ഹദ്റത്ത് ഖലീഫത്തുൽ മസീഹ് പറയുകയുണ്ടായി; അല്ലാഹുവാണ് ഏറ്റവും വലിയ ഔദാര്യമുള്ളവനെന്നും, മനുഷ്യരുടെ ഇടയിൽ വെച്ച് ഏറ്റവും വലിയ ഔദാര്യമുള്ളവൻ താൻ തന്നെയാണെന്നും വിശുദ്ധ പ്രവാചകൻ(സ) അരുളിയിട്ടുണ്ട്. തീർച്ചയായും, വിശുദ്ധ പ്രവാചകന്‍റെ(സ) ഔദാര്യം, പ്രത്യേകിച്ച് റമദാൻ മാസത്തിൽ, ഒരു കൊടുങ്കാറ്റിനോടാണ് ഉപമിക്കപ്പെട്ടിട്ടുള്ളത്, ആ സമയത്ത് തന്‍റെ പക്കലുള്ളതെന്തും അദ്ദേഹം ദാനധർമ്മങ്ങൾക്കായി ചിലവഴിച്ചിരുന്നു.

തനിക്ക് സ്വർണ്ണം കൊണ്ടുള്ള ഒരു പർവ്വതം ഉണ്ടായാൽ പോലും, അതപ്പാടെ താൻ ദാനധർമ്മങ്ങൾക്കായി വിതരണം ചെയ്യുമെന്ന് വിശുദ്ധ പ്രവാചകൻ (സ) ഒരിക്കൽ പറയുകയുണ്ടായി. തനിക്കായി സ്വർണ്ണത്തിന്‍റെ ഒരു പർവ്വതം ഉണ്ടായിരിക്കുന്നത് താൻ ഇഷ്ടപ്പെടുന്നില്ലെന്നും, അത്തരമൊരു സമ്പത്ത് കൈവശം വന്ന് മൂന്നാം ദിവസം തികയുമ്പോഴേക്കും, കടം വീട്ടാനായി മാറ്റിവെക്കേണ്ടി വരുന്നതൊഴികെ, ദാനധർമ്മങ്ങൾക്കായി ചിലവഴിക്കാത്ത ഒരു പൈസ പോലും തന്‍റെ പക്കൽ അവശേഷിക്കരുതെന്ന് താൻ ആഗ്രഹിക്കുന്നുവെന്നും അദ്ദേഹം പറയുകയുണ്ടായി.

ഒരിക്കൽ, ഒരാൾ രണ്ട് മലകൾക്കിടയിലുള്ള എല്ലാ ആടുകളെയും തനിക്ക് നൽകണമെന്ന് വിശുദ്ധ പ്രവാചകനോട് (സ) അഭ്യർത്ഥിച്ചു. വിശുദ്ധ പ്രവാചകൻ (സ) ആ വ്യക്തിക്ക് ആ ആടുകളെ മുഴുവൻ നൽകുകയും ചെയ്തു. തുടർന്ന് ഈ മനുഷ്യൻ തന്‍റെ ജനങ്ങളുടെ അടുക്കലേക്ക് മടങ്ങിച്ചെന്ന്, വിശുദ്ധ പ്രവാചകൻ (സ) ദാരിദ്ര്യത്തെ ഒട്ടും ഭയപ്പെടാത്ത വിധം അത്രയേറെ ഔദാര്യമുള്ളവനാണെന്ന് പറഞ്ഞുകൊണ്ട് ഇസ്‌ലാം സ്വീകരിക്കാൻ അവരെ പ്രോത്സാഹിപ്പിച്ചു.

ഒരിക്കൽ ഹദ്റത്ത് ഉമ്മുസലമ (റ) വിശുദ്ധ പ്രവാചകന്‍റെ (സ) മുഖത്തിന്‍റെ നിറം മാറിയതായി ശ്രദ്ധിക്കുകയും, അദ്ദേഹത്തിന് സുഖമില്ലാത്തതുകൊണ്ടായിരിക്കാം അതെന്ന് അവർ കരുതുകയും ചെയ്തു. അദ്ദേഹത്തിന് സുഖമില്ലേ എന്ന് അവർ വിശുദ്ധ പ്രവാചകനോട് (സ) ചോദിച്ചപ്പോൾ, തനിക്ക് സുഖമില്ലായ്മയൊന്നുമില്ലെന്ന് അദ്ദേഹം മറുപടി നൽകി; പകരം, തന്‍റെ കൈവശം ഏഴ് ദീനാറുകൾ വരികയും, താൻ അതിനെക്കുറിച്ച് മറന്നുപോയതിനാൽ ആ സമ്പത്ത് ദാനധർമ്മമായി ചിലവഴിക്കാതെ ഒരു രാത്രി കടന്നുപോവുകയും ചെയ്തു എന്ന കാര്യമാണ് തന്നെ അലട്ടുന്നത് എന്ന് അദ്ദേഹം പറഞ്ഞു.

