വാഗ്ദത്ത മസീഹ്(അ)ന്റെ വീടിന് പുറത്ത് കാവൽ നിൽക്കാറുണ്ടായിരുന്ന ഒരാൾ സാക്ഷ്യപ്പെടുത്തിയത് ആ മഹാത്മാവ് എല്ലാവരോടും എപ്പോഴും ബഹുമാനത്തോടെയാണ് സംസാരിച്ചിരുന്നത് എന്നാണ്. അദ്ദേഹം അഹങ്കാരത്തിന്റെ നേരിയൊരു ലക്ഷണം പോലും കാണിച്ചിരുന്നില്ല  മാത്രമല്ല എല്ലാവരെയും പുഞ്ചിരിക്കുന്ന മുഖത്തോടെ മാത്രമാണ് അദ്ദേഹം സ്വീകരിച്ചിരുന്നത്. വാഗ്ദത്ത മസീഹ്(അ) മറ്റുള്ളവരെ ഒരിക്കലും “ഹേ നീ!” എന്ന് അഭിസംബോധന ചെയ്തിരുന്നില്ല, മറിച്ച് എല്ലാവരുമായും എപ്പോഴും ആദരവോടെയുള്ള സംഭാഷണം അദ്ദേഹം കാത്തുസൂക്ഷിച്ചു.

വാഗ്ദത്ത മസീഹ്(അ) ഒരിക്കലും വീട്ടുജോലികൾ ചെയ്യുന്നതിൽ ലജ്ജ കാണിച്ചു മാറി നിന്നില്ല. തറ തുടക്കുന്നതോ കിടക്ക വിരിക്കുന്നതോ അല്ലെങ്കിൽ മറ്റെന്തെങ്കിലും വീട്ട് ജോലികളിൽ ചെയ്യുന്നതോ ആയാൽ പോലും അതിൽ നിന്ന് ഒഴിഞ്ഞു മാറിയിരുന്നില്ല. അതുപോലെ, തനിക്ക് നൽകിയ ഭക്ഷണത്തെക്കുറിച്ച് വാഗ്ദത്ത മസീഹ്(അ) ഒരിക്കലും പരാതി പറഞ്ഞിരുന്നില്ല. മറിച്ച് എന്താണ് ലഭിച്ചത് അത് അദ്ദേഹം ഭക്ഷിച്ചിരുന്നു.

സംവാദങ്ങളിൽ പോലും, തന്റെ കടുത്ത ശത്രുക്കളോട് പോലും, വാഗ്ദത്ത മസീഹ്(അ) ഏറ്റവും ഉയർന്ന തലത്തിലുള്ള വിനയവും ശാന്തതയും പ്രകടിപ്പിച്ചു. അഹങ്കാരം തന്നെ കീഴ്പ്പെടുത്താൻ ഒരു തരത്തിലും അദ്ദേഹം അനുവദിച്ചില്ല. അതുപോലെ, ദൈവം തനിക്ക് നൽകിയ സ്ഥാനത്തിന്റെയും പദവിയുടെയും കാര്യത്തിൽ വാഗ്ദത്ത മസീഹ്(അ) എപ്പോഴും പരമാവധി വിനയം കാണിച്ചു. തനിക്ക് ലഭിച്ചതെന്തും തന്റെ കഴിവുകൾ കൊണ്ടാണെന്ന് ചിന്തിക്കാൻ അദ്ദേഹം ഒരിക്കലും അനുവദിച്ചിരുന്നില്ല. വാഗ്ദത്ത മസീഹ്(അ) എപ്പോഴും സ്വയം വിനയാന്വിതനാകുകയും, താൻ ഒന്നുമല്ലെന്നും ദൈവത്തിന്റെ കാരുണ്യം മാത്രമാണ് തന്നെ ഉയർത്തിയതെന്നും പറയുകയുണ്ടായി. ചുരുക്കത്തിൽ, ഓരോ വിജയവും ഓരോ പദവിയും അദ്ദേഹം ദൈവത്തിന് മാത്രം സമർപ്പിക്കുകയും അവനോട് എപ്പോഴും വലിയ നന്ദി പ്രകടിപ്പിക്കുകയും ചെയ്യുമായിരുന്നു.

ഈസാ(അ) നബിയുടെ രണ്ടാം വരവാണ് താനെന്ന് വാഗ്ദത്ത മസീഹ്(അ) അവകാശവാദമുന്നയിച്ചപ്പോൾ കടുത്ത എതിരാളിയായ മൗലവി മുഹമ്മദ് ഹുസൈൻ ബട്ടാലവി നീചമായ ഭാഷ നിറഞ്ഞ കത്തുകൾ വാഗ്ദത്ത മസീഹ്(അ)ന് അയക്കാൻ തുടങ്ങി. എന്നാൽ ഇതിന് മുന്നിൽ വാഗ്ദത്ത മസീഹ്(അ) സമാനതകളില്ലാത്ത സഹിഷ്ണുതയും വിനയവുമാണ് പ്രകടിപ്പിച്ചത്. ബട്ടാലവിക്ക് മറുപടിയായി വാഗ്ദത്ത മസീഹ്(അ) എഴുതിയ കത്തുകളിൽപ്പോലും ബട്ടാലവിയിൽ നിന്ന് തനിക്ക് ലഭിച്ച അനാദരവിന് മറുപടിയായി വാഗ്ദത്ത മസീഹ്(അ) അങ്ങേയറ്റം മര്യാദയും ബഹുമാനവും കാത്തുസൂക്ഷിച്ചിരുന്നു. ബഹുമാനം നിലനിർത്തിക്കൊണ്ട് അദ്ദേഹം തന്റെ കാഴ്ചപ്പാട് അറിയിക്കുകയും തന്റെ എതിരാളികളുടെ അധമമായ വഴിയിലേക്ക് അദ്ദേഹം ഒരിക്കലും വീണുപോകാതിരിക്കാൻ ശ്രദ്ധിക്കുകയും ചെയ്തു. 

വാഗ്ദത്ത മസീഹ്(അ)ന്റെ ഓരോ വാക്കും വിനയം നിറഞ്ഞതായിരുന്നു. അതെല്ലാം അല്ലാഹുവിനെ പ്രീതിപ്പെടുത്താൻ വേണ്ടി മാത്രമായിരുന്നു. യഥാർത്ഥ വിജയം വിനയത്തിലാണെന്ന് വിശദീകരിച്ചുകൊണ്ട് വാഗ്ദത്ത മസീഹ്(അ) തന്റെ ജമാഅത്തിനോടും ഇത് തന്നെ കൽപ്പിച്ചു. അല്ലാഹു ഏവർക്കും വിനയത്തിന്റെ മാർഗ്ഗങ്ങൾ സ്വീകരിക്കാൻ തൗഫീഖ് നൽകട്ടെ.