താന്‍ ഇസ്തിഗ്ഫാർ (ദൈവത്തിൽ നിന്ന് പാപമോചനം തേടല്‍) ചെയ്യാറുണ്ടെന്നും, ഇക്കൂട്ടരും ഇസ്തിഗ്ഫാര്‍ ചെയ്യുകയും സ്വയം പരിഷ്കരിക്കുകയും ചെയ്യണമെന്നും ഖലീഫാ തിരുമനസ്സ് പറഞ്ഞു. പേരിന് മാത്രം ഒരു സ്ഥാനം കൈകാര്യം ചെയ്യുന്നതിനു പകരം തങ്ങളുടെ ഉത്തരവാദിത്വങ്ങൾ മനസ്സിലാക്കുകയും അവരുടെ ജോലികൾ ചെയ്യുകയും ചെയ്യുന്ന അത്തരം യഥാർഥ സഹായികളെ അഹ്‌മദിയ്യാ ഖിലാഫത്തിന് എപ്പോഴും ലഭിക്കട്ടെ എന്ന് ഖലീഫാ തിരുമനസ്സ് ദുആ ചെയ്യുകയുണ്ടായി. ഇതും വളരെയധികം ശ്രദ്ധിക്കേണ്ട കാര്യമാണ്. കാരണം മറ്റുള്ളവരുടെ മേൽനോട്ടം വഹിക്കാനുള്ള ഉത്തരവാദിത്വം ഏൽപ്പിക്കപ്പെട്ട ഒരാൾ, മറ്റുള്ളവരുടെ ആവശ്യങ്ങൾ നിറവേറ്റുന്നത് വരെ അല്ലാഹു ആ വ്യക്തിയുടെ ആവശ്യങ്ങൾ നിറവേറ്റുകയില്ലെന്ന് തിരുനബി(സ) പറഞ്ഞിട്ടുണ്ട്. ഇത് കാലത്തിന്‍റെ ഖലീഫയുടെ ഉത്തരവാദിത്വം മാത്രമല്ല, മറിച്ച് ഓരോരോ പ്രദേശങ്ങളിലെ ഖലീഫയുടെ പ്രതിനിധികളായ ഭാരവാഹികളുടെ ഉത്തരവാദിത്വം കൂടിയാണ്. വെറും യോഗങ്ങളിൽ സന്നിഹിതരായാൽ തങ്ങളുടെ കർത്തവ്യം പൂർത്തിയായെന്ന് കരുതരുത്. മറ്റുള്ളവരുടെ ഉന്നമനത്തിനായി ആസൂത്രണം ചെയ്യുക മാത്രമല്ല, അത് പ്രായോഗികമായി നടപ്പിലാക്കുകയും വേണം. ലൗകിക ആവശ്യങ്ങൾ നിറവേറ്റുന്നതിനായി, ഉമൂറെ ആമ്മ (പൊതുകാര്യങ്ങൾ), സന്‍അത്തൊ തിജാറത്ത് (വ്യാപാരം, വ്യവസായം) എന്നീ വകുപ്പുകൾ ഉണ്ട്. ശാഖാസംഘടനകളും ഇതിനായി യഥാവിധി പ്രവർത്തിക്കണം.

ലോകമെമ്പാടും വെല്ലുവിളികൾ നേരിടുന്ന ഒരു വകുപ്പാണ് രിശ്ത നാത്ത (വൈവാഹികകാര്യങ്ങൾ) എന്ന് ഖലീഫാ തിരുമനസ്സ് പറഞ്ഞു. അതിനായി വളരെയധികം ആസൂത്രണം ആവശ്യമാണെന്നും, കേന്ദ്ര ജമാഅത്തുകളും ശാഖാസംഘടനകളും ഒരുമിച്ച് പ്രവർത്തിക്കേണ്ടതുണ്ടെന്നും അദ്ദേഹം പറയുകയുണ്ടായി. തർബിയ്യത്ത് വകുപ്പും ഇക്കാര്യത്തിൽ ഒരു പ്രധാന പങ്ക് വഹിക്കേണ്ടതാണ്. നമ്മുടെ യുവാക്കൾ ശരിയായ രീതിയിൽ പരിശീലിപ്പിക്കപ്പെട്ടാൽ, നബി തിരുമേനി(സ)യുടെ കല്പന അനുസരിച്ച് സമ്പത്ത്, കുടുംബ മഹിമ അല്ലെങ്കിൽ സൗന്ദര്യം എന്നിവയ്ക്ക് മുൻഗണന നല്കാതെ, അവര്‍ ദീനിന് മുൻഗണന നല്കുന്നതാണ്. ദീന്‍ മുൻഗണനയായി മാറുന്ന പക്ഷം, ആൺകുട്ടികളും പെൺകുട്ടികളും തങ്ങളുടെ വിശ്വാസത്തിന്‍റെ നിലവാരം മെച്ചപ്പെടുത്തുന്നതിലും ദൈവവുമായുള്ള ബന്ധം വർധിപ്പിക്കുന്നതിലും ശ്രദ്ധ കേന്ദ്രീകരിക്കുന്നതായിരിക്കും. ഈ രീതിയിൽ, നമുക്ക് നമ്മുടെ ഭാവി തലമുറകളെ സംരക്ഷിക്കാൻ സാധിക്കും. അല്ലാതെ, ദുർബലമായ ശ്രമങ്ങൾ കൊണ്ട് മാത്രം നമുക്ക് ദജ്ജാലിൽ നിന്ന് സംരക്ഷണം ലഭിക്കുകയില്ല. അതിനാൽ, ഓരോ ഭാരവാഹിയും സ്വന്തം വീടുകൾ പരിഷ്കരിക്കുകയും തുടർന്ന് മറ്റു ജമാഅത്തംഗങ്ങളെ സംസ്കരിക്കാൻ ശ്രമിക്കുകയും വേണം. ലൗകിക കാര്യങ്ങളുടെ മേല്‍ നമ്മുടെ വിശ്വാസത്തിന് മുൻതൂക്കം നല്കുമെന്ന നമ്മുടെ പ്രതിജ്ഞ നാം നിറവേറ്റണം. കാരണം അപ്പോഴാണ് നമുക്ക് ദജ്ജാലിനെ നേരിടാൻ കഴിയുക. നമ്മുടെ ഭാവി തലമുറകളെ സംരക്ഷിക്കുക, നമ്മുടെ പ്രതിജ്ഞകൾ നിറവേറ്റുക, അമാനത്തുകളോട് നീതി പുലർത്തുക. എല്ലാ തലങ്ങളിലുമുള്ള ഭാരവാഹികൾ ഇക്കാര്യത്തിൽ ശ്രദ്ധ ചെലുത്തണം.

ഉമൂറെ ആമ്മയുടെ വകുപ്പ് വളരെ പ്രധാനപ്പെട്ടതാണെന്ന് ഖലീഫാ തിരുമനസ്സ് പറഞ്ഞു. എന്നാൽ, ഈ വകുപ്പിന്‍റെ പ്രാഥമിക കർത്തവ്യം അച്ചടക്കനടപടി സ്വീകരിക്കുകയോ കർശനമായ മുന്നറിയിപ്പുകൾ നല്കുകയോ ആണെന്ന ധാരണ ഉയർന്നിട്ടുണ്ട്. ഇത് അവരുടെ പ്രാഥമിക കടമയല്ല. അവർ കർശനമായ മുന്നറിയിപ്പുകൾ നല്കേണ്ടതില്ല. അച്ചടക്ക നടപടി അവസാന ആശ്രയമെന്ന നിലയിൽ മാത്രമാണ് അവലംബിക്കേണ്ടത്. തർബിയ്യത്ത് വകുപ്പ് സജീവമായാൽ ഇക്കാര്യത്തിൽ ഉമൂറെ ആമ്മയുടെ ഒരുപാട് പ്രശ്നങ്ങള്‍ക്ക് പരിഹാരമാകും. അതിനാൽ ഉമൂറെ ആമ്മ, തർബിയ്യത്ത് വകുപ്പുകൾ ഒരുമിച്ച് പ്രവർത്തിക്കേണ്ടത് വളരെ പ്രധാനമാണ്.

ജോലി കണ്ടെത്തുന്നതിനും മറ്റ് കാര്യങ്ങൾക്കുമായി അംഗങ്ങൾക്ക് മാർഗനിർദേശം നല്കുക, മറ്റുള്ളവരെ സേവിക്കുന്നതുമായി ബന്ധപ്പെട്ട ജോലികൾ നടപ്പിലാക്കുക, ആളുകൾക്കിടയിലുള്ള ചെറിയ തർക്കങ്ങൾ ഇല്ലാതാക്കുക എന്നതെല്ലാം ഉമൂറെ ആമ്മയുടെ മേലുള്ള ഉത്തരവാദിത്വങ്ങളാണ്. ഉമൂറെ ആമ്മ തർക്കങ്ങളിൽ തീരുമാനങ്ങളൊന്നും എടുക്കുന്നില്ല. മറിച്ച്, അവർ ഖളാ (നീതി,ന്യായ വകുപ്പ്) എടുക്കുന്ന തീരുമാനങ്ങൾ നടപ്പിലാക്കുകയാണ് ചെയ്യുന്നത്.

ചിലപ്പോൾ ചില ഭാരവാഹികളുടെ പ്രവർത്തനങ്ങൾ ജമാഅത്തിന്‍റെ സംവിധാനത്തെക്കുറിച്ച് സംശയം ജനിപ്പിക്കാറുണ്ടെന്ന് ഖലീഫാ തിരുമനസ്സ് പറഞ്ഞു. ചില സമയങ്ങളിൽ, ഒരു വ്യക്തി ഒരു കാര്യത്തെ കുറിച്ച് കാലത്തിന്‍റെ ഖലീഫയോട് ഒരു അഭ്യർത്ഥന സമർപ്പിക്കുന്നു. ബന്ധപ്പെട്ട വകുപ്പ് അതിനെ സംബധിച്ച് റിപ്പോർട്ട് നല്കുന്നതിന് പകരം ചിലപ്പോൾ തങ്ങളെ നേരിട്ട് സമീപിക്കാത്തത് എന്തുകൊണ്ടാണെന്ന പ്രശ്നം ഉന്നയിക്കുന്നു. ഇത് പിന്നീട് അഭ്യര്‍ഥണ നല്കിയ വ്യക്തിയിൽ സംശയം ജനിപ്പിക്കുന്നു. ചില സമയങ്ങളിൽ, ഖലീഫയ്ക്ക് എഴുതുന്ന കത്തുകള്‍ ഖലീഫയ്ക്ക് എത്തുന്നില്ലെന്ന് വരെ ആളുകളില്‍ സംശയങ്ങള്‍ ഉണ്ടാകുന്നു. പ്രസ്തുത വകുപ്പുകള്‍ തങ്ങളെ എന്തുകൊണ്ട് ആദ്യം സമീപിച്ചില്ല എന്ന് ചിന്തിക്കുകയും, പ്രസ്തുത വിഷയത്തില്‍ നടപടി എടുക്കാതിരിക്കുകയും ചെയ്യുന്നു. ഇത് ആളുകളുടെ മനസ്സിൽ ഖലീഫയെക്കുറിച്ച് പോലും സംശയം ജനിപ്പിക്കുന്നു. എന്തുകൊണ്ട് അവരുടെ കാര്യം ഖലീഫയെ അറിയിക്കുന്നില്ല എന്ന് അവർ ചിന്തിക്കുന്നു. എന്തായാലും ഈ സംശയം ഒരു യാഥാർഥ്യമല്ല. കാരണം ഖലീഫയ്ക്ക് അയക്കുന്ന ഓരോ കത്തും തുറന്ന് വായിക്കുകയും എല്ലാ അഭ്യർഥനകളും ബന്ധപ്പെട്ട രാജ്യത്തേക്ക് റിപ്പോർട്ട് ചെയ്യാൻ അയക്കുകയും ചെയ്യുന്നുണ്ട്.

തനിക്ക് അയക്കുന്ന ഓരോ കത്തും തുറന്ന് വായിക്കുകയും അതിനായി ആവശ്യമായ നടപടികൾ സ്വീകരിക്കുകയും ചെയ്യാറുണ്ടന്ന് ഖലീഫാ തിരുമനസ്സ് ജമാഅത്ത് അംഗങ്ങൾക്ക് ഉറപ്പ് നല്കി. എന്തെങ്കിലും കാലതാമസമോ പൊരുത്തക്കേടുകളോ ഉണ്ടെങ്കിൽ അത് ജമാഅത്തിലെ പ്രാദേശിക ഘടകങ്ങളുടെ ഭാഗത്ത് നിന്ന് സംഭവിക്കുന്നതാണ്. അവരുടെ പ്രവൃത്തികൾ കാരണം സംശയം ജനിക്കുന്നു. ഇത് കാരണം അവർ സ്വയം പാപികളാകുന്നു. ജമാഅത്ത് അംഗങ്ങളുടെ അവകാശങ്ങൾ നിറവേറ്റുന്നതിൽ അവർ അലംഭാവം കാണിക്കുകയാണെങ്കിൽ, അവരെ ഭരമേല്പിച്ച കടമകൾ നിറവേറ്റുന്നതിൽ അവർ പരാജയപ്പെടുക മാത്രമല്ല, അല്ലാഹുവിന്‍റെ അതൃപ്തിക്ക് കാരണമാവുകയും ചെയ്യുന്നതാണ്.

നേതാക്കൾ മറ്റുള്ളവർക്ക് വേണ്ടി വാതിലുകൾ അടക്കുകയാണെങ്കിൽ അവരുടെ നേരെ ദൈവിക കവാടങ്ങൾ അടക്കപ്പെടുന്നതാണെന്ന് നബി തിരുമേനി(സ) പ്രസ്താവിച്ചതായി ഖലീഫാ തിരുമനസ്സ് പറഞ്ഞു. അതിനാൽ, ഭാരവാഹികൾ ദൈവത്തെ ഭയപ്പെടുകയും ജനങ്ങളുടെ ആവശ്യങ്ങൾ വേഗത്തിൽ നിറവേറ്റുകയും, അല്ലെങ്കിൽ റിപ്പോർട്ട് നല്കുന്നതിൽ വേഗത്തിൽ പ്രവർത്തിക്കുകയും ചെയ്യേണ്ടതാണ്. ഏതായാലും, മറുപടി നല്കാതെ എവിടെയെങ്കിലും ഒരു കോണിൽ അപേക്ഷകൾ ഉപേക്ഷിക്കുന്നത് വലിയ കുറ്റമാണ്. അല്ലാഹുവിന്‍റെ പ്രീതി തേടാനും പുണ്യകർമങ്ങൾക്ക് വേണ്ടിയും നാം പരിശ്രമിക്കേണ്ടതാണ്.

ഈ അമാനത്തുകൾ നിറവേറ്റുന്നതിലൂടെ വാഗ്ദത്ത മസീഹ്(അ)ന്റെ ആഗമന ലക്ഷ്യമായ മനോഹരമായ ഇസ്‌ലാമിക സമൂഹം സ്ഥാപിക്കാൻ സാധിക്കുന്നതാണെന്ന് ഖലീഫാ തിരുമനസ്സ് പറഞ്ഞു. തങ്ങളെ ജമാഅത്ത് അംഗങ്ങൾ തിരഞ്ഞെടുത്തത് ഈ അമാനത്ത് നിറവേറ്റുന്നതിനുവേണ്ടിയാണെന്ന് ഭാരവാഹികൾ എപ്പോഴും ഓർമിക്കേണ്ടതാണ്. അതിനാൽ ദൈവഭയം ഹൃദയത്തിൽ പേറിക്കൊണ്ട്, അവന്‍റെ പ്രീതി നേടുന്നതിനും കാലത്തിന്‍റെ ഖലീഫയുടെ യഥാർഥ സഹായികൾ ആകുന്നതിനും അവർ ആ കർത്തവ്യം നിർവഹിക്കണം. മാനസികാവസ്ഥ ഇതായിരിക്കുമ്പോൾ, അല്ലാഹു നമ്മുടെ മേല്‍ അവന്‍റെ അനുഗ്രഹങ്ങൾ വർഷിക്കുകയും നമ്മെ സഹായിക്കുകയും ചെയ്യുന്നതാണ്. ഇതല്ലെങ്കിൽ, നാം നന്മയിൽ നിന്ന് വ്യതിചലിക്കുന്നതാണ്. കൂടാതെ, നാം അല്ലാഹുവിനോട് സത്യസന്ധതയില്ലാത്തവരായിരിക്കുകയും, ജനങ്ങൾ നമ്മില്‍ അർപ്പിക്കുന്ന വിശ്വാസം തകർക്കുകയും, അതുവഴി മറ്റുള്ളവരുടെ വിശ്വാസത്തിന്‍റെ പരീക്ഷണത്തിനുള്ള മാർഗമായി മാറുകയും ചെയ്യുന്നതാണ്.

എല്ലാ അഹ്‌മദികളും ഭയഭക്തിയുടെ മാർഗത്തിൽ ചലിക്കുന്നതാണെന്ന പ്രതിഞ്ജ ചെയ്തവരാണ്. എന്നിരുന്നാലും ഇത് ഭാരവാഹികൾക്ക് കൂടുതൽ ബാധകമാണ്. അവർ തങ്ങളുടെ വാഗ്ദാനങ്ങളും അമാനത്തുകളും, അവരെ ഭരമേല്പിച്ച കടമകളും ആത്മാർഥമായി അവരുടെ എല്ലാ കഴിവുകളും ഉപയോഗിച്ച് നിറവേറ്റണം. അതിന് അല്ലാഹു നമ്മെ പ്രാപ്തരാക്കട്ടെ എന്ന് ഖലീഫാ തിരുമനസ്സ് പ്രാർഥിച്ചു.