ഖലീഫാ തിരുമനസ്സ് പറഞ്ഞു: പിന്നീട് മുഹമ്മദ് നബി(സ) യുദ്ധവസ്ത്രം ധരിച്ചും ഒട്ടകത്തിൽ കയറിയും മസ്ജിദ് ഹറാമിലേക്കുള്ള യാത്ര ആരംഭിച്ചു. 360 വിഗ്രഹങ്ങളാണ് വിശുദ്ധ കഅ്‌ബയുടെ ചുറ്റിലും സ്ഥാപിച്ചിരുന്നത്. മുഹമ്മദ് നബി(സ)യുടെ കൈയിൽ ഒരു ഊന്നുവടി ഉണ്ടായിരുന്നു. അതുപയോഗിച്ച് ഓരോ വിഗ്രഹത്തേയും തട്ടിക്കൊണ്ട് പ്രവാചകന്‍(സ) ഇങ്ങനെ പാരായണം ചെയ്തു:

“സത്യം വന്നിരിക്കുന്നു. അസത്യം മാഞ്ഞുപോയിരിക്കുന്നു. തീര്‍ച്ചയായും അസത്യം മാഞ്ഞുപോകുന്നതാകുന്നു.”^[1]

അതിനുശേഷം, മുഹമ്മദ് നബി(സ) കഅ്‌ബയിലേക്ക് സമീപിച്ച് ഹജറുൽ അസ്‌വദ് സ്പർശിച്ച ശേഷം അല്ലാഹു അക്ബർ (അല്ലാഹു ഏറ്റവും വലിയവൻ) എന്ന് വിളംബരപ്പെടുത്തി. സഹാബാക്കളും ഇത് ഏറ്റ് പറഞ്ഞു. മുഹമ്മദ് നബി(സ) പിന്നീട് കഅ്‌ബയുടെ ചുറ്റും ത്വവാഫ് ചെയ്തു.

ബഥായിൽ നിൽക്കുന്ന സമയത്ത്, മുഹമ്മദ് നബി(സ), ഹദ്‌റത്ത് ഉമർ(റ)നെ വിളിച്ച് കഅ്‌ബയുടെ ഉള്ളിലുള്ള എല്ലാ ചിത്രങ്ങളും നീക്കാൻ ഉത്തരവിട്ടു. ആ ചിത്രങ്ങൾ നീക്കം ചെയ്തശേഷം മാത്രമാണ് മുഹമ്മദ് നബി(സ) കഅ്‌ബയുടെ ഉള്ളിലേക്ക് പ്രവേശിച്ചത്.

അതിനുശേഷം മുഹമ്മദ് നബി(സ) മഖാമെ ഇബ്രാഹീമിൽ എത്തി രണ്ടു റക്അത്ത് നമസ്കാരം നിർവഹിച്ചു. പിന്നീട് സംസം ജലം കുടിക്കുകയും അതുപയോഗിച്ച് വുളു ചെയ്യുകയും ചെയ്തു. ഇതിന് ശേഷം, അദ്ദേഹം ഹുബൽ എന്ന വലിയ വിഗ്രഹത്തെ നശിപ്പിക്കാൻ നിർദ്ദേശം നൽകി.

ഹദ്‌റത്ത് സുബൈർ ബിൻ അൽ അവ്വാം(റ) ഇതുനോക്കി അബൂ സുഫിയാനെ ഓർമിപ്പിച്ചു: ഉഹ്ദ് യുദ്ധദിനത്തിൽ ഹുബലിനെ നീ വാനോളം പൊക്കിപ്പിടിച്ചിരുന്നു, ഇപ്പോഴത് തകർന്നുപോയിരിക്കുന്നു. അതിന് അബൂ സുഫിയാൻ മറുപടി നൽകി:

“അവ്വാമിന്‍റെ മകനേ, അത്തരമൊരു സംഭാഷണം ഉപേക്ഷിക്കൂ. ഇപ്പോൾ എനിക്ക് ബോധ്യമായിരിക്കുന്നു: മുഹമ്മദ്(സ)ന്‍റെ ദൈവമല്ലാതെ മറ്റൊരു ദൈവം ഉണ്ടായിരുന്നു എങ്കിൽ, ഇങ്ങനെയൊന്നും സംഭവിക്കുമായിരുന്നില്ലല്ലോ?”

മുഹമ്മദ് നബി(സ) പിന്നീട് കഅ്‌ബയുടെ താക്കോൽ ചോദിച്ചു. കഅ്‌ബ തുറന്നശേഷം, അദ്ദേഹം അകത്തേക്ക് പ്രവേശിച്ച്, മൂന്നു തൂണുകൾ പിന്നിലായിരിക്കെ മറ്റ്  രണ്ട് തൂണുകൾക്കിടയിൽ നിന്ന് കൊണ്ട് ദീർഘമായ നഫൽ നമസ്കാരം നിർവഹിച്ചു.

