെ വഴി തടയുന്നവർക്കെതിരിൽ ഒരു ആക്രമണം അഴിച്ചുവിടണോ എന്ന കാര്യത്തിൽ നബിതിരുമേനി[സ] അനുചരന്മാരോട് കൂടിയാലോചിച്ചു. ഹദ്റത്ത് അബൂബക്കർ[റ] പറഞ്ഞു: നാം പരിശുദ്ധ കഅബ സന്ദർശിക്കുക എന്ന ലക്ഷ്യത്തോടെയാണ് വന്നിരിക്കുന്നത് എന്നതിനാൽ നാം നമ്മുടെ ലക്ഷ്യത്തിൽ തന്നെ ഉറച്ചു നിൽക്കേണ്ടതാണ്. 

ഖാലിദ് ബിൻ വലീദ് തന്‍റെ സൈന്യത്തോടൊപ്പം മുസ്‌ലിങ്ങളെ തടയുന്നതിനായി പുറപ്പെട്ടിട്ടുണ്ട് എന്നറിഞ്ഞപ്പോൾ നബിതിരുമേനി[സ] വഴി മാറി സഞ്ചരിക്കുകയും ഹുദൈബിയയിൽ എത്തിച്ചേരുകയും ചെയ്തു.

ഹദ്റത്ത് മിർസാ ബശീർ അഹ്‌മദ്‌ സാഹിബ്[റ] എഴുതുന്നു:

“കുറച്ചു ദിവസത്തെ യാത്രക്ക് ശേഷം നബിതിരുമേനി[സ] മക്കയിൽ നിന്ന് രണ്ടു ദിവസത്തെ യാത്രാദൂരമുള്ള ഉസ്ഫാൻ എന്ന സ്ഥലത്തെത്തിച്ചേർന്നു. മുസ്‌ലിങ്ങളുടെ യാത്രയെ കുറിച്ചറിഞ്ഞ ഖുറൈശികൾ കോപാകുലരാകുകയും മുസ്‌ലിങ്ങളെ ഏതുവിധേനയും തടയും എന്ന് ഉറച്ച തീരുമാനമെടുക്കുകയും ചെയ്തിരിക്കുന്നു എന്നും അവരിൽ ചിലർ തങ്ങളുടെ കോപവും ക്രൂരതയും വെളിപ്പെടുത്തുന്നതിനായി ചീറ്റപ്പുലിയുടെ തോൽ അണിഞ്ഞിരിക്കുന്നു എന്നും നബിതിരുമേനി[സ]ക്ക് വിവരം ലഭിച്ചു. ഖുറൈശികൾ ഖാലിദ് ബിൻ വലീദിന്‍റെ, അദ്ദേഹം അപ്പോൾ മുസ്‌ലിം ആയിരുന്നില്ല, നേതൃത്വത്തിൽ ചില ധീരരായ കുതിരപ്പടയാളികളെ മുസ്‌ലിങ്ങളെ തടയുന്നതിനായി അയച്ചിട്ടുണ്ട് എന്നും ആ സംഘത്തിൽ ഇക്‌രിമഃ ബിൻ അബീ ജഹലും ഉണ്ട് എന്ന വിവരവും ലഭിച്ചു. അപ്പോൾ ഒരു ഏറ്റുമുട്ടൽ ഒഴിവാക്കുന്നതിനായി നബിതിരുമേനി[സ] മക്കയിലേക്കുള്ള സ്ഥിരം പാതയിൽ നിന്ന് മാറി മറ്റൊരു വഴിയിലൂടെ സഞ്ചരിക്കാൻ മുസ്‌ലിങ്ങൾക്ക് നിർദേശം നൽകി. അങ്ങനെ മുസ്‌ലിങ്ങൾ ഏറെ ബുദ്ധിമുട്ടുള്ള തീരദേശ പാതയിലൂടെ മുന്നോട്ട് ഗമിക്കാൻ ആരംഭിച്ചു.” ^[3]

നബിതിരുമേനി[സ] അങ്ങനെ ഹുദൈബിയയിലേക്ക് നീങ്ങികൊണ്ടിരിക്കെ അദ്ദേഹത്തിന്‍റെ ഒട്ടകം നടത്തം നിർത്തി ഇരുന്നു. വളരെയേറെ പരിശ്രമിച്ചിട്ടും അത് നടന്നില്ല. ഇത് അല്ലാഹുവിന്‍റെ ഇച്ഛക്കനുസരിച്ചാണ് നടത്തം നിർത്തിയത് എന്ന് നബിതിരുമേനി[സ] പറഞ്ഞു. നബിതിരുമേനി[സ] ഖുറൈശികൾ അല്ലാഹുവിന്‍റെ മാഹാത്മ്യത്തിനെതിരല്ലാത്ത എന്ത് കാര്യം പറഞ്ഞാലും താൻ അത് അംഗീകരിക്കാൻ തയ്യാറാണെന്ന് പറഞ്ഞതിന് ശേഷം ഒട്ടകത്തിനോട് എഴുന്നേൽക്കാൻ പറഞ്ഞപ്പോൾ അത് എഴുന്നേൽക്കുകയും മുന്നോട്ട് നീങ്ങാൻ ആരംഭിക്കുകയും ചെയ്തു.

