മുസ്‌ലിം സൈന്യം യുദ്ധത്തിനായി പുറപ്പെട്ട ശേഷം, നബി തിരുമേനി(സ) ആദ്യമായി തമ്പടിച്ച സ്ഥലം മദീനയിൽ നിന്ന് ഒരു രാത്രി യാത്രാദൂരത്തിലുള്ള ദൂ ഖുശുബ് ആയിരുന്നു. ഈ യാത്രയുടെ കാലയളവിൽ പ്രവാചകന്‍(സ) ളുഹർ (ഉച്ചക്ക് ശേഷമുള്ള ആദ്യത്തെ നമസ്കാരം) അസ്ർ (ഉച്ചക്ക് ശേഷമുള്ള രണ്ടാമത്തെ നമസ്കാരം) എന്നിവയും, മഗ്‌രിബ് (സന്ധ്യാ നമസ്കാരം) ഇശാ (രാത്രി നമസ്കാരം) എന്നിവയും ഒരുമിച്ച് നിർവഹിച്ചു എന്ന് രേഖപ്പെടുത്തിയിട്ടുണ്ട്.
യാത്രയ്ക്കിടെ, നബി തിരുമേനി(സ) നമസ്കാരത്തിന് മുമ്പ് കൈകൾ മൂന്ന് തവണ കഴുകിയും, മുഖം കഴുകിയും, കൈമുട്ടുകൾ വരെ കൈകൾ കഴുകിയും, തന്‍റെ തുകൽ ഷൂസുകളിൽ നനഞ്ഞ കൈകൾ തടവിയും വുദു (അംഗശുദ്ധി) ചെയ്യുകയുണ്ടായി.

യാത്രയ്ക്കിടെ ഹദ്റത്ത് അബ്ദുർ റഹ്‍മാന്‍ ബിൻ ഔഫ്(റ) നമസ്കാരത്തിന് നേതൃത്വം നൽകാൻ നിയോഗിക്കപ്പെട്ടു എന്നും രേഖപ്പെടുത്തിയിട്ടുണ്ട്. നബി തിരുമേനി(സ) നമസ്കാരത്തിന്‍റെ രണ്ടാമത്തെ റക്അത്തിൽ ചേരുകയും, ജമാഅത്ത് നമസ്കാരം കഴിഞ്ഞ ശേഷം സ്വന്തം നമസ്കാരം പൂർത്തിയാക്കാൻ എഴുന്നേൽക്കുകയും ചെയ്തു. ഇത് കണ്ട് മറ്റ് മുസ്‌ലീങ്ങൾ ആശങ്കാകുലരായി. എന്നാൽ, നമസ്കാരം പൂർത്തിയാക്കിയ ശേഷം പ്രവാചകന്‍(സ) അവരെ അഭിനന്ദിക്കുകയും, കൃത്യ സമയത്ത് നമസ്കാരം നിർവഹിച്ചത് നന്നായി എന്ന് പറയുകയും ചെയ്തു.

നബി തിരുമേനി(സ) ഹിജ്ർ താഴ്വര കടന്നുപോകുമ്പോൾ, അതിക്രമം പ്രവർത്തിച്ചവരുടെ പ്രദേശത്ത് കൂടി കരഞ്ഞു കൊണ്ടല്ലാതെ പ്രവേശിക്കരുതെന്ന് പറഞ്ഞു. അതായത് അത്യധികം ഭയത്തോടും അല്ലാഹുവിനോട് പ്രാർഥിച്ചു കൊണ്ടുമല്ലാതെ പ്രവേശിക്കരുത്. തുടർന്ന് നബി തിരുമേനി(സ) തന്‍റെ മേൽവസ്ത്രം കൊണ്ട് മുഖം മറച്ചു. മറ്റൊരു വിവരണമനുസരിച്ച് തലയും മറച്ചു. പ്രവാചകൻ സ്വാലിഹിന്‍റെ(അ) ജനതയായിരുന്ന സമൂദ് താമസിച്ചിരുന്ന സ്ഥലമാണ് ഹിജ്ർ. ഇത് സമൃദ്ധമായ താഴ്വരയായിരുന്നു. അതിലെ ജനങ്ങൾക്ക് അല്ലാഹു ധാരാളം അനുഗ്രഹങ്ങൾ നൽകിയിരുന്നു. എന്നിരുന്നാലും, പ്രവാചകൻ സ്വാലിഹിന്‍റെ(അ) ഒട്ടകം അവർക്കൊരു ദൃഷ്ടാന്തമായിരുന്നു. അതിനെ അവർ മുടന്തിയാക്കിയപ്പോൾ അല്ലാഹുവിന്‍റെ അപ്രീതിക്ക് പാത്രമായി. അവൻ അവരുടെ അനുഗ്രഹങ്ങൾ എടുത്തുമാറ്റി. ഈ ജനതയെക്കുറിച്ച് വിശുദ്ധ ഖുർആനിൽ ഹിജ്റിലെ ആളുകൾ എന്ന് പരാമർശിച്ചിട്ടുണ്ട്. വിശുദ്ധ ഖുർആനിൽ അൽ-ഹിജ്ർ എന്ന് പേരുള്ള ഒരധ്യായവുമുണ്ട്.

