ഖുത്ബയുടെ രണ്ടാം ഭാഗത്ത് ഖലീഫ തിരുമനസ്സ് പറഞ്ഞു, നിലവിലെ ലോകസാഹചര്യത്തെ മുന്‍നിറുത്തി ദുആക്ക് വേണ്ടി ഞാന്‍ പറയാന്‍ ആഗ്രഹിക്കുകയാണ്. കഴിഞ്ഞ കുറച്ച് ദിവസങ്ങളായി ഇസ്‌റായേലും ഹമാസും തമ്മില്‍ യുദ്ധം നടന്നുകൊണ്ടിരിക്കുകയാണ്.

ഈ യുദ്ധം കാരണം രണ്ടുഭാഗത്ത് നിന്നും സ്ത്രീകളും കുട്ടികളും വൃദ്ധരും അടക്കമുള്ള സാധാരണക്കാരാണ് മരണപ്പെട്ടുകൊണ്ടിരിക്കുന്നത്. യുദ്ധാവസരത്തില്‍ പോലും സ്ത്രീകളെയും കുട്ടികളെയും യുദ്ധത്തില്‍ പങ്കെടുക്കാത്തവരെയും വധിക്കാനുള്ള അനുവാദം ഇസ്‌ലാം നല്കുന്നില്ല. വളരെ ശക്തമായ രീതിയില്‍ നബിതിരുമേനി(സ) നിഷ്‌കര്‍ഷിച്ച കാര്യമാണിത്. യുദ്ധം സൈന്യത്തോടാണ് നടത്തേണ്ടത്. നിരപരാധികളായ സ്ത്രീകളോടും കുട്ടികളോടും അല്ല. ഇതനുസരിച്ച് ഹമാസിന്‍റെ ഭാഗത്ത് നിന്നുണ്ടായത് ഒരു തെറ്റായ നീക്കമാണ്. ഇതുകൊണ്ടുള്ള നഷ്ടം വളരെയധികമാണ്.

എന്നാല്‍, അതിനു മറുപടി എന്ന നിലയില്‍ ഇസ്രായേല്‍ ഭരണകൂടം ചെയ്യുന്നത് വളരെ ഭീകരമായ പ്രവര്‍ത്തനമാണ്. ഈ ഒരവസ്ഥ അവസാനിക്കുന്നതായി തോന്നുന്നില്ല. ഇസ്രായേല്‍ ഗവണ്‍മെന്‍റ് പറയുന്നത് അവര്‍ ഗസയെ പരിപൂര്‍ണമായി ഇല്ലാതാക്കും എന്നാണ്. അതിനായി അവര്‍ നിരന്തരമായി അവിടെ ബോംബ് വര്‍ഷിക്കുകയും മുഴുവന്‍ നഗരത്തെയും ചാരക്കൂമ്പാരമാക്കി മാറ്റുകയും ചെയ്തിരിക്കുന്നു.

നിലവിലെ സാഹചര്യത്തില്‍ അവര്‍ മുന്നറിയിപ്പ് നല്കുന്നത് ഒരു മില്യണില്‍ അധികം ആളുകള്‍ ഗസ വിട്ടുപോകണം എന്നാണ്. ഈ അവസരത്തില്‍, പതിയ ശബ്ദത്തില്‍ ആണെങ്കിലും, ഐക്യരാഷ്ട്ര സഭ ഇതിനോട് പ്രതികരിക്കുകയും, ഇത് മനുഷ്യത്വ വിരുദ്ധവും, തെറ്റായ പ്രവൃത്തിയുമാണെന്നും, ഇസ്രായേല്‍ തങ്ങളുടെ തീരുമാനത്തെ പുനപരിശോധിക്കണമെന്നും പറയുകയും ചെയ്തിരിക്കുന്നു.

യുദ്ധത്തില്‍ പങ്കെടുക്കാത്ത ജനങ്ങള്‍ നിരപരാധികളാണ്. ഇസ്രായേലിലുള്ള സ്ത്രീകളെയും കുട്ടികളെയും ലോകം നിരപരാധികളായി കാണുമ്പോള്‍ ഫലസ്തീനിലെ സ്ത്രീകളും കുട്ടികളും നിരപരാധികളാണ് എന്നവര്‍ മനസ്സിലാക്കണം.

