തഹജ്ജുദ് നമസ്കാരത്തിന് നബി തിരുമേനി(സ) വളരെയധികം പ്രാധാന്യം നൽകിയിട്ടുണ്ട്. ഈ നമസ്കാരം ഐച്ഛികമാണെങ്കിലും ഏതൊക്കെ അനുചരന്മാരാണ് തഹജ്ജുദ് നമസ്കരിക്കുന്നത് എന്ന് നബിതിരുമേനി(സ) നിരീക്ഷിക്കാറുണ്ടായിരുന്നു. ഇന്ന് പള്ളിയിൽ വന്ന് നമസ്കരിക്കാൻ ഉപദേശിക്കുകയോ ഓർമ്മപ്പെടുത്തുകയോ ചെയ്താൽ അത് വ്യക്തിപരമായ കാര്യമാണെന്ന് പറഞ്ഞ് ചിലർ നീരസപ്പെടാറുണ്ട്. എന്നാൽ തഹജ്ജുദ് നമസ്കാരത്തിന്റെ കാര്യത്തിൽ പോലും നബിതിരുമേനി(സ) ആരെല്ലാം നമസ്കരിക്കുന്നു എന്ന് ശ്രദ്ധിച്ചിരുന്നുവെന്ന് കാണാം.

ഒരിക്കൽ ഒരാളെക്കുറിച്ച് പുകഴ്ത്തി സംസാരിക്കുന്നത് നബിതിരുമേനി(സ) കേട്ടപ്പോൾ തീർച്ചയായും അദ്ദേഹം നല്ലൊരു മനുഷ്യൻ തന്നെയാണ് എന്ന് ആ മഹാത്മാവ് സമ്മതിച്ചു. എന്നാൽ തഹജ്ജുദ് കൂടി നമസ്കരിച്ചിരുന്നുവെങ്കിൽ എന്ന നിബന്ധന കൂടി അദ്ദേഹം കൂട്ടിച്ചേർത്തു. തഹജ്ജുദ് നമസ്കാരത്തിൽ ഇടയ്ക്കിടെ അലസത കാണിച്ചിരുന്ന ഒരു യുവാവായിരുന്നു അദ്ദേഹം. യുക്തിപൂർവ്വമായ രീതിയിലൂടെ നബിതിരുമേനി(സ) അദ്ദേഹത്തെ തഹജ്ജുദ് നമസ്കാരത്തിലേക്ക് ശ്രദ്ധ ക്ഷണിച്ചു.

ഭർത്താവ് തഹജ്ജുദ് നമസ്കാരത്തിനായി ഉണരുമ്പോൾ ഭാര്യയെ വിളിച്ചുണർത്തുകയും, അവൾ എഴുന്നേറ്റില്ലെങ്കിൽ അവളുടെ മേൽ വെള്ളം തളിക്കുകയും ചെയ്യുന്ന ദമ്പതികളുടെ മേൽ അല്ലാഹു അനുഗ്രഹം ചൊരിയുമെന്ന് നബിതിരുമേനി(സ) അരുൾ ചെയ്തിട്ടുണ്ട്. അതുപോലെ ഭാര്യ ഉണർന്ന് ഭർത്താവിനെ വിളിക്കുകയും അയാൾ എഴുന്നേറ്റില്ലെങ്കിൽ അയാളുടെ മേൽ വെള്ളം തളിക്കുകയും ചെയ്യുന്നുവെങ്കിൽ അല്ലാഹു അവരെയും അനുഗ്രഹിക്കും. ഭാര്യാഭർത്താക്കന്മാർ തമ്മിലുള്ള ആദരവിന് ഇസ്ലാം പ്രാധാന്യം നൽകുമ്പോൾ തന്നെ, തഹജ്ജുദിനായി വിളിച്ചുണർത്താൻ വെള്ളം തളിക്കുന്നത് ഉചിതമാണെന്നും ഇസ്ലാം പഠിപ്പിക്കുന്നു. തഹജ്ജുദ് നമസ്കാരത്തിന് നബിതിരുമേനി(സ) എത്രത്തോളം പ്രാധാന്യം നൽകിയിരുന്നു എന്ന് നോക്കുക.

തഹജ്ജുദ് നമസ്കാരം ഒട്ടും അനുഷ്ഠിക്കാതിരിക്കുന്നതിനേക്കാൾ, ചുരുങ്ങിയത് രണ്ട് റക്അത്തെങ്കിലും നിർവഹിക്കുന്നതാണ് ഉത്തമമെന്ന് ഉപദേശിച്ചുകൊണ്ട് നബിതിരുമേനി(സ) ആളുകളെ പ്രോത്സാഹിപ്പിക്കുകയും ചെയ്തു. അതുപോലെ രാത്രിയുടെ അവസാന യാമങ്ങളിൽ അല്ലാഹു ഏറ്റവും അടുത്ത് വരുന്നു എന്നും അതിനാൽ അത് പ്രാർത്ഥനകൾ സ്വീകരിക്കപ്പെടുന്ന സമയമാണെന്നും നബിതിരുമേനി(സ) പറഞ്ഞു.