ഒരിക്കൽ, നമസ്കാരം പൂർത്തിയാക്കിയ ഉടൻ തന്നെ വിശുദ്ധ പ്രവാചകൻ(സ) തന്‍റെ പത്നിമാരിൽ ഒരാളുടെ വീട്ടിലേക്ക് വേഗത്തിൽ പോവുകയുണ്ടായി. ജനങ്ങൾ ആശങ്കാകുലരായി; വിശുദ്ധ പ്രവാചകൻ(സ) വീട്ടിൽ നിന്ന് പുറത്തേക്ക് വരികയും ജനങ്ങളുടെ മുഖത്തെ ആശങ്ക കാണുകയും ചെയ്തപ്പോൾ, തന്‍റെ കൈവശം അല്പം സ്വർണ്ണം വന്നിട്ടുണ്ടായിരുന്നുവെന്നും, അത് പ്രാർത്ഥനയിൽ എനിക്ക് പൂര്‍ണമായി ശ്രദ്ധ പതിപ്പിക്കാന്‍ കഴിയാത്തതിന് ഒരു കാരണമായി മാറാൻ താൻ ആഗ്രഹിച്ചില്ലെന്നും അദ്ദേഹം വിശദീകരിച്ചു, അതിനാൽ ആ സമ്പത്ത് ദാനധർമ്മമായി വിതരണം ചെയ്യാൻ അദ്ദേഹം നിർദ്ദേശിച്ചു.

ഒരിക്കൽ, വിശുദ്ധ പ്രവാചകന്(സ) ബഹ്റൈനിൽ നിന്ന് കുറച്ച് സമ്പത്ത് ലഭിക്കുകയുണ്ടായി, അദ്ദേഹത്തിന് ലഭിച്ചിട്ടുള്ളതിൽ വെച്ച് ഏറ്റവും വലിയ സമ്പത്തായിരുന്നു അത്. തുടർന്ന് വിശുദ്ധ പ്രവാചകൻ(സ) കണ്ടുമുട്ടിയവർക്കെല്ലാം ഈ സമ്പത്ത് വിതരണം ചെയ്തു. ഹദ്റത്ത് അബ്ബാസ്(റ) വിശുദ്ധ പ്രവാചകനെ സമീപിക്കുകയും തനിക്കും അല്പം സമ്പത്ത് നൽകണമെന്ന് അഭ്യർത്ഥിക്കുകയും ചെയ്തു, വിശുദ്ധ പ്രവാചകൻ(സ) അത് അദ്ദേഹത്തിന് നൽകുകയും ചെയ്തു. ഹദ്റത്ത് അബ്ബാസ്(റ) തന്‍റെ വസ്ത്രങ്ങളിൽ സ്വർണ്ണക്കൂമ്പാരങ്ങൾ നിറയ്ക്കാൻ തുടങ്ങിയെങ്കിലും, അത് ചുമക്കാൻ അദ്ദേഹത്തിന് കഴിഞ്ഞില്ല. അതിനാൽ ഈ സമ്പത്ത് ചുമക്കാൻ തന്നെ സഹായിക്കാൻ മറ്റാരെയെങ്കിലും ഏർപ്പാടാക്കണമെന്ന് അദ്ദേഹം വിശുദ്ധ പ്രവാചകനോട്(സ) ആവശ്യപ്പെട്ടു. അതിന് കഴിയില്ല എന്ന് വിശുദ്ധ പ്രവാചകൻ(സ) പറഞ്ഞു. ഒടുവിൽ, ഹദ്റത്ത് അബ്ബാസ്(റ) തനിക്ക് സ്വയം ചുമക്കാൻ കഴിയുന്നത്ര സമ്പത്ത് മാത്രമാണ് എടുത്തത്. അങ്ങനെ, വിശുദ്ധ പ്രവാചകൻ(സ) തന്‍റെ അനുചരന്മാരെ മിതത്വം പാലിക്കാൻ പഠിപ്പിച്ചു.