ജൂതക്രിസ്ത്യാനികളുടെ വേദപുസ്തകങ്ങളും നിഷ്‌കര്‍ഷിക്കുന്നത് ഇത്തരത്തിലുള്ള കൊലപാതകങ്ങള്‍ അനുവദനീയമല്ല എന്നാണ്. മുസ്‌ലിങ്ങല്ക്കെതിരെ അവര്‍ തെറ്റ് ചെയ്തു എന്ന് ആരോപിക്കുമ്പോള്‍ തങ്ങളുടെ അവസ്ഥയെ കുറിച്ചും ഇക്കൂട്ടര്‍ ആത്മപരിശോധന നടത്തേണ്ടതുണ്ട്. വളരെയധികം പ്രാര്‍ഥിക്കേണ്ട ആവശ്യമുണ്ട്. ഫലസ്തീന്‍റെ അംബാസഡര്‍ ഒരു ഇന്റര്‍വ്യൂയില്‍ പറയുന്നു, ഹമാസ് ഒരു മിലിറ്റന്‍റ് ഗ്രൂപ്പ് ആണ്, ഗവണ്മെന്‍റ് അല്ല. അതോടൊപ്പം അദ്ദേഹം പറയുന്നു, യഥാര്‍ഥ നീതി നടപ്പിലായിരുന്നെങ്കില്‍ ഈ സാഹചര്യം തന്നെ ഉണ്ടാകുമായിരുന്നില്ല. വന്‍ ശക്തികള്‍ തങ്ങളുടെ ഇരട്ടത്താപ്പ് ഒഴിവാക്കിയിരുന്നുവെങ്കില്‍ ഇത്തരത്തിലുള്ള അസമാധാനവും യുദ്ധസാഹചര്യവും ഉണ്ടാകുമായിരുന്നില്ല എന്നാണ്.

ഇപ്പോള്‍ പാശ്ചാത്യ ശക്തികള്‍ നീതിയെ പാടെ അവഗണിച്ചു കൊണ്ട് ഫലസ്തീനെതിരെ ഒരുമിച്ച് കൂടുകയാണ്. മീഡിയകളും തെറ്റായ വാര്‍ത്തകളാണ് നല്കിക്കൊണ്ടിരിക്കുന്നത്. വന്‍ശക്തികളായ ഭരണകൂടങ്ങള്‍ യുദ്ധത്തെ ആളിക്കത്തിക്കാന്‍ ആണ് ശ്രമിക്കുന്നത്. യുദ്ധത്തെ അവസാനിപ്പിക്കാന്‍ അവര്‍ ശ്രമിക്കുന്നില്ല.

ഒന്നാം ലോക മഹായുദ്ധത്തിനു ശേഷം ലീഗ് ഓഫ് നേഷന്‍സ് സ്ഥാപിക്കപ്പെട്ടു. എന്നാല്‍ നീതിയില്‍ അധിഷ്ഠിതമായി പ്രവര്‍ത്തിക്കാത്തത് കൊണ്ട് അത് ദുര്‍ബലമാവുകയും രണ്ടാം ലോക മഹായുദ്ധം നടക്കുകയും ചെയ്തു. ഏഴ് കോടി ജനങ്ങളാണ് അതില്‍ മരണപ്പെട്ടത്. പിന്നീട് ഐക്യരാഷ്ട്ര സഭ രൂപീകരിക്കപ്പെട്ടു. എന്നാല്‍ അതിന്‍റെ അവസ്ഥയും ശോചനീയമായിക്കൊണ്ടിരിക്കുകയാണ്. നീതി നടപ്പില്‍ വരുത്താനും മര്‍ദിതര്‍ക്ക് സഹായമേകുന്നതിനും യുദ്ധങ്ങള്‍ അവസാനിപ്പിക്കുന്നതിനും വേണ്ടിയായിരുന്നു ഇത് സ്ഥാപിക്കപ്പെട്ടിരുന്നത് എങ്കിലും ആ ലക്ഷ്യപൂര്‍ത്തീകരണത്തിന് വിദൂര സാധ്യത പോലും കാണുന്നില്ല. എല്ലാവരും തങ്ങളുടെ സ്വാര്‍ഥ താല്പര്യത്തിന് പിന്നാലെയാണ്.

