ഈ കാലഘട്ടത്തിൽ സോഷ്യൽ മീഡിയയുടെ ഗുണങ്ങൾ ഒരുപാടുണ്ട്. അത് ഫലപ്രദമായി ഉപയോഗിക്കപ്പെടുകയും ചെയ്യുന്നുണ്ട്. എന്നാൽ മറുഭാഗത്ത്, സോഷ്യൽ മീഡിയയുടെ ചില കാര്യങ്ങൾ മനസ്സിനെ വേദനിപ്പിക്കുന്നതുമുണ്ട്. ഇതിനെ ഉപയോഗപ്പെടുത്തിക്കൊണ്ട് അഹ്മദിയ്യാ ജമാഅത്തിന്റെ എതിരാളികൾ വളരെ അസഭ്യമായ കാര്യങ്ങൾ പറയുകയും ചെയ്യുന്നു. മസീഹ് മൗഊദിനെതിരിൽ കളവും നീചവുമായ കാര്യങ്ങൾ പറഞ്ഞുകൊണ്ട് അഹ്മദികളുടെ വികാരത്തെ അവർ വ്രണപ്പെടുത്തുന്നു. പിന്നീട് ചില അഹ്മദികളും ഇവർക്ക് മറുപടിയായി കൊണ്ട് തെറ്റായ രീതിയിൽ പ്രതികരിക്കുന്നു. ചിലപ്പോൾ അവരുടെ ഉദ്ദേശം ശുദ്ധമായിരിക്കാം. എന്നിരുന്നാലും ചില സന്ദർഭങ്ങളിൽ അവരിൽ നിന്നും പുറത്തുവരുന്ന ചില പദങ്ങൾ തെറ്റായ രീതിയിൽ വ്യാഖ്യാനിക്കപ്പെടാവുന്നവയായിരിക്കും.
ഇങ്ങനെ മറുപടി നൽകുക എന്നത് നമ്മുടെ രീതിയല്ല. ഒരു അഹ്‌മദി ഇതിൽ നിന്നും വിട്ടുനിൽക്കേണ്ടതാണ്. മോശമായ രീതിയിൽ സംസാരിക്കുക എന്നത് നമ്മുടെ രീതിയല്ല. അല്ലെങ്കിൽ അറിവില്ലായ്മ കൊണ്ട് നമ്മുടെ വായിൽ നിന്നും ആരെയെങ്കിലും ഏതെങ്കിലും തരത്തിൽ വേദനിപ്പിക്കുന്ന പദങ്ങൾ ഉപയോഗിക്കുക എന്നത് നമ്മുടെ ജോലിയല്ല.

പിന്നീട് ഇതിനെ ഉപയോഗപ്പെടുത്തികൊണ്ട് ‘നബി തിരുമേനി സല്ലല്ലാഹു അലൈഹി വസല്ലമയെയും അവിടുത്തെ സഹാബാക്കളെയും നഊദുബില്ലാഹ് നിന്ദിക്കുന്നവരാണ് നാം ‘ എന്ന് പറഞ്ഞുകൊണ്ടിരിക്കുവാനുള്ള സന്ദർഭം അവർക്ക് ലഭിക്കാനിടയുണ്ട്. എന്നാൽ നബി തിരുമേനി സല്ലല്ലാഹു അലൈഹി വസല്ലമയെയും അവിടുത്തെ സഹാബാക്കളെയും കുറിച്ച് നമ്മുടെ മനസ്സുകളിൽ ഉള്ള സ്ഥാനം എന്താണോ അതിൻെറ കോടിയിലൊരംശം പോലും അവരുടെ ഹൃദയങ്ങളിൽ ഉണ്ടാവുകയില്ല. നമ്മുടെ സർവ്വതും നബി തിരുമേനി സല്ലല്ലാഹു അലൈഹി വസല്ലമക്ക് വേണ്ടി ത്യജിക്കാൻ നാം തയ്യാറാണ്.
അവിടുന്ന് ‘അല്ലാഹുവിന് ഏറ്റവും ഇഷ്ടപ്പെട്ടതും അവസാനത്തെ ശരീഅത്തി പ്രവാചകനുമായ ‘ ഖാത്തമുൽ അമ്പിയാ ആകുന്നു. ആ മഹാത്മാവിൻ്റെ സഹാബാക്കളെ സംബന്ധിച്ച് മസീഹ് മൗഊദ് (അ) നിരവധി സ്ഥലങ്ങളിൽ ഉപയോഗിച്ചിട്ടുള്ള പദങ്ങളും അവരെ സംബന്ധിച്ചുള്ള കാര്യങ്ങളും ഈ എതിരാളികളുടെ ചിന്തകൾക്ക് പോലും അതീതമാണ്. നമ്മുടെ ഹൃദയങ്ങളിൽ നബി തിരുമേനി സല്ലല്ലാഹു അലൈഹി വസല്ലമക്ക് മാത്രമല്ല ഉന്നത സ്ഥാനമുള്ളത് – അതേതായാലും ഉള്ളത് തന്നെയാണ് – ഇതിന്റെ നിലവാരത്തിലേക്ക് മറ്റാർക്കും തന്നെ എത്തിപ്പെടാൻ സാധിക്കുകയില്ല. അതുകൂടാതെ നമ്മുടെ ഹൃദയങ്ങളിൽ നബിസല്ലല്ലാഹു അലൈഹി വസല്ലമയുടെ സഹാബാക്കളുടെ പദവികളും വളരെ ഉന്നതമാണ്.

ഇത് ഓരോ അഹ്മദിയും എപ്പോഴും ഓർത്തിരിക്കണം. അതുകൊണ്ട് തെറ്റായ ചിന്തയുണ്ടാക്കുന്ന അല്ലെങ്കിൽ തെറ്റായ ചിന്തയുണ്ടാകാൻ ഇടയുള്ള കാര്യങ്ങൾ പറയുന്നതിൽ നിന്നും ഓരോ അഹ്‌മദിയും വിട്ടു നിൽക്കേണ്ടതാണ്. ഇങ്ങനെയുള്ള മറുപടി നൽകിക്കൊണ്ട് തങ്ങൾ ജമാഅത്തിന്റെ അന്തസ്സിനെ കാത്തുസൂക്ഷിച്ചിരിക്കുന്നു എന്ന് ചില അഹ്മദികൾ കരുതുന്നു. അവരോട് ചോദിക്കുമ്പോൾ അവർ ഇതാണ് പറയുന്നത്. എന്നാൽ ഇത്തരം നാമമാത്രമായ ആവേശം വാസ്തവത്തിൽ വിവരമില്ലായ്മയാണ്. അഹ്മദി ആയിക്കൊണ്ട്, ഏതെങ്കിലും തരത്തിൽ തെറ്റായി വ്യാഖ്യാനിക്കപ്പെടാവുന്ന ഇത്തരം വാക്കുകൾ, ആരെങ്കിലും പ്രയോഗിക്കുന്നു എങ്കിൽ അവർ മസീഹ് മൗഊദ് (അ) നെയും ജമാഅത്തിനെയും കളങ്കപ്പെടുത്തുകയാണ് ചെയ്യുന്നത്.