ലോകമെമ്പാടുമുള്ള ജനങ്ങളെ തൗഹീദിന്റെ പതാകയ്ക്ക് കീഴിൽ ഒരുമിച്ച് കൊണ്ടുവരിക എന്നതാണ് അല്ലാഹുവിന്റെ താല്പര്യമെന്ന് വാഗ്ദത്ത മസീഹ് (അ) പറഞ്ഞതായി ഹുദൂർ തിരുമനസ്സ് ഉദ്ധരിച്ചു. അതിനാൽ എല്ലാവരും ഈ ലക്ഷ്യത്തിനായി പരിശ്രമിക്കണം, എന്നാൽ അത് വളരെ സൗമ്യതയോടും ഉന്നതമായ സ്വഭാവ മഹിമയോടും കൂടി ആയിരിക്കണം. തന്റെ പരമമായ സന്തോഷവും തന്റെ നിയോഗത്തിന്റെ യഥാർത്ഥ ലക്ഷ്യവും തൗഹീദ് സ്ഥാപിക്കുക എന്നതാണെന്ന് അദ്ദേഹം പറഞ്ഞു.
ഒരിക്കൽ ഒരു കൂട്ടം ആളുകൾ വാഗ്ദത്ത മസീഹ് (അ) നെ കാണാൻ വന്നു. അവർ അദ്ദേഹത്തെ കാണുകയും കൈ കൊടുക്കുകയും ചെയ്തു; എന്നാൽ അവരിൽ ഒരാൾ വാഗ്ദത്ത മസീഹ് (അ) ന്റെ കാൽക്കൽ വീണു. ഉടൻ തന്നെ വാഗ്ദത്ത മസീഹ് (അ) അദ്ദേഹത്തിന്റെ കൈയിൽ പിടിച്ചു എഴുന്നേൽപ്പിച്ചു കൊണ്ട് പറഞ്ഞു: “ഈ കാലഘട്ടത്തിൽ ഇത്തരത്തിലുള്ള ശിർക്കുകൾ ഇല്ലാതാക്കാനാണ് അല്ലാഹു എന്നെ അയച്ചിരിക്കുന്നത്. മറ്റൊരാളുടെ കാൽ ചുംബിക്കുന്നത് ശിർക്കാണ്.”

മറ്റൊരു സംഭവത്തിൽ, ഒരാൾ തന്റെ മകനെ വാഗ്ദത്ത മസീഹ് (അ) നെ കാണിക്കാൻ കൊണ്ടുവന്നു. കുട്ടി അദ്ദേഹത്തോടുള്ള ബഹുമാനം പ്രകടിപ്പിക്കാനായി കാലുകളിൽ തൊടാൻ ശ്രമിച്ചു. ഉടൻ തന്നെ വാഗ്ദത്ത മസീഹ് (അ) കുട്ടിയെ തടഞ്ഞുകൊണ്ട് പറഞ്ഞു: “ശിർക്ക് ഇല്ലാതാക്കാനാണ് പ്രവാചകന്മാർ വരുന്നത്, അത് തന്നെയാണ് എന്റെ ദൗത്യവും.” വിഗ്രഹാരാധകർ ചെയ്യുന്നത് പോലെ തന്റെ ഫോട്ടോ എടുക്കുന്നതിനോ അത് അച്ചടിച്ച് ആളുകൾ സൂക്ഷിക്കുന്നതിനോ താൻ എതിരാണെന്ന് അദ്ദേഹം തുടർന്നു പറഞ്ഞു. വിഗ്രഹങ്ങളെയും ചിത്രങ്ങളെയും ആരാധിക്കുന്നതിനെ തന്നേക്കാൾ കൂടുതൽ എതിർക്കുന്ന മറ്റാരുമില്ലെന്ന് അദ്ദേഹം പറഞ്ഞു. എങ്കിലും, യൂറോപ്പിലെ ആളുകൾ ഒരാളുടെ രചനകൾ വായിക്കുന്നതിന് മുമ്പ് അയാളുടെ ചിത്രം കാണാൻ ആഗ്രഹിക്കുന്നുവെന്ന് അദ്ദേഹം മനസ്സിലാക്കി. യഥാർത്ഥത്തിൽ, ഒരാളുടെ മുഖലക്ഷണങ്ങൾ കാണുന്നതിലൂടെ അവർക്ക് അയാളുടെ സത്യസന്ധത തിരിച്ചറിയാൻ കഴിയും. വാഗ്ദത്ത മസീഹ് (അ) -നെ നേരിട്ട് വന്നു കാണാൻ കഴിയാത്തവരായിരുന്നു അവർ, അങ്ങനെയുള്ളവർക്ക് വേണ്ടിയാണ് അദ്ദേഹം തന്റെ ഫോട്ടോ എടുക്കാൻ അനുവാദം നൽകിയത്. അതിന്റെ ഫലമായി, യൂറോപ്പിൽ നിന്നും അമേരിക്കയിൽ നിന്നും അദ്ദേഹത്തിന് ഒട്ടേറെ കത്തുകൾ ലഭിച്ചു; ചിത്രം കണ്ടപ്പോൾ തന്നെ ഇദ്ദേഹം സത്യസന്ധനായ വ്യക്തിയാണെന്ന് തങ്ങൾ തിരിച്ചറിഞ്ഞുവെന്ന് അവർ അതിൽ എഴുതിയിരുന്നു. അതുകൊണ്ടാണ് താൻ ഫോട്ടോ എടുക്കാൻ അനുവദിച്ചത് എന്ന് വാഗ്ദത്ത മസീഹ് (അ) വിശദീകരിച്ചു.

ഫോട്ടോകൾ പാടില്ല എന്നല്ല ഇതിനർത്ഥമെന്നും അദ്ദേഹം വ്യക്തമാക്കി. സുലൈമാൻ നബി (അ)ന് വേണ്ടി ഒരു കൂട്ടം ജിന്നുകൾ ചിത്രങ്ങൾ നിർമ്മിച്ചിരുന്നുവെന്ന് വിശുദ്ധ ഖുർആനിൽ നിന്ന് തെളിവുണ്ട്. അതുപോലെ ഇസ്രായീൽ സന്തതികളുടെ പക്കൽ തിരുനബി ﷺയുടേതുൾപ്പെടെയുള്ള പ്രവാചകന്മാരുടെ ചിത്രങ്ങൾ ഉണ്ടായിരുന്നു. ഹദ്‌റത് ആയിഷ (റ) -ന്റെ ചിത്രം ജിബ്‌രീൽ (അ) ഒരു തുണിയിൽ തിരുനബി ﷺ ക്ക് കാണിച്ചു കൊടുത്തിട്ടുണ്ട്. ക്യാമറയും മറ്റ് ചിത്രീകരണ ഉപകരണങ്ങളും രോഗനിർണ്ണയത്തിന് പോലും ഉപയോഗിക്കാമെന്ന് വാഗ്ദത്ത മസീഹ് (അ) പറഞ്ഞു. “പ്രവൃത്തികൾ ഉദ്ദേശ്യങ്ങളെ അടിസ്ഥാനമാക്കിയുള്ളതാണ്” എന്ന് അദ്ദേഹം ഓർമ്മിപ്പിച്ചു. അതിനാൽ, ഉദ്ദേശ്യങ്ങൾ ശുദ്ധമാണെങ്കിൽ, അല്ലാഹുവിൽ പങ്കുചേർക്കുന്ന വശങ്ങൾ ഇല്ലെങ്കിൽ ഇത്തരം കാര്യങ്ങൾ ഉപയോഗിക്കുന്നതിൽ തെറ്റില്ല. വ്യർത്ഥമായ കാര്യങ്ങളെയും ശിർക്കിലേക്ക് നയിക്കുന്ന കാര്യങ്ങളെയുമാണ് ഇസ്‌ലാം വിലക്കിയിട്ടുള്ളത്.