ഈ അനീതി കാരണം യുദ്ധം നടക്കുകയാണെങ്കില്‍ അതിന്റെ പരിണിത ഫലങ്ങളെ കുറിച്ച് സാധാരണക്കാരന് ചിന്തിക്കാന്‍ പോലും സാധിക്കില്ല.

ഇത്തരം സാഹചര്യങ്ങളില്‍ മുസ്‌ലിം രാഷ്ട്രങ്ങള്‍ ഉണര്‍ന്നു പ്രവൃത്തിക്കേണ്ടതാണ്. തങ്ങളുടെ പര്‌സപരമുള്ള ഭിന്നതകള്‍ ഒഴിവാക്കിക്കൊണ്ട് ഐക്യപ്പെടാന്‍ വേണ്ടി ശ്രമിക്കേണ്ടതാണ്. അക്രമിക്കപ്പെടുന്നവനെയും അക്രമിയെയും (അവനെ അക്രമത്തില്‍ നിന്ന് തടഞ്ഞുകൊണ്ട്‌) സഹായിക്കുക എന്ന നബി തിരുമേനി(സ)യുടെ നിര്‍ദേശം മുസ്‌ലിം ശക്തികള്‍ എപ്പൊഴും മുന്നില്‍ വയ്ക്കുക. അല്ലാഹു മുസ്‌ലിം ഭരണകൂടങ്ങള്‍ക്ക് ബുദ്ധി നല്കട്ടെ. അവര്‍ ഐക്യപ്പെട്ടുകൊണ്ട് നീതി നടപ്പില്‍ വരുത്തുന്നവരാകട്ടെ. ലോക ശക്തികള്‍ ലോകത്തെ യുദ്ധക്കളമാക്കി മാറ്റാതെ ലോകത്തെ നാശത്തില്‍ നിന്നും രക്ഷിക്കുന്നവരാകട്ടെ. ഈ നാശം സംഭവിക്കുകയാണെങ്കില്‍ ലോകത്തെ വലിയ ശക്തികളും സുരക്ഷിതരല്ല എന്ന് അവര്‍ ഓര്‍ക്കേണ്ടതാണ്.

നമ്മുടെ പക്കല്‍ ദുആയുടെ ആയുധം മാത്രമാണുള്ളത്. അതുകൊണ്ട് ഓരോ അഹ്‌മദിയും മുമ്പത്തേക്കാള്‍ ഏറെ ദുആ ചെയ്യേണ്ടതാണ്. ഗസയില്‍ ചില അഹ്‌മദികളുടെ വീടുകളും ഉപരോധിക്കപ്പെട്ടിട്ടുണ്ട്. അല്ലാഹു അവരെയും എല്ലാ നിഷ്കളങ്കരായ ജനങ്ങളെയും സംരക്ഷിക്കട്ടെ. അല്ലാഹു ഹമാസിന് ബുദ്ധി നല്കട്ടെ. അവര്‍ തങ്ങളുടെ ആളുകള്‍ അക്രമിക്കപ്പെട്ടതിനു ഉത്തരവാദികളാകാതിരിക്കട്ടെ. ഒരു സമൂഹത്തോടുള്ള ശത്രുത അവരോട് നീതിയോടെ പ്രവര്‍ത്തിക്കുന്നതില്‍ നിന്നും തടയാതിരിക്കട്ടെ. ഇത് തന്നെയാണ് വിശുദ്ധ ഖുര്‍ആന്‍റെ കല്പന. അല്ലാഹു ലോകശക്തികളെ നീതിയില്‍ നിലനിന്നു കൊണ്ട് സമാധാനം സ്ഥാപിക്കുന്നവരാക്കി മാറ്റട്ടെ. അല്ലാഹു നമുക്ക് ലോകത്ത് ശാന്തിയും സമാധാനവും കാണാനുള്ള സൗഭാഗ്യം നല്കുമാറാകട്ടെ.

ഖുത്ബയുടെ അവസാനത്തില്‍ ഖലീഫ തിരുമനസ്സ് പരേതരായ ബശീര്‍ അഹ്‌മദ് ഖാന്‍ സാഹിബ്, വസീമ ബേഗം സാഹിബ എന്നിവരെ അനുസ്മരിക്കുകയും അവരുടെ ജനാസ നമസ്‌ക്കരിക്കുന്നതാണെന്ന് അറിയിക്കുകയും ചെയ്തു.