അധിനിവേശവും അക്രമവും ഉണ്ടാകുമ്പോൾ മർദ്ദിതരെയും മർദ്ദകരെയും സഹായിക്കണമെന്നാണ് ഇസ്‌ലാം പഠിപ്പിക്കുന്നത്. മർദ്ദിതരെയും മർദ്ദകരെയും സഹായിക്കണമെന്ന് നബി(സ)  ആവശ്യപ്പെട്ടപ്പോൾ അദ്ദേഹത്തിന്‍റെ അനുയായിവൃന്ദം ആരായുകയുണ്ടായി, “ മർദ്ദിതർക്ക് നീതി ലഭ്യമാക്കി കൊണ്ട് സഹായിക്കാം. എന്നാൽ മർദ്ദകരെ സഹായിക്കുന്നത് എങ്ങനെയാണ്?” നബി(സ) മറുപടിയായി പറഞ്ഞത്, “മനുഷ്യരെ മർദ്ദിക്കുന്നതിൽ നിന്നും അവനെ തടഞ്ഞുകൊണ്ട്” എന്നാണ്.^[5]

എന്നാൽ ഇത് എല്ലാത്തരം സ്വാർഥ താല്പര്യങ്ങളിൽ നിന്നും ശത്രുതയിൽ നിന്നും മുക്തമായി കൊണ്ടാണ് ചെയ്യേണ്ടത്. കാരണം, നിങ്ങളോട് ശത്രുത വെച്ചുപുലർത്തുന്നവരുമായുള്ള ഇടപാടുകളിൽ പോലും നിങ്ങൾ ന്യായവും നീതിയും പുലർത്തണമെന്നാണ് ഖുർആൻ അനുശാസിക്കുന്നത്. 

വിശുദ്ധ ഖുർആനിൽ അഞ്ചാമത്തെ അധ്യായത്തിൽ ഒമ്പതാം വചനത്തിൽ അല്ലാഹു പറയുന്നു: “വിശ്വസിച്ചവരെ, നിങ്ങൾ നീതിക്ക് സാക്ഷ്യം വഹിക്കുന്നവരായി അല്ലാഹുവിനുവേണ്ടി നിലകൊള്ളുക. ഒരു സമുദായത്തോടുള്ള വിരോധം അവരോട് നീതി പാലിക്കാതിരിക്കാൻ നിങ്ങളെ പ്രേരിപ്പിക്കാതിരിക്കട്ടെ. നിങ്ങൾ എപ്പോഴും നീതി പാലിക്കുക. അത് ദൈവഭക്തിയുമായി ഏറ്റവും അടുത്തതാണ്. നിങ്ങൾ അല്ലാഹുവിനെ ഭയപ്പെടുക. തീർച്ചയായും അല്ലാഹു നിങ്ങൾ പ്രവർത്തിക്കുന്നതിനെ കുറിച്ച് സൂക്ഷ്മമായി അറിവുള്ളവനാണ്.”

മുസ്‌ലീങ്ങള്‍ എന്ന് സ്വയം വിളിക്കുകയും ഇസ്‌ലാമിന്‍റെ പേരിൽ ഏറ്റവും പൈശാചികവും മൃഗീയവുമായ പ്രവർത്തനങ്ങൾ ചെയ്യുകയും ചെയ്യുന്നവർക്ക്, ഈ ഖുർആനിക കല്പന ഒരു വിധത്തിലുള്ള പിന്തുണയും നല്കുന്നില്ല. ഇസ്‌ലാമിനെ അക്രമത്തിന്‍റെയും തീവ്രവാദത്തിന്‍റെയും മതമായി മനപൂർവം വരച്ചുകാട്ടുവാൻ ആഹ്ലാദിക്കുന്നവർക്കും ഈ കല്പന വിമർശനത്തിനുള്ള യാതൊരു ഇടവും നൽകുന്നില്ല.

വാസ്തവത്തിൽ, സമാധാനവും  നീതിയും കല്പിക്കുകയും, ഓരോ ജീവന്‍റെയും മൂല്യത്തെയും  പവിത്രതയെയും  ആദരിക്കുകയും ചെയ്യുന്ന ഒരു മതത്തിന്‍റെ ആത്മാവിൽ നിന്ന് ഇത്തരം ചെയ്തികളും അവകാശവാദങ്ങളും വളരെ വിദൂരമാണ്. വിശുദ്ധ ഖുർആൻ മുസ്‌ലീങ്ങളോട് ഉത്ബോധിപ്പിക്കുന്നത് കൊലയും അക്രമവുമല്ല; മറിച്ച് മുഴുവൻ മനുഷ്യകുലത്തേയും സ്നേഹിക്കുവാനാണ്.

