അല്ലാഹുവിൻറെ കൃപയാൽ അഹ്‌മദികൾ ഇത് മനസ്സിലാക്കുകയും മതപരമായ കാര്യങ്ങൾക്കായി ചെലവഴിക്കുകയും ചെയ്യുന്നു. ഓരോ വർഷവും ഇതിന് എണ്ണമറ്റ ഉദാഹരണങ്ങൾ നമുക്ക് മുന്നിൽ വരുന്നു. വഖ്ഫെ ജദീദ് പദ്ധതിയിൽ സാമ്പത്തിക ത്യാഗം ചെയ്തവരുടെ ഉദാഹരണങ്ങളും അതിന്റെ ഫലമായി അവർക്ക് ലഭിച്ച അനുഗ്രഹങ്ങളും സമർപ്പിക്കുകയാണ്. അല്ലാഹുവിന്റെ മാർഗത്തിൽ ചെലവഴിച്ചാൽ അവൻ തീർച്ചയായും തങ്ങളുടെ ആവശ്യങ്ങൾ നിറവേറ്റുമെന്ന് അവർക്ക് ഉറച്ച ബോധ്യമുണ്ടായിരുന്നു.

ഇന്തോനേഷ്യയിലെ ഒരു അധ്യാപിക പാർട്ട് ടൈം ആയി ജോലി ചെയ്തിരുന്നതിനാൽ അവർക്ക് വലിയ വരുമാനം ഉണ്ടായിരുന്നില്ല. വഖ്ഫെ ജദീദ് വാഗ്ദാനത്തിൽ തുക ഇനിയും കുടിശ്ശികയുണ്ടെന്ന് അവരെ അറിയിക്കുകയുണ്ടായി. തന്റെ ആവശ്യങ്ങൾക്കായി മാറ്റി വെച്ചിരുന്ന കുറച്ച് പണം അവരുടെ പക്കൽ ഉണ്ടായിരുന്നു. ആ പണം അവർക്ക് അത്യാവശ്യമായിരുന്നിട്ടുകൂടി അല്ലാഹുവിൽ ഭരമേല്പിച്ചുകൊണ്ട് അത് അവന്റെ മാർഗ്ഗത്തിൽ നല്കാൻ തീരുമാനിച്ചു. ദൈവം തന്നെ തീർച്ചയായും അനുഗ്രഹിക്കുമെന്ന് അവർ ഉറച്ചു വിശ്വസിച്ചു. അതിന്റെ ഫലമായി, കുറച്ചു സമയത്തിന് ശേഷം തികച്ചും അപ്രതീക്ഷിതമായി താൻ ജോലി ചെയ്യുന്ന സ്കൂളിൽ നിന്ന് ബോണസ് ലഭിച്ചതായും സർക്കാർ സബ്സിഡിക്ക് അർഹയായതായും അവർക്ക് വിവരം ലഭിച്ചു. കൂടാതെ, വളരെക്കാലമായി കാത്തിരുന്ന ടീച്ചർ രജിസ്ട്രേഷൻ നമ്പറും ഈ സാമ്പത്തിക ത്യാഗത്തിന് തൊട്ടുപിന്നാലെ അവർക്ക് ലഭിച്ചു. തന്റെ സാമ്പത്തിക ത്യാഗത്തിൻറെ ഫലമായുണ്ടായ അനുഗ്രഹങ്ങളാണ് ഇവയെന്ന് അവർക്ക് ബോധ്യമായി.

കെനിയയിലെ ഒരു സ്ത്രീ, തൻറെ വരുമാനം പരിമിതമായിരുന്നിട്ടും സാമ്പത്തിക ത്യാഗങ്ങളിൽ എപ്പോഴും കൃത്യനിഷ്ഠ പുലർത്തിയിരുന്നു. വഖ്ഫെ ജദീദ് വാഗ്ദാനം പൂർത്തിയാക്കാൻ തൻറെ പക്കലുള്ള തുക മുഴുവൻ അവർ നല്കി. എങ്കിലും ദൈവം അവരെ വെറുംകൈയോടെ വിട്ടില്ല. കുറച്ചു ദിവസങ്ങൾക്കുശേഷം തൻറെ മകളിൽ നിന്ന് വലിയൊരു തുക അവർക്ക് ലഭിക്കുകയും വാഗ്ദാനങ്ങൾ പൂർത്തിയാക്കാനും സ്വന്തം ആവശ്യങ്ങൾക്കും ആ പണം ഉപയോഗിച്ചുകൊള്ളാൻ മകൾ അവരോട് പറയുകയും ചെയ്തു. അതുപോലെതന്നെ അവരുടെ മരുമകൻ അവർക്ക് രണ്ട് പശുക്കളെയും നൽകി. ആദ്യം അവർ 400 ഷില്ലിംഗ് മാത്രമാണ് നല്കിയിരുന്നത്; എന്നാൽ അതിന് പകരമായി അവർ ഒട്ടും പ്രതീക്ഷിക്കാത്ത വിധത്തിൽ അതിനേക്കാൾ എത്രയോ മടങ്ങ് അനുഗ്രഹങ്ങൾ ദൈവത്തിൽ നിന്ന് അവർക്ക് ലഭിച്ചു തുടങ്ങി.