തബൂക്കിലേക്ക് യാത്ര ചെയ്യുമ്പോൾ, നബി തിരുമേനി(സ)യുടെ ഒട്ടകം ഖസ്‌വ വഴിയിൽ നിന്ന് കാണാതായി. അനുചരന്മാർ ഒട്ടകത്തെ തിരഞ്ഞു. ബദ്ർ യുദ്ധത്തിൽ പങ്കെടുത്ത ഹദ്റത്ത് ഉമാറ(റ)യും കൂട്ടത്തിലുണ്ടായിരുന്നു. അദ്ദേഹത്തിന്‍റെ കൂടാരത്തിൽ ഒരു മുസ്‌ലിം ഉണ്ടായിരുന്നു. അയാൾ മുമ്പ് ഒരു യഹൂദനായിരുന്നു. അയാൾ ഇസ്‌ലാം സ്വീകരിച്ചതായി ഭാവിക്കുകയും യഥാർഥത്തിൽ ഒരു കപടവിശ്വാസിയുമായിരുന്നു. ഒട്ടകം കാണാതായപ്പോൾ അയാൾ പറഞ്ഞു: നബി തിരുമേനി(സ) ഒരു പ്രവാചകനാണെങ്കിൽ ഈ ഒട്ടകം എവിടെയുണ്ടെന്ന് അറിയേണ്ടതല്ലേ. ഉടൻ തന്നെ, ഒട്ടകത്തിന്‍റെ കൃത്യമായ സ്ഥലം അല്ലാഹു പ്രവാചകന്‍(സ)ക്ക് അറിയിച്ചു. സൈദ് എന്ന് പേരുള്ള ഈ മനുഷ്യൻ പറഞ്ഞതറിഞ്ഞ ഹദ്റത്ത് ഉമാറ(റ), അയാളെ തന്‍റെ കൂടാരത്തിൽ നിന്ന് പുറത്താക്കി.

യാത്രയ്ക്കിടയിൽ മുസ്‌ലീങ്ങളുടെ ഭക്ഷണ സാമഗ്രികൾ കുറഞ്ഞു. മാംസത്തിനായി തങ്ങളുടെ യാത്രാ ഒട്ടകങ്ങളിൽ ചിലതിനെ അറുക്കാൻ മുസ്‌ലീങ്ങൾ നബി തിരുമേനി(സ)യോട് അനുവാദം ചോദിച്ചു. ഇതിന് മറുപടിയായി ഹദ്റത്ത് ഉമർ(റ) തിരുനബി(സ)യോട് പറഞ്ഞു, ഇത് അവരുടെ യാത്രാ മൃഗങ്ങളെ കുറയ്ക്കും. പകരം ബാക്കിയുള്ള സാധനങ്ങൾ എല്ലാവരും ഒരുമിച്ച് കൂട്ടുകയും നബി തിരുമേനി(സ) പ്രാർഥിക്കണമെന്നും അദ്ദേഹം നിർദ്ദേശിച്ചു. നബി തിരുമേനി(സ) അത് അംഗീകരിക്കുകയും അങ്ങനെ തന്നെ ചെയ്യുകയും ചെയ്തു. സാധനങ്ങൾക്ക് വേണ്ടി പ്രാർഥിച്ച ശേഷം, എല്ലാവർക്കും പൂർണ സംതൃപ്തിയോടെ ഭക്ഷണം കഴിക്കാൻ കഴിഞ്ഞു. അൽപ്പം ബാക്കിയാവുകയും ചെയ്തു.

യാത്രയ്ക്കിടയിൽ രണ്ട് വ്യക്തികൾ തമ്മിൽ വഴക്കുണ്ടാവുകയും, അവരുടെ കൈകൾ മുറിയുകയും ഒരാൾക്ക് മുൻവശത്തെ പല്ലുകൾ നഷ്ടപ്പെടുകയും ചെയ്തു. പല്ല് നഷ്ടപ്പെട്ടയാൾ തിരുനബിയുടെ(സ) അടുക്കൽ വന്ന് നഷ്ടപരിഹാരം ആവശ്യപ്പെട്ടു. ഈ സാഹചര്യത്തിൽ നഷ്ടപരിഹാരം ബാധകമല്ലെന്ന് നബി തിരുമേനി(സ) പറഞ്ഞു. അതിനാൽ, സാഹചര്യങ്ങൾക്കനുസരിച്ചാണ് നഷ്ടപരിഹാരം നൽകുന്നത് എന്ന് ഇത് വ്യക്തമാക്കുന്നു.

യാത്രയ്ക്കിടയിൽ മുസ്‌ലിം സൈന്യം ഒരു ഈന്തപ്പഴത്തോട്ടത്തിന് അടുത്തുകൂടി കടന്നുപോയപ്പോൾ ആ തോട്ടത്തിലെ ഈന്തപ്പഴങ്ങളുടെ എണ്ണം ഊഹിക്കാൻ നബി തിരുമേനി(സ) അനുചരന്മാരോട് പറഞ്ഞു. പിന്നീട് പ്രവാചകന്‍(സ) തന്നെ അത് 10 വസ്ഖ് (പഴയ അളവനുസരിച്ചുള്ള ഭാരം) ആയിരിക്കുമെന്ന് ഊഹിച്ചു. പറിച്ചെടുക്കുമ്പോൾ ഈന്തപ്പഴങ്ങളുടെ ഭാരം ഓർത്തുവെക്കാൻ നബി തിരുമേനി(സ) തോട്ടത്തിന്‍റെ ഉടമയോട് പറഞ്ഞു. യുദ്ധത്തിൽ നിന്ന് മടങ്ങുമ്പോൾ, മുസ്‌ലീങ്ങൾ തോട്ടത്തിന് അടുത്തുകൂടി കടന്നുപോവുകയും ഉടമയോട് ഈന്തപ്പഴങ്ങളുടെ ഭാരം ചോദിക്കുകയും ചെയ്തപ്പോൾ, നബി തിരുമേനി(സ) കണക്കാക്കിയതുപോലെ കൃത്യം 10 വസ്ഖ് ഭാരമുണ്ടായിരുന്നു എന്ന് അവർ പറഞ്ഞു.