വിശുദ്ധ ഖുർആന്‍റെ ആദ്യ അധ്യായത്തിൽ തന്നെ , അല്ലാഹു സർവലോകപരിപാലകനും കരുണാമയനും പരമകാരുണികനും ആണെന്നാണ് പറഞ്ഞിരിക്കുന്നത്.^[6]

ഇവിടെ സർവലോകപരിപാലകൻ എന്നതുകൊണ്ട് അർഥമാക്കുന്നത്, സകലരെയും—തന്നിൽ വിശ്വസിക്കുന്നവരെയും തന്നെ നിരാകരിക്കുന്നവരെയും—ഒരുപോലെ ദൈവം പരിപാലിക്കുന്നു എന്നാണ്. ഇത്തരത്തിൽ ജാതിമത വർണ വർഗ ഭേദമന്യേ എല്ലാവരെയും പരിപാലിക്കുന്ന ദൈവത്തിന്‍റെ പേരിൽ അവന്‍റെ തന്നെ സൃഷ്ടികളെ നിഷ്ക്കരുണം കൊല്ലുകയും ഉപദ്രവിക്കുകയും ചെയ്യുന്നത് എന്ത് യുക്തിയുടെ അടിസ്ഥാനത്തിലാണ്? കരുണാമയനായ ദൈവം തന്‍റെ സൃഷ്ടികൾക്ക് മേൽ അക്രമം ചെയ്യുവാൻ പ്രേരിപ്പിക്കുന്നു എന്ന്  എങ്ങനെയാണ് പറയാന്‍ സാധിക്കുക?

ഒരു ഭാഗത്ത് കരുണാമയനും സർവലോക പരിപാലകനുമായ ഒരു ദൈവത്തിൽ വിശ്വസിക്കുകയും, മറുഭാഗത്ത് അവന്‍റെ  നിരപരാധികളായ സൃഷ്ടികളെ അതിക്രൂരമായി ഉപദ്രവിക്കുകയും ചെയ്യുന്നത് എങ്ങനെയാണ് ന്യായീകരിക്കപ്പെടുക?

ആരെങ്കിലും നിരപരാധിയായ ഒരാളെ വധിച്ചാൽ അത് മനുഷ്യകുലത്തെ മുഴുവൻ വധിച്ചതിന് തുല്യമാണെന്നാണ് വിശുദ്ധ ഖുർആന്‍ പറയുന്നത്.^[7](5:33)

മാനവികതയുടെ ഈ തത്വത്തെ  ഊട്ടിയുറപ്പിച്ചുകൊണ്ട്, പ്രവാചകൻ മുഹമ്മദ്(സ) ഇപ്രകാരം അരുളി:

“ആരുടെ കൈയിൽ നിന്നും നാവിൽ നിന്നും മറ്റുള്ളവർ സുരക്ഷിതരാകുന്നുവോ, അവനാണ് മുസ്‌ലിം.”^[8](ബുഖാരി, നസായി)

ഇതിനര്‍ഥം ക്രൂരകൃത്യങ്ങളിലും മർദന നയങ്ങളിലും ഒരു കാരണവശാലും ഒരു മുസ്‌ലിം പങ്കാളിയാകരുതെന്നാണ്.

ഇത്തരം അധ്യാപനങ്ങൾ വ്യക്തമാക്കുന്നത്, ഇസ്‌ലാം കൊലയും അക്രമവും വാക്കാൽ നിരുത്സാഹപ്പെടുത്തുക മാത്രമല്ല, മറിച്ച് മനുഷ്യകുലത്തെ സംരക്ഷിക്കാനും സമാധാനത്തെ പ്രോത്സാഹിപ്പിക്കാനും സമൂഹത്തിലെ എല്ലാ വിഭാഗങ്ങളിലും  കാരുണ്യവും സഹാനുഭൂതിയും പ്രകടിപ്പിക്കുവാനും  ശക്തമായി ഉത്ബോധിപ്പിക്കുകയും ചെയ്യുന്നു എന്നാണ്.

