തശഹ്ഹുദും തഅവ്വുദും സൂറ ഫാത്തിഹയും പാരായണം ചെയ്ത ശേഷം ഖലീഫാ തിരുമനസ്സ് ഹദ്‌റത്ത് മിര്‍സാ മസ്റൂര്‍ അഹ്‌മദ്(അയ്യദഹുല്ലാഹ്) പറഞ്ഞു.

ഫെബ്രുവരി 20ന് അഹമദിയ്യാ മുസ്‌ലിം ജമാഅത്ത് വാഗ്ദത്ത പരിഷ്‌കർത്താവായ ഹദ്റത്ത് മിർസാ ബശീറുദ്ദീൻ മഹ്‌മൂദ് അഹ്‌മദ്(റ)നെ കുറിച്ചുള്ള പ്രവചനത്തെ സ്മരിച്ചുകൊണ്ട് മുസ്‌ലിഹ് മൗഊദ് ദിനം ആചരിച്ചു വരുന്നു.

വാഗ്ദത്ത മസീഹ്(അ)ന്‍റെ ഈ പ്രവചനത്തിൽ ഒരു പുത്രന്‍റെ ജനനത്തെക്കുറിച്ചും സ്വഭാവ സവിശേഷതകളെക്കുറിച്ചും പരാമർശിക്കുന്നുണ്ട്. ഫെബ്രുവരി 20-നാണ് ഈ പ്രവചനം പ്രസിദ്ധീകരിച്ചത്. പ്രവചനത്തിന്‍റെ ഒരു ഭാഗം ഇതായിരുന്നു: “അവൻ അത്യന്തം ബുദ്ധിമാനും ഗ്രഹണശേഷി ഉള്ളവനുമായിരിക്കും”, “ലൗകികവും ആത്മീയവുമായ ജ്ഞാനങ്ങളാൽ സമൃദ്ധനായിരിക്കും”.

ഈ വാഗ്ദാനമനുസരിച്ച് സർവ്വശക്തനായ അല്ലാഹു വാഗ്ദത്ത മസീഹ്(അ)ന് ഈ സവിശേഷതകളുള്ള ഒരു പുത്രനെ നൽകി. അദ്ദേഹത്തിന്‍റെ പേര് ഹദ്റത്ത് മിർസാ ബശീറുദ്ദീൻ മഹ്‌മൂദ് അഹ്‌മദ്(റ) എന്നായിരുന്നു. അദ്ദേഹം മുസ്‌ലിഹ് മൗഊദ് അഥവാ വാഗ്ദത്ത പരിഷ്കർത്താവ് എന്ന് അറിയപ്പെടുന്നു.

പ്രവചനത്തിന്‍റെ വാക്കുകൾ അനുസരിച്ച്, സർവ്വശക്തനായ അല്ലാഹു അദ്ദേഹത്തിന് ജ്ഞാനങ്ങൾ നൽകി. ഭൗതീക തലത്തിൽ അദ്ദേഹത്തിന് പ്രാഥമിക വിദ്യാഭ്യാസത്തിന് പുറമെ യാതൊന്നും ഉണ്ടായിരുന്നില്ല. സ്കൂളിൽ പോകുമായിരുന്നെങ്കിലും പരീക്ഷകൾ പാസാകാൻ തനിക്ക് സാധിച്ചിരുന്നില്ലെന്ന് അദ്ദേഹം സ്വയം പറയുന്നു. എന്നാൽ അല്ലാഹു അദ്ദേഹത്തെ കൊണ്ട് ആത്മീയവും ഭൗതികവും സംഘടനാപരവുമായ സേവനങ്ങൾ നിറവേറ്റുകയുണ്ടായി. എത്രത്തോളമെന്നാൽ ഭൗതീക തലത്തിൽ പണ്ഡിതന്മാരായവർ പോലും അദ്ദേഹത്തിന്‍റെ മുന്നിൽ കുട്ടികൾ ആണെന്ന് തോന്നിപ്പോകുമാറായി.

ഹദ്‌റത്ത് മുസ്‌ലിഹ് മൗഊദ്(റ) ഭൗതികവും ആത്മീയവുമായ വിഷയങ്ങളിൽ അസംഖ്യം പ്രഭാഷണങ്ങൾ നടത്തുകയും ഗ്രന്ഥങ്ങൾ രചിക്കുകയും ചെയ്തിട്ടുണ്ട്. അവയിൽ രാഷ്ട്രീയം, ചരിത്രം, സാമൂഹികം, ശാസ്ത്രം, സാമ്പത്തിക ശാസ്ത്രം, യുദ്ധം തുടങ്ങിയ അനേകം വിഷയങ്ങൾ അടങ്ങുന്നു. ഈ വിഷയങ്ങളിലെ അദ്ദേഹത്തിന്‍റെ പാണ്ഡിത്യം ആളുകളെ അത്ഭുതപ്പെടുത്തി. അദ്ദേഹത്തിന്‍റെ പല പ്രഭാഷണങ്ങളും അനഹ്‌മദികൾക്ക് മുന്നിലാണ് അവതരിപ്പിക്കപ്പെട്ടത്.