ഖലീഫാ തിരുമനസ്സ് പറഞ്ഞു: ഹദ്‌റത്ത് മീർസാ ബശീറുദ്ദീൻ മഹ്‍മൂദ് അഹ്‍മദ്(റ) പറയുന്നതനുസരിച്ച്, ആ ദിവസം മുഹമ്മദ് നബി(സ)യെ അനുഗമിച്ചിരുന്ന പതിനായിരം മുസ്‌ലീങ്ങൾ മാലാഖമാരായാണ് വിശേഷിപ്പിക്കപ്പെട്ടത്.

മാലാഖമാരുടെ സവിശേഷത അതാണ് അവരോട് അല്ലാഹു കല്പിക്കുന്നതെല്ലാം അവർ അനുഷ്ഠിക്കുന്നു. അതുപോലെ ആയിരുന്നു ആ സഹാബാക്കൾ. അവരുടെ എല്ലാ കഴിവുകളും അല്ലാഹുവിന്‍റെ നിയന്ത്രണത്തിൽ ആയിരുന്നു.

അന്നേ ദിവസം വിഗ്രഹങ്ങൾ നശിപ്പിക്കപ്പെട്ടത് പോലെ, മനസ്സിലെ വിഗ്രഹങ്ങൾ നശിപ്പിക്കുമ്പോഴാണ് ഒരാൾ ശരിയായി ശുദ്ധനാകുന്നത്. ഖുര്‍ആൻ പറയുന്നു:

“തന്‍റെ ആത്മാവിനെ ശുദ്ധീകരിക്കുന്നവൻ വിജയിക്കും.”^[2]

ഖലീഫാ തിരുമനസ്സ് പറഞ്ഞു, ഈ അവസരത്തിൽ മുഹമ്മദ് നബി(സ) ഒരു പ്രസംഗവും നടത്തി. അതിൽ അദ്ദേഹം മുസ്‌ലീങ്ങൾ എപ്പോഴും ജിഹാദിന് സജ്ജരായിരിക്കണമെന്ന് പറഞ്ഞു. മുഹമ്മദ് നബി(സ) വിശുദ്ധ പള്ളിയുടെ (കഅ്ബയുടെ) പവിത്രത ആവർത്തിച്ചുറപ്പിച്ചു. അവിടെ ഒരു യുദ്ധവും നടക്കരുത്, മൃഗങ്ങളെ കൊല്ലരുത്, അതിലെ സസ്യങ്ങൾ വെട്ടിയെടുക്കരുത്.

ഖലീഫ തിരുമനസ്സ് പറഞ്ഞു, ഈ പ്രസംഗത്തിൽ, മുഹമ്മദ് നബി(സ) കഅ്ബയുടെ വാതിൽക്കൽ നിന്നുകൊണ്ട് അല്ലാഹുവിന്‍റെ ഏകത്വം പ്രഖ്യാപിച്ചു. ജനങ്ങളിൽ ഏറ്റവും ഭക്തർ ഏറ്റവും നീതിമാന്മാരാണെന്ന് മുഹമ്മദ് നബി(സ) പറഞ്ഞു. ഖുറൈശികളോട് അദ്ദേഹം ചോദിച്ചു, അവരോട് താൻ എന്തു ചെയ്യാനാണ് ഉദ്ദേശിക്കുന്നതെന്ന്? മുഹമ്മദ് നബി(സ) എടുക്കുന്ന ഏത് തീരുമാനവും ഏറ്റവും ഉത്തമമായിരിക്കുമെന്ന് അവർ പറഞ്ഞു. അപ്പോൾ മുഹമ്മദ് നബി(സ) പൊതുമാപ്പ് പ്രഖ്യാപിച്ചു, യൂസുഫ് നബി(അ)യുടെ വാക്കുകളിൽ ഇങ്ങനെ പറഞ്ഞു: “ഇന്ന് നിങ്ങളുടെ മേൽ ഒരു കുറ്റവുമില്ല.”^[3]. മുഹമ്മദ് നബി(സ)യെ പീഡിപ്പിക്കുകയും നാടുകടത്തുകയും ചെയ്ത അതേ ആളുകളോട് ചെയ്ത ഈ ക്ഷമ, മുഹമ്മദ് നബി(സ)യുടെ അല്ലാഹുവിനോടുള്ള ഭക്തിയുടെയും അഗാധമായ ബന്ധത്തിന്‍റെയും ഒരു പ്രകടനമായിരുന്നു.

ഖലീഫാ തിരുമനസ്സ് പറഞ്ഞു, ഈ വിവരണങ്ങൾ ഭാവിയിലും തുടർന്ന് പരാമർശിക്കുന്നതാണ്.