ഇസ്‌ലാമിന്‍റെ യഥാർഥ ആത്മാവിനെ വിശദീകരിച്ചു കൊണ്ട്, അഹ്‍മദിയ്യാ മുസ്‌ലിം പ്രസ്ഥാനസ്ഥാപകൻ, ഹദ്റത്ത് മിർസാ ഗുലാം അഹ്‍മദ്(അ) പറയുന്നു:

“ഇസ്‌ലാമിന്‍റെ യഥാർഥ അധ്യാപനങ്ങൾ അനുസരിച്ച്, മതത്തിന് രണ്ട് ഭാഗങ്ങൾ മാത്രമേ ഉള്ളൂ, അല്ലെങ്കിൽ  രണ്ട് പ്രധാന ലക്ഷ്യങ്ങളിലാണ് ഇസ്‌ലാമിക അധ്യാപനങ്ങൾ അടിയുറച്ചിരിക്കുന്നതെന്ന് പറയാം. ഒന്നാമതായി, ഏക ദൈവത്തെ തികഞ്ഞ ഉറപ്പോടെ അറിയുകയും അവനെ നിഷ്കളങ്കമായി സ്നേഹിക്കുകയും സ്നേഹത്തിന്‍റെയും വിധേയത്വത്തിന്‍റെയും തേട്ടമനുസരിച്ച് പൂർണമായും അവന്‍റെ അനുസരണത്തിൽ മുഴുകുകയും ചെയ്യുക. രണ്ടാമത്തെ ലക്ഷ്യം, അവന്‍റെ സൃഷ്ടികളെ സേവിക്കുകയും നിങ്ങളുടെ എല്ലാ കഴിവുകളും ശേഷികളും മറ്റുള്ളവരുടെ സ്നേഹപൂർവമായ സേവനത്തിനായി വിനിയോഗിക്കുകയും ചെയ്യുക എന്നതാണ്. നിങ്ങളോട് ആരെങ്കിലും ദയാപൂർവമായി പെരുമാറുകയാണെങ്കിൽ, അവരോട് ആത്മാർഥമായ നന്ദി പ്രകടിപ്പിക്കുകയും തിരിച്ച് സ്നേഹം നല്കുകയും ചെയ്യുക. നിങ്ങൾക്ക് ഉപകാരം ചെയ്യുന്ന ആൾ ഒരു രാജാവോ ഭരണാധികാരിയോ ഏറ്റവും നിസ്സാരനും നിരാലംബനുമായ ആളോ ആയിക്കൊള്ളട്ടെ, അയാളുമായി നിങ്ങളെപ്പോഴും സ്നേഹബന്ധം പുലർത്തുകയും വേണം.”^[9]

ഇത്തരത്തിൽ, ജാതിമത വർണ ഭേദമന്യേ  സ്നേഹം, സഹാനുഭൂതി, കാരുണ്യം എന്നീ സൽഗുണങ്ങൾ അനുവർത്തിക്കണമെന്നാണ് പരിശുദ്ധ ഖുർആൻ ആവർത്തിച്ചാവർത്തിച്ച് കല്പിക്കുന്നത്.

വിശുദ്ധ ഖുർആനിലെ  16-ാം അദ്ധ്യായത്തിലെ 91-ാം വചനത്തിൽ അല്ലാഹു പറയുന്നു:

“നീതിപുലർത്തുന്നതിനും മറ്റുള്ളവർക്ക് നന്മ ചെയ്യുന്നതിനും അടുത്ത ബന്ധുക്കൾക്ക് എന്നപോലെ അന്യർക്കും സഹായം നല്കുന്നതിനും അല്ലാഹു കല്പിക്കുന്നു.”

ഈ ഖുർആനിക വചനം,  സർവ മനുഷ്യരോടും നീതിയും സഹാനുഭൂതിയും അനുവർത്തിക്കുവാനാണ് മുസ്‌ലീങ്ങളോട് കല്പിക്കുന്നത്. നമ്മോട് ദയ കാണിച്ചവരോട് മാത്രമല്ല, മറിച്ച്, നമുക്ക് യാതൊരു ഉപകാരം ചെയ്യാത്തവരോടും, സഹാനുഭൂതി കാണിക്കാത്തവരോടും ഈ ദയ പ്രകടിപ്പിക്കണം.

മാത്രമല്ല, ലോകത്തിലെ ഓരോ വ്യക്തിയെയും സ്വന്തം കുടുംബാംഗമായി കാണാനും ദൈവത്തിന്‍റെ സൃഷ്ടികളെ അത്രമേൽ സ്നേഹിക്കാനും ആണ് ഈ വചനം ഒരു മുസ്‌ലിമിനോട് ആവശ്യപ്പെടുന്നത്.