അദ്ദേഹത്തിന്‍റെ കൃതികളെയും പ്രവർത്തനങ്ങളെയും കുറിച്ച് ഇത്രയും ചുരുങ്ങിയ സമയത്തിൽ പൂർണ്ണമായി വിവരിക്കാൻ സാധിക്കുകയില്ല, എന്നിരുന്നാലും ചില അറിയപ്പെടാത്ത കൃതികളെക്കുറിച്ച് ഒരാമുഖം നിങ്ങൾക്ക് മുന്നിൽ അവതരിപ്പിക്കുന്നതാണ്.

അഹ്‌മദികൾ പാകിസ്താനെ പിന്തുണയ്ക്കുന്നു എന്ന വിഷയത്തെ സംബന്ധിച്ച് 1947-ൽ ഹദ്‌റത്ത് മുസ്‌ലിഹ് മൗഊദ്(റ) നടത്തിയ ഒരു പ്രഭാഷണത്തിൽ ജമാഅത്തിനെ ഉപദേശിച്ചു കൊണ്ട് പറയുന്നു: “പരിണിതഫലം എന്തു തന്നെയാണെങ്കിലും മർദ്ദിതരെയും അടിച്ചമർത്തപ്പെട്ടവരെയും നാം സഹായിക്കുകയും പിന്തുണയ്ക്കുകയും വേണം.”

ഖലീഫാ തിരുമനസ്സ് പറയുന്നു, ഇസ്‌ലാമിന്‍റെ പേരിലാണ് നമുക്കുമേൽ അക്രമണങ്ങൾ അഴിച്ചുവിടുന്നത്. എന്നാൽ അദ്ദേഹം ഇസ്‌ലാമിക അധ്യാപനങ്ങൾ അനുസരിച്ച് ജീവിക്കാനാണ് ഉപദേശിച്ചത്. ഇന്നത്തെ മുല്ലാക്കൾ പറയുന്നത് പോലെ അഹ്‌മദികൾ ഇസ്‌ലാമിന് എതിരായിരുന്നു എങ്കിൽ അദ്ദേഹത്തിന് ഇപ്രകാരം നിർദേശിക്കേണ്ട കാര്യം എന്തായിരുന്നു? അല്ലാഹു പാക്കിസ്താനെ  മുല്ലാക്കളുടെ തന്ത്രങ്ങളിൽ നിന്ന് രക്ഷിക്കുമാറാകട്ടെ. എന്നാൽ മാത്രമേ രാജ്യം പുരോഗതിയുടെ മാർഗ്ഗത്തിൽ നീങ്ങുകയുള്ളു.

1947-ൽ ലാഹോറിൽ, അദ്ദേഹം പാകിസ്താന്‍റെ ഭാവിയെക്കുറിച്ച് ഒരു പ്രഭാഷണം നടത്തി. പാകിസ്താനിൽ ഏത് തരത്തിലുള്ള നിയമങ്ങളാണ് സ്ഥാപിക്കേണ്ടതെന്നും ഇസ്‌ലാമിക അധ്യാപനങ്ങൾ ഏത് രീതിയിലാണ് പ്രതിഫലിപ്പിക്കേണ്ടതെന്നും അദ്ദേഹം അതിൽ സംസാരിച്ചു. ഇസ്‌ലാം മറ്റ് മതസ്ഥരോട് ഇസ്‌ലാം സ്വീകരിക്കാൻ ആവശ്യപ്പെടുന്നില്ലന്നും, അവർ സ്വന്തം മതത്തിൽ തുടരാനും അനുഷ്ഠാനങ്ങൾ പാലിക്കാനും സ്വതന്ത്രരാണെന്നും അദ്ദേഹം അതില്‍ പറയുന്നു.

ഹദ്‌റത്ത് മുസ്‌ലിഹ് മൗഊദ്(റ) യുദ്ധങ്ങളെക്കുറിച്ചും എഴുതിയിട്ടുണ്ട്. ‘റഷ്യയും നിലവിലെ യുദ്ധവും’ എന്ന പുസ്തകത്തിൽ രണ്ടാം ലോക മഹായുദ്ധസമയത്ത് റഷ്യ പോളണ്ടിലേക്ക് പ്രവേശിച്ചതിന്‍റെ കാരണങ്ങളും സാധ്യമായ പ്രത്യാഘാതങ്ങളെക്കുറിച്ചും പറഞ്ഞുകൊണ്ട് ഇനി മുന്നോട്ട് എന്താണ് ചെയ്യേണ്ടത് എന്നതിനെക്കുറിച്ച് അദ്ദേഹം വിവരിക്കുന്നുണ്ട്.