പ്രാർത്ഥന എന്നത് ദൈവവുമായുള്ള കൂടിക്കാഴ്ചയാണ്. പ്രാർത്ഥനയിലൂടെയും നബിതിരുമേനി(സ)ൻ്റെ അധ്യാപനത്തിലൂടെയും ഒരു ദാസൻ ദൈവം ആഗ്രഹിക്കുന്ന ഗുണങ്ങൾ ആർജ്ജിക്കുന്നു. നബിതിരുമേനി(സ) ജമാഅത്തായി നമസ്കരിക്കുന്നതിന് വലിയ പ്രാധാന്യം നൽകിയിരുന്നു.

ഒരിക്കൽ ഒരാൾ തന്റെ വീട് പള്ളിയിൽ നിന്നും ദൂരെയാണെന്നും മഴയുള്ളപ്പോൾ വീട്ടിൽ വെച്ച് നമസ്കരിക്കാൻ അനുവാദം നൽകണമെന്നും നബിതിരുമേനി(സ)യോട് അപേക്ഷിച്ചു. ആദ്യം നബിതിരുമേനി(സ) അദ്ദേഹത്തിന് അനുവാദം നൽകി. എന്നാൽ പിന്നീട് അദ്ദേഹത്തെ തിരിച്ചുവിളിച്ചു കൊണ്ട് ബാങ്ക് വിളി വീട്ടിലിരുന്ന് കേൾക്കാൻ സാധിക്കുന്നുണ്ടോ എന്ന് ചോദിച്ചു. ഉണ്ടെന്ന് അദ്ദേഹം മറുപടി നൽകിയപ്പോൾ എങ്കിൽ വഴിയിൽ പ്രയാസങ്ങളുണ്ടെങ്കിലും പള്ളിയിൽ വന്ന് ജമാഅത്തായി നമസ്കരിക്കണമെന്ന് നബിതിരുമേനി(സ) ഉപദേശിച്ചു.

നബിതിരുമേനി(സ) നമുക്കായി വലിയ സന്തോഷവാർത്തകൾ നൽകിയിട്ടുണ്ട്. ആ മഹാത്മാവിന്റെ ആരാധനാ മാതൃക പിന്തുടർന്നാൽ മാത്രമേ നമുക്ക് അവ ലഭ്യമാവുകയുള്ളൂ. ഇതിനായി വലിയ പരിശ്രമവും ത്യാഗവും അനിവാര്യമാണെന്ന് നാം ഓർക്കണം. ചിലരോട് ചോദിക്കുമ്പോൾ അഞ്ച്നേര നമസ്കാരം നിർവഹിക്കാൻ ശ്രമിക്കുന്നുണ്ടെന്ന് പറയാറുണ്ട്. ഈ മനോഭാവം വെറും മനസ്സിന്റെ വഞ്ചനയാണ്. യഥാർത്ഥ പരിശ്രമം ദൈവഭയത്തിൽ നിന്നാണ് ഉണ്ടാകുന്നത്. അതിനാൽ നമ്മുടെ പരിശ്രമങ്ങൾ യഥാർത്ഥമാണോ എന്ന് നാം പരിശോധിക്കണം.

യഥാർത്ഥ പ്രാർത്ഥന ലോകത്തിലെ സകല ഭയങ്ങളെയും ഇല്ലാതാക്കുമെന്ന് വാഗ്ദത്ത മസീഹ്(അ) പറഞ്ഞിട്ടുണ്ട്. ഉള്ളിൽ ഭയം ഉള്ള ഒരു ഉമ്മയാണെങ്കിൽ പോലും തന്റെ കുഞ്ഞിന് സുഖമില്ലാതിരിക്കുമ്പോൾ അതിന് ആവശ്യമുള്ളത് വാങ്ങാൻ ഇരുട്ടുള്ള രാത്രിയിലും അപകടകരമായ സ്ഥലങ്ങളിലും പോകാൻ അവൾ തയ്യാറാകുന്നത് പോലെയാണ് ഇത്. ഇതേ രീതിയിൽ ഒരാളെ കീഴ്പ്പെടുത്തിയിരിക്കുന്ന എല്ലാ ഭയങ്ങളെയും യഥാർത്ഥ പ്രാർത്ഥന ദൂരീകരിക്കുന്നു.

അല്ലാഹുവിനെ യഥാർത്ഥ രീതിയിൽ ആരാധിക്കാനും നബിതിരുമേനി(സ)യുടെ മാതൃക പിന്തുടരാനും അല്ലാഹു നമ്മെ എല്ലാവരെയും പ്രാപ്തരാക്കട്ടെ.