ഹദ്റത്ത് ഖലീഫത്തുൽ മസീഹ് പറയുകയുണ്ടായി; തന്നോട് എന്തെങ്കിലും ആവശ്യപ്പെടുന്ന ഒരാളെയും വിശുദ്ധ പ്രവാചകൻ(സ) ഒരിക്കലും നിരസിച്ചിട്ടില്ല എന്ന് നിവേദനങ്ങളിൽ രേഖപ്പെടുത്തപ്പെട്ടിട്ടുണ്ട്. എല്ലാ മനുഷ്യരിലും വെച്ച് ഏറ്റവും വലിയ ഔദാര്യമുള്ളവൻ വിശുദ്ധ പ്രവാചകൻ(സ) ആയിരുന്നുവെന്ന് ഹദ്റത്ത് അലി (റ) പറയുകയുണ്ടായി. ഒരിക്കൽ, വിശുദ്ധ പ്രവാചകന് ഒരു ശീല സമ്മാനമായി ലഭിക്കുകയുണ്ടായി, അദ്ദേഹം അത് ഒരു ലുങ്കിയായി ധരിച്ചു. ഒരു അനുചരൻ ഇത് കാണുകയും അത് തനിക്ക് നൽകണമെന്ന് വിശുദ്ധ പ്രവാചകനോട് അഭ്യർത്ഥിക്കുകയും ചെയ്തു. വിശുദ്ധ പ്രവാചകൻ(സ) തന്‍റെ വീട്ടിലേക്ക് പോവുകയും, ആ ശീല അഴിച്ചുമാറ്റി, അത് മടക്കി, അത് ആവശ്യപ്പെട്ട അനുചരന് കൊടുത്തയക്കുകയും ചെയ്തു. തന്നോട് ആവശ്യപ്പെടുന്നതെന്തും വിശുദ്ധ പ്രവാചകൻ(സ) നൽകുമെന്ന് അറിഞ്ഞിരുന്നിട്ടും ഇങ്ങനെയൊരു അഭ്യർത്ഥന നടത്തിയത് ശരിയായില്ല എന്ന് ജനങ്ങൾ ആ അനുചരനോട് പറഞ്ഞു. എന്നാൽ, തന്‍റെ മരണസമയത്ത് തന്‍റെ മൃതശരീരം പുതപ്പിക്കാൻ വേണ്ടിയാണ് താൻ അത് ചോദിച്ചതെന്ന് ആ അനുചരൻ പറയുകയുണ്ടായി.

ഒരിക്കൽ വിശുദ്ധ പ്രവാചകന് (സ) എഴുപതിനായിരം ദിർഹം ലഭിക്കുകയുണ്ടായി, ആ സമ്പത്തിൽ നിന്ന് ഒരൊറ്റ ദിർഹം പോലും അദ്ദേഹത്തിന്‍റെ പക്കൽ അവശേഷിച്ചില്ല, കാരണം, അദ്ദേഹത്തിന്‍റെ അടുക്കൽ വന്ന് സമ്പത്ത് ആവശ്യപ്പെട്ട എല്ലാവർക്കും അദ്ദേഹം അത് മുഴുവനും വിതരണം ചെയ്തു.