ഹദ്റത്ത് മിർസാ ബശീർ അഹ്‌മദ്‌ സാഹിബ്[റ] എഴുതുന്നു:

“അന്നേ ദിവസം അവിടെ മഴ പെയ്തിരുന്നു. നബിതിരുമേനി[സ] പ്രഭാത നമസ്കാരത്തിനായി എത്തിയ സമയത്ത് ആ മൈതാനം മുഴുവനും വെള്ളം തളം കെട്ടിയിരുന്നു. നബിതിരുമേനി[സ] സഹാബാക്കളോട് പുഞ്ചിരിച്ചുകൊണ്ട് ചോദിച്ചു. ഈ സന്ദർഭത്തിൽ നിങ്ങളുടെ നാഥൻ എന്താണ് പറഞ്ഞത് എന്നറിയാമോ? സഹാബാക്കൾ തങ്ങളുടെ പതിവ് ശീലമനുസരിച്ച് അല്ലാഹുവും അവന്‍റെ റസൂലും നന്നായി അറിയുന്നു എന്ന് പറയുകയുണ്ടായി. നബിതിരുമേനി[സ] പറഞ്ഞു, അല്ലാഹു ഇങ്ങനെ പറയുകയുണ്ടായി. എന്‍റെ ദാസന്മാരിൽ പലരും ശരിയായ ഈമാന്‍റെ അവസ്ഥയിലാണ് നേരം വെളുപ്പിച്ചത്. പക്ഷെ ചിലർ കുഫ്‌റിന്‍റെ അവസ്ഥയിൽ ചഞ്ചലപ്പെട്ടുകൊണ്ടിരുന്നു. കാരണം നമുക്ക് മേൽ അല്ലാഹുവിന്‍റെ അനുഗ്രഹവും കാരുണ്യവും മുഖേന മഴ ഉണ്ടായി എന്ന് പറഞ്ഞ ദാസന്മാർ തങ്ങളുടെ വിശ്വാസത്തിന്‍റെ യാഥാർഥ്യത്തിൽ ഉറച്ചുനിന്നവരാണ്. എന്നാൽ ഇന്ന ഇന്ന നക്ഷത്രങ്ങളുടെ സ്വാധീന ഫലമായിട്ടാണ് മഴ ഉണ്ടായിയെന്ന് പറയുന്നവർ തീർച്ചയായും സൂര്യന്‍റെയും ചന്ദ്രന്‍റെയും വിശ്വാസികളാണ്. പക്ഷെ അവർ അല്ലാഹുവിനെ നിഷേധിച്ചവരുമാണ്. ഈ നിർദേശം മുഖേന തൗഹീദിന്‍റെ സമ്പത്തുമായി നിയോഗിക്കപ്പെട്ട നബിതിരുമേനി[സ] സഹാബാക്കൾക്ക് നൽകിയ പാഠമെന്തെന്നാൽ തീർച്ചയായും കാര്യകാരണങ്ങൾക്ക്  വിധേയമായിട്ടാണ് അല്ലാഹു ഈ പ്രപഞ്ചസംവിധാനത്തെ നടത്തിക്കൊണ്ടുപോകുന്നതിന് വിവിധ സാധന സാമഗ്രികൾ ഒരുക്കിയിട്ടുള്ളത്. മഴയും മറ്റും ഉണ്ടാകുമ്പോൾ ആകാശീയ നക്ഷത്രാദികൾക്കുള്ള സ്വാധീനത്തെ നിഷേധിക്കുന്നില്ല. പക്ഷെ യഥാർത്ഥ തൗഹീദ് ഈ സാമഗ്രികളെല്ലാം ഉണ്ടായിട്ടും മനുഷ്യന്‍റെ ദൃഷ്ടി എല്ലാത്തിനും അപ്പുറത്തുള്ള അസ്തിത്വത്തെക്കുറിച്ച് അശ്രദ്ധമാകാൻ പാടില്ല എന്നുള്ളതാണ്. അതായത് അല്ലാഹുവിനെക്കുറിച്ച് അശ്രദ്ധനാകാൻ പാടില്ല. സാധനസാമഗ്രികളും അല്ലാഹു തന്നെയാണ് തന്നിട്ടുള്ളത്. പക്ഷെ അല്ലാഹുവിന്‍റെ കൽപ്പനയുണ്ടാകുമ്പോൾ മാത്രമാണ് സാ ധനസാമഗ്രികൾ പ്രയോജനപ്പെടുകയുള്ളൂ. അവനാണ് ആ സാഹചര്യങ്ങളെയും സാധനങ്ങളെയും സൃഷ്ടിച്ചവൻ. അവൻ തന്നെയാണ് തന്‍റെ സംവിധാനത്തിന്‍റെ മൂലകാരണം. അവനെക്കൂടാതെ ഭൗതിക സാഹചര്യങ്ങൾക്ക് ഒരു മൃതമായ കീടത്തെക്കാളും വലിയ പ്രസക്തിയൊന്നുമില്ല.” ^[4]

ഹുദൈബിയയിൽ വെച്ച് നബിതിരുമേനി[സ] ഒട്ടകങ്ങളെ അറുത്ത് ഇറച്ചി വിതരണം ചെയ്യാൻ നിർദേശിച്ചു. നബിതിരുമേനി[സ]ക്ക് കുറച്ച് ആടുകൾ ഉപഹാരമായി ലഭിച്ചിരുന്നു. അവയെയും നബിതിരുമേനി[സ] മുസ്‌ലിങ്ങൾക്കിടയിൽ വിതരണം ചെയ്തിരുന്നു.

ഈ വിശദീകരണങ്ങൾ ഇനിയും തുടരുന്നതാണെന്ന് ഖലീഫാ തിരുമനസ്സ് പറഞ്ഞു. തുടർന്ന് ഖലീഫാ തിരുമനസ്സ് ജമാഅത്തിലെ മരണപ്പെട്ട ചിലരെ അനുസ്മരിക്കുകയും അവരുടെ ജനാസ നമസ്കരിക്കുന്നതാന്ന് അറിയിക്കുകയും ചെയ്തു.