ഓസ്‌ട്രേലിയയിൽ നിന്നുള്ള ഒരാൾ തൻറെ വഖ്ഫെ ജദീദ് വാഗ്ദാനം പൂർത്തിയാക്കിയ ശേഷം അത് ആറിരട്ടിയായി വർദ്ധിപ്പിച്ചു. ആയിരം ഡോളർ നല്കാനിരുന്ന അദ്ദേഹം അത് ഏഴായിരം ഡോളറാക്കി ഉയർത്തി. അടുത്ത ദിവസം തന്നെ ഇൻഷുറൻസ് കമ്പനിയിൽ നിന്ന് അദ്ദേഹത്തിന് ഒരു സന്ദേശം ലഭിച്ചു. താനറിയാത്ത ഒരു തുക തൻറെ കുടുംബത്തിൻറെ പേരിൽ ലഭിക്കാനുണ്ടെന്നായിരുന്നു അത്. അതിലൂടെ ഇൻഷുറൻസ് കമ്പനിയിൽ നിന്ന് പന്ത്രണ്ടായിരം ഡോളർ അദ്ദേഹത്തിന് ലഭിച്ചു. വെറും രണ്ട് ദിവസത്തിനുള്ളിൽ താൻ വർദ്ധിപ്പിച്ച സാമ്പത്തിക ത്യാഗത്തിന് ഇരട്ടിയായി ദൈവം തിരിച്ചു നല്കിയെന്ന് അദ്ദേഹം സാക്ഷ്യപ്പെടുത്തി.

ഇന്ത്യയിൽ നിന്നുള്ള ഒരാൾക്ക് വഖ്ഫെ ജദീദ് വാഗ്ദാനത്തിൽ ഒരു തുക കുടിശ്ശികയുണ്ടായിരുന്നു. മറ്റ് പല പ്രധാനപ്പെട്ട ആവശ്യങ്ങളും അദ്ദേഹത്തിനുണ്ടായിരുന്നുവെങ്കിലും വഖ്ഫെ ജദീദ് വാഗ്ദാനം ആദ്യം പൂർത്തിയാക്കാൻ അദ്ദേഹം തീരുമാനിച്ചു. മറ്റ് ആവശ്യങ്ങൾ പൂർത്തിയാക്കേണ്ടതിനാൽ പകുതി തുക ഇപ്പോൾ നൽകിയാൽ മതിയെന്ന് നിർദേശിച്ചപ്പോൾ, ദൈവത്തിനാണ് പ്രഥമ പരിഗണനയെന്നും തൻറെ ആവശ്യങ്ങൾ അവൻ നിറവേറ്റുമെന്നും അദ്ദേഹം മറുപടി നല്കി. പിന്നീട് വളരെക്കാലമായി തടസ്സപ്പെട്ടു കിടന്നിരുന്ന ഒരു തുക തനിക്ക് ലഭിച്ചതായി അദ്ദേഹം പറഞ്ഞു. ഈ സാമ്പത്തിക ത്യാഗത്തിന് ശേഷം അത്ര പെട്ടെന്ന് ലഭിക്കുമെന്ന് പ്രതീക്ഷിക്കാതിരുന്ന ആ തുക അദ്ദേഹത്തിൻറെ കൈകളിൽ എത്തിച്ചേർന്നു.

കിർഗിസ്ഥാനിൽ നിന്നുള്ള ഒരു സ്ത്രീ തൻറെ ശമ്പളം വർദ്ധിപ്പിക്കാൻ തൊഴിലുടമയോട് ആവശ്യപ്പെട്ടപ്പോൾ അത് ബോണസ് എന്ന രീതിയിൽ മാത്രമേ നല്കാനാവൂ എന്നും എന്നാൽ യാതൊരു ഉറപ്പും ഇല്ലെന്നും അദ്ദേഹം മറുപടി നല്കി. പിന്നീട് അവർക്ക് അത് ലഭിച്ചപ്പോൾ, പല ആവശ്യങ്ങളും മുന്നിലുണ്ടായിരുന്നിട്ടും ആ തുക ഉടനെ അവർ വഖ്ഫെ ജദീദിലേക്ക് നല്കി. അതേ മാസത്തിൽ തന്നെ അവരുടെ ശമ്പളം നാൽപ്പത് ശതമാനം വർദ്ധിപ്പിച്ചതായും വലിയൊരു ബോണസ് ലഭിച്ചതായും അവർക്ക് വിവരം ലഭിച്ചു. ഇത് അവരുടെ എല്ലാ ആവശ്യങ്ങളും നിറവേറ്റാൻ പര്യാപ്തമായിരുന്നു. അല്ലാഹുവിൻറെ മാർഗത്തിൽ ചെലവഴിച്ചതുകൊണ്ടാണ് ഈ അപ്രതീക്ഷിത അനുഗ്രഹം ലഭിച്ചതെന്ന് അവർക്ക് ബോധ്യമായി. അതുപോലെതന്നെ, അതുവരെ വലിയ ലാഭമൊന്നുമില്ലാതിരുന്ന മറ്റൊരു ബിസിനസ്സും അവർക്ക് ഉണ്ടായിരുന്നു. എന്നാൽ താൻ ഇഷ്ടപ്പെട്ടതും അത്യാവശ്യവുമായ പണം അല്ലാഹുവിൻറെ മാർഗത്തിൽ നല്കിയതിനാൽ അവരുടെ ബിസിനസ്സിൽ നിന്നുള്ള വരുമാനം ഇരട്ടിയായി വർദ്ധിച്ചു.

(ഖലീഫ തിരുമനസ്സ് പങ്കുവച്ച നിരവധി സംഭവങ്ങളിൽ ചിലത് മാത്രമാണിത്)