ഒരിക്കൽ വിശുദ്ധ പ്രവാചകൻ(സ) നാല് ദിർഹത്തിന് ഒരു കുപ്പായം വാങ്ങി. വിശുദ്ധ പ്രവാചകൻ(സ) ആ കുപ്പായം ധരിക്കുകയും, ഒരു അനുചരൻ അത് തനിക്ക് നൽകണമെന്ന് അദ്ദേഹത്തോട് അഭ്യർത്ഥിക്കുകയും ചെയ്തു, അങ്ങനെ വിശുദ്ധ പ്രവാചകൻ(സ) അത് അദ്ദേഹത്തിന് നൽകി. തുടർന്ന്, വിശുദ്ധ പ്രവാചകൻ(സ) വീണ്ടും കടയിലേക്ക് മടങ്ങിച്ചെന്ന് നാല് ദിർഹത്തിന് മറ്റൊരു കുപ്പായം കൂടി വാങ്ങി. ആ സമയത്ത്, വിശുദ്ധ പ്രവാചകന്‍റെ പക്കൽ ആകെ രണ്ട് ദിർഹം മാത്രമേ അവശേഷിച്ചിരുന്നുള്ളൂ. വിശുദ്ധ പ്രവാചകൻ(സ) മടങ്ങിവരുമ്പോൾ, ഒരു അടിമപ്പെൺകുട്ടി കരയുന്നത് അദ്ദേഹം കണ്ടു; വീട്ടിലേക്ക് ആട്ട വാങ്ങാൻ അവൾക്ക് രണ്ട് ദിർഹം നൽകിയിട്ടുണ്ടായിരുന്നുവെന്നും എന്നാൽ അവൾക്ക് ആ പണം നഷ്ടപ്പെട്ടുപോയെന്നും അവൾ പറഞ്ഞു. വിശുദ്ധ പ്രവാചകൻ(സ) തന്‍റെ പക്കൽ ബാക്കിയുണ്ടായിരുന്ന രണ്ട് ദിർഹം ആ പെണ്‍കുട്ടിക്ക് നൽകി. എന്നിരുന്നാലും, ആട്ട കൊണ്ടുവരാൻ വൈകിയതിന് വീട്ടിൽ നിന്ന് തനിക്ക് അടി ലഭിക്കുമെന്ന് ഭയന്ന് അവൾ വീണ്ടും കരഞ്ഞുകൊണ്ടേയിരുന്നു. അവസാനം വിശുദ്ധ പ്രവാചകൻ(സ) അവളെ അവളുടെ വീട്ടിലേക്ക് അനുഗമിക്കുകയും, അവിടെ വെച്ച് സലാം പറഞ്ഞുകൊണ്ട് അവരെ അഭിസംബോധന ചെയ്യുകയും ചെയ്തു. ആദ്യത്തെ രണ്ട് തവണയും അവർ മറുപടി നൽകിയില്ല, മൂന്നാമത്തെ തവണ മാത്രമാണ് അവർ മറുപടി നൽകിയത്. ആദ്യത്തെ രണ്ട് തവണയും ഞാൻ സലാം പറഞ്ഞത് കേട്ടില്ലേ എന്ന് വിശുദ്ധ പ്രവാചകൻ(സ) അവരോട് ചോദിച്ചു. ഞങ്ങൾ തീർച്ചയായും കേട്ടിരുന്നുവെന്ന് അവർ പറഞ്ഞു; എങ്കിലും, വിശുദ്ധ പ്രവാചകൻ(സ) ഞങ്ങൾക്ക് മേൽ വീണ്ടും വീണ്ടും സമാധാനത്തിന്‍റെ അഭിവാദ്യങ്ങൾ വർഷിച്ചുകൊണ്ടിരിക്കാൻ അവർ ആഗ്രഹിച്ചു. ആ അടിമപ്പെൺകുട്ടി ശിക്ഷിക്കപ്പെടുമെന്ന് ഭയപ്പെടുന്നുണ്ടെന്ന് വിശുദ്ധ പ്രവാചകൻ(സ) അവരോട് പറഞ്ഞപ്പോൾ, വിശുദ്ധ പ്രവാചകൻ(സ) തങ്ങളുടെ വീട്ടിലേക്ക് അവളെ അനുഗമിച്ചതിന്‍റെ ആദരസൂചകമായി അവൾ സ്വതന്ത്രയാക്കപ്പെട്ടതായി അവളുടെ യജമാനന്മാർ പറഞ്ഞു. തന്‍റെ പക്കലുണ്ടായിരുന്ന ആ പത്ത് ദിർഹങ്ങൾ അങ്ങേയറ്റം അനുഗൃഹീതമായിരുന്നുവെന്ന് വിശുദ്ധ പ്രവാചകൻ(സ) അഭിപ്രായപ്പെട്ടു, കാരണം ആ പത്ത് ദിർഹം കൊണ്ട് അല്ലാഹുവിന്‍റെ റസൂലിന്(സ) വസ്ത്രം ലഭിച്ചു, ഒരു അനുചരന് വസ്ത്രം ലഭിച്ചു, കൂടാതെ ഒരു അടിമപ്പെൺകുട്ടി സ്വതന്ത്രയാക്കപ്പെടുകയും ചെയ്തു.