നബിതിരുമേനി(സ)യുടെ ജീവിതകാലത്ത് അയക്കപ്പെട്ട അവസാനത്തെ സൈനിക സംഘം ഉസാമ(റ)യുടെ സൈന്യമായിരുന്നു. ഈ സൈനിക നീക്കത്തിന്റെ പശ്ചാത്തലം ഇപ്രകാരമാണ് രേഖപ്പെടുത്തിയിരിക്കുന്നത്. വിടവാങ്ങൽ ഹജ്ജിൽനിന്ന് (ഹജ്ജത്തുൽ വിദ) നബിതിരുമേനി(സ) മടങ്ങിയെത്തിയപ്പോൾ, ക്രിസ്ത്യാനികൾ തങ്ങളുടെ ശക്തിയിൽ അഹങ്കരിച്ചിരുന്നതിനാൽ ബൈസന്റൈനുകളിൽ നിന്ന് ഇപ്പോഴും ഭീഷണി നിലനിന്നിരുന്നു. മുഅ്ത യുദ്ധത്തിൽ സംഭവിച്ച മരണങ്ങൾക്കുള്ള പ്രതികാരവും ബാക്കിയുണ്ടായിരുന്നു. അതിനാൽ, സിറിയ ആക്രമിക്കാൻ ഹദ്റത്ത് ഉസാമ(റ)യുടെ നേതൃത്വത്തിൽ നബിതിരുമേനി(സ) ഒരു സൈന്യത്തെ നിയോഗിച്ചു. നബിതിരുമേനി(സ)യുടെ വിയോഗത്തിന് രണ്ട് ദിവസം മുമ്പാണ് സൈന്യത്തിന്റെ തയ്യാറെടുപ്പുകൾ പൂർത്തിയായത്. യുദ്ധം ആഗ്രഹിക്കാതെ, എന്നാൽ തങ്ങൾക്കെതിരെ ആക്രമണം നടന്നാൽ മാത്രം ആയുധമെടുക്കണമെന്നും, സംയുക്തമായ വിജയം ഉറപ്പാക്കണമെന്നുമുള്ള നിർദ്ദേശങ്ങളോടെ നബിതിരുമേനി(സ) സൈന്യത്തെ യാത്രയാക്കി. ഹദ്റത്ത് ഉസാമ(റ)യ്ക്ക് ഒരു പതാകയും നൽകി.

മുതിർന്ന സ്വഹാബികൾ എല്ലാവരും ഈ സൈന്യത്തിന്റെ ഭാഗമായിരുന്നു. പ്രമുഖരായ സ്വഹാബികൾക്ക് മുകളിൽ ഇത്രയും ചെറുപ്പക്കാരനായ ഒരാളെ എങ്ങനെ നേതാവാക്കും എന്നതിനെക്കുറിച്ച് ചിലർ ചോദ്യങ്ങൾ ഉന്നയിക്കാൻ തുടങ്ങി. ഈ സംസാരം നബിതിരുമേനി(സ)ക്ക് അതൃപ്തി ഉണ്ടാക്കുകയും, ഹദ്റത്ത് ഉസാമ(റ)യുടെ ഗുണവും കഴിവും കണക്കിലെടുത്ത് അദ്ദേഹത്തെ സൈന്യത്തിന്റെ നേതാവാക്കാനുള്ള തീരുമാനം വീണ്ടും ഉറപ്പിക്കുകയും ചെയ്തു. ഈ സമയത്തായിരുന്നു നബിതിരുമേനി(സ)യുടെ അസുഖം മൂർച്ഛിച്ചത്. എങ്കിലും, ഉസാമ(റ)യുടെ സൈന്യം മുന്നോട്ട് പോകണമെന്ന് നബിതിരുമേനി(സ) നിർബന്ധിച്ചു. രോഗം വർധിച്ചപ്പോൾ ഉസാമ(റ) പരിശുദ്ധ പ്രവാചകനെ കാണാൻ ചെന്നു. സൈന്യവുമായി മുന്നോട്ട് നീങ്ങണമെന്ന് നബിതിരുമേനി(സ) ഹദ്റത്ത് ഉസാമ(റ) നോട് ഊന്നിപ്പറഞ്ഞു. എന്നാൽ, അദ്ദേഹം പുറപ്പെട്ടു തുടങ്ങിയപ്പോൾ തന്നെ, നബിതിരുമേനി(സ) അന്ത്യ നിമിഷങ്ങളോട് അടുക്കുന്നു എന്ന വിവരം ലഭിക്കുകയും, അങ്ങനെ ഹദ്റത്ത് ഉസാമ(റ)യും സൈന്യവും മടങ്ങുകയും ചെയ്തു.

ഹദ്റത്ത് അബൂബക്കർ(റ) ഒന്നാം ഖലീഫയായപ്പോൾ, ഹദ്റത്ത് ഉസാമ(റ)യുടെ സൈന്യം, ദൗത്യവുമായി മുന്നോട്ട് പോകണമെന്ന് കർശനമായി നിർദ്ദേശിച്ചു. മദീനയിൽ കുഴപ്പങ്ങൾ ഉടലെടുക്കുന്നതിനാൽ സൈന്യത്തെ പുറത്തേക്ക് അയക്കരുതെന്നും, മദീനയുടെ സംരക്ഷണത്തിനായി സൈന്യത്തെ അവിടെത്തന്നെ നിർത്തണമെന്നും ചിലർ വാദിച്ചു. എന്നാൽ, നബിതിരുമേനി(സ) സ്വയം നിയോഗിച്ച സൈന്യത്തെ തടയുക എന്നത്, ഖലീഫയായിട്ടുള്ള തന്റെ ആദ്യ നിർദ്ദേശമാകാൻ പാടില്ലെന്ന് ഹദ്റത്ത് അബൂബക്കർ(റ) പറഞ്ഞു. സൈന്യത്തെ അയക്കുമ്പോൾ, നബിതിരുമേനി(സ) നൽകിയ എല്ലാ നിർദ്ദേശങ്ങളും നിറവേറ്റാൻ ഹദ്റത്ത് അബൂബക്കർ(റ) ഹദ്റത്ത് ഉസാമ(റ)യെ ഓർമ്മിപ്പിച്ചു.

ഖലീഫ തിരുമനസ്സ് പറഞ്ഞു, നബിതിരുമേനി(സ)യുടെ ജീവിതത്തിലെ യുദ്ധങ്ങളെയും സൈനിക നീക്കങ്ങളെയും കുറിച്ചുള്ള ഖുതുബ പരമ്പര ഇതോടെ പൂർത്തിയാവുകയാണ്. പരിശുദ്ധ പ്രവാചകൻ്റെ ജീവിതത്തിലെ മറ്റ് ചില വശങ്ങളുമുണ്ട്, അത് ഭാവിയിൽ പറയുന